உலகின் முன்னணி ஓடிடி நிறுவனங்களில் ஒன்றான நெட்ஃபிக்ஸ் (Netflix), தனது பணியாளர்களில் சுமார் 6 சதவீதத்தினரைப் பணிநீக்கம் செய்யத் திட்டமிட்டுள்ளது. இதன் மூலம் உலகம் முழுவதும் கிட்டத்தட்ட 1,000 ஊழியர்கள் வேலை இழக்கும் நிலை ஏற்பட்டுள்ளது. நிறுவனத்தின் நிர்வாக மாற்றங்கள் மற்றும் ஸ்ட்ரீமிங் துறையில் அதிகரித்து வரும் போட்டி ஆகியவை இந்த முடிவின் பின்னணியில் உள்ளன.
1,000 ஊழியர்களுக்கு வேலை இழப்பு!
நெட்ஃபிக்ஸ் நிறுவனத்தின் இணை தலைமைச் செயல் அதிகாரிகளான கிரெக் பீட்டர்ஸ் மற்றும் டெட் சரண்டோஸ் ஆகியோர் புதன்கிழமை ஊழியர்களுக்கு அனுப்பிய தகவலில் பணிநீக்க நடவடிக்கையை அறிவித்துள்ளனர்.
இந்த நடவடிக்கையால் நிறுவனத்தின் தயாரிப்பு, தொழில்நுட்பம், சட்டம் மற்றும் மனிதவளத் துறைகளில் பணிபுரியும் ஊழியர்கள் அதிகம் பாதிக்கப்படுவார்கள் எனத் தெரிவிக்கப்பட்டுள்ளது.
2025-ஆம் ஆண்டின் இறுதியில் நெட்ஃபிக்ஸ் நிறுவனத்தில் உலகம் முழுவதும் சுமார் 16,000 முழுநேரப் பணியாளர்கள் இருந்தனர். அவர்களில் 6 சதவீதத்தினரைக் குறைப்பது நிறுவனத்தின் சமீபத்திய ஆண்டுகளில் மேற்கொள்ளப்படும் மிகப்பெரிய பணிநீக்க நடவடிக்கையாகக் கருதப்படுகிறது.
லாபம் அதிகரித்தும் பணிநீக்கம் ஏன்?
நெட்ஃபிக்ஸ் நிறுவனத்தின் வருவாய் மற்றும் லாபம் அதிகரித்துள்ள நிலையிலும் இந்த முடிவு எடுக்கப்பட்டுள்ளது. 2026-ஆம் ஆண்டின் இரண்டாவது நிதியாண்டு காலாண்டில் நிறுவனம் 3.4 பில்லியன் அமெரிக்க டாலர் லாபம் ஈட்டியுள்ளது. இதே காலகட்டத்தில் அதன் வருவாய் 12.56 பில்லியன் அமெரிக்க டாலராக உயர்ந்துள்ளது.
இருப்பினும், மூன்றாவது காலாண்டிற்கான வருவாய் கணிப்பு முதலீட்டாளர்களின் எதிர்பார்ப்புகளைவிடக் குறைவாக இருந்தது. இதனால் நிறுவனத்தின் வளர்ச்சி மற்றும் எதிர்கால வருவாய் குறித்த கேள்விகள் எழுந்துள்ளன.
நிறுவனத்தின் வளங்களை முக்கியமான வளர்ச்சிப் பகுதிகளில் பயன்படுத்தவும், சேவைகளை மேம்படுத்தவும் நிர்வாகம் முன்னுரிமை அளிக்க விரும்புவதாகத் தெரிவித்துள்ளது.
அதிகரிக்கும் ஓடிடி போட்டி!
நெட்ஃபிக்ஸ் நிறுவனம் அமேசான் பிரைம் வீடியோ, டிஸ்னி+ உள்ளிட்ட ஓடிடி தளங்களிடமிருந்து கடுமையான போட்டியை எதிர்கொண்டு வருகிறது. மேலும், யூடியூப் மற்றும் டிக்டாக் போன்ற தளங்கள் பார்வையாளர்களின் கவனத்தை ஈர்ப்பதும் ஸ்ட்ரீமிங் நிறுவனங்களுக்கு சவாலாக அமைந்துள்ளது.
சந்தாதாரர்களின் எண்ணிக்கையை அதிகரிப்பது மட்டுமின்றி, பயனர்கள் தளத்தில் செலவிடும் நேரத்தையும் உயர்த்த வேண்டிய கட்டாயம் நிறுவனங்களுக்கு ஏற்பட்டுள்ளது. இதற்காக விளம்பரங்கள், நேரடி நிகழ்ச்சிகள் மற்றும் கேமிங் உள்ளிட்ட புதிய வருவாய் வழிகளில் நெட்ஃபிக்ஸ் கவனம் செலுத்தி வருகிறது.
2022-க்குப் பிறகு மிகப்பெரிய பணிநீக்கம்!
கடந்த 2022-ஆம் ஆண்டில் சந்தாதாரர்களின் எண்ணிக்கை குறைந்ததைத் தொடர்ந்து நெட்ஃபிக்ஸ் நிறுவனம் சுமார் 450 ஊழியர்களைப் பணிநீக்கம் செய்திருந்தது. தற்போது அறிவிக்கப்பட்டுள்ள நடவடிக்கை, அந்த ஆண்டுக்குப் பிறகு நிறுவனத்தின் மிகப்பெரிய பணிநீக்கமாகக் கருதப்படுகிறது.
நிறுவனத்தின் வணிகம் தொடர்ந்து வளர்ந்து வருவதாக நிர்வாகம் தெரிவித்துள்ளபோதிலும், எதிர்கால வளர்ச்சிக்கான முதலீடுகளையும் பணியாளர் வளங்களையும் கவனமாகத் திட்டமிட வேண்டியுள்ளதாகக் கூறியுள்ளது.
ஓடிடி துறையில் போட்டி தீவிரமடைந்து வரும் நிலையில், நெட்ஃபிக்ஸ் நிறுவனத்தின் இந்த முடிவு உலகளாவிய தொழில்நுட்பம் மற்றும் பொழுதுபோக்குத் துறையில் கவனத்தைப் பெற்றுள்ளது.
இனி வாரத்தில் 3 நாட்கள் மட்டுமே வேலை? – ஏ.ஐ. குறித்து ஜெப் பெசோஸ் கணிப்பு!