சென்னை ஓட்டேரியில், 8 மாத கர்ப்பிணி பெண் தூக்கிட்டுத் தற்கொலை செய்துகொண்ட சம்பவம் அதிர்ச்சியை ஏற்படுத்தியுள்ளது. காதல் திருமணம் செய்து ஆறு மாதங்களே ஆன நிலையில், வரதட்சணை தொடர்பாகக் கணவர் மற்றும் மாமியார் துன்புறுத்தியதாகப் பெண்ணின் தாய் காவல்துறையில் புகார் அளித்துள்ளார்.
இதையடுத்து, கணவரிடம் போலீசார் விசாரணை நடத்தி வருகின்றனர். மேலும், வருவாய் கோட்டாட்சியர் விசாரணையும் நடைபெற்று வருகிறது.
காதல் திருமணம் செய்த கோகிலா
சென்னை ஓட்டேரி நேருஜி ஜோதி நகரைச் சேர்ந்த சங்கர் – அம்மு தம்பதியின் மகள் கோகிலா என்கிற அஸ்ரா (26). இவர், ஓட்டேரி ஆதிசேஷன் நகரைச் சேர்ந்த சந்தோஷ் (29) என்பவரைக் காதலித்து வந்துள்ளார். பாலிடெக்னிக் படிப்பை முடித்த சந்தோஷ், மின்சாதனப் பொருட்கள் விற்பனை செய்யும் கடை நடத்தி வருவதாகக் கூறப்படுகிறது.
இரு வீட்டாரின் சம்மதத்துடன் கடந்த 2026 மார்ச் 6-ஆம் தேதி இருவருக்கும் திருமணம் நடைபெற்றது. திருமணத்துக்குப் பிறகு சந்தோஷுக்கும் அவரது தாயார் அமுலுவுக்கும், கோகிலாவுக்கும் இடையே அடிக்கடி குடும்பத் தகராறு ஏற்பட்டதாகக் கூறப்படுகிறது.
வரதட்சணை தொடர்பாக அவமதித்ததாகப் புகார்
இதையடுத்து, சந்தோஷும் கோகிலாவும் ஓட்டேரி புதிய வாழை மாநகர் பகுதியில் வாடகை வீட்டில் வசித்து வந்தனர். கோகிலா தற்போது எட்டு மாத கர்ப்பிணியாக இருந்துள்ளார்.
இந்த நிலையில், தனது மகளுக்கு திருமணத்தின்போது 30 சவரன் தங்க நகைகள் மற்றும் ஒரு லட்சம் ரூபாய் ரொக்கமாக வழங்கியதாக கோகிலாவின் தாய் அம்மு தெரிவித்துள்ளார்.
ஆனால், சந்தோஷின் தாயார் அமுலு, தனது மூத்த மருமகள் 40 சவரன் நகைகளைக் கொண்டு வந்ததாகக் கூறி, கோகிலாவை அவமதித்ததாகப் புகாரில் குறிப்பிட்டுள்ளார்.
குறைவான நகைகளைச் சீதனமாகக் கொண்டு வந்ததாகக் கூறி, கோகிலாவைத் தொடர்ந்து இழிவாகப் பேசியதாகவும், சில நேரங்களில் சந்தோஷும் அவ்வாறு பேசியதாகவும் அவரது தாய் குற்றம்சாட்டியுள்ளார்.
இந்தக் குற்றச்சாட்டுகள் குறித்து காவல்துறையினர் விசாரணை மேற்கொண்டு வருகின்றனர்.
கணவரிடம் போலீசார் விசாரணை
சம்பவத்தன்று இரவு சந்தோஷ் தனது தாயாரைப் பார்க்கச் சென்றதாகக் கூறப்படுகிறது. இதையடுத்து, கோகிலா தனது கணவருக்கு வீடியோ அழைப்பு செய்து, உடனடியாக வீட்டுக்கு வருமாறும், இல்லையெனில் தூக்கிட்டு தற்கொலை செய்துகொள்ளப் போவதாகவும் கூறியதாகத் தகவல் வெளியாகியுள்ளது.
இதற்குச் சிறிது நேரத்தில் வீட்டுக்கு வந்துவிடுவதாகச் சந்தோஷ் தெரிவித்ததாகக் கூறப்படுகிறது. இரவு சுமார் 8.30 மணியளவில் வீட்டுக்குத் திரும்பியபோது, கோகிலா மின்விசிறியில் தூக்கில் தொங்கிய நிலையில் உயிரிழந்து கிடந்ததாகத் தெரிவிக்கப்பட்டுள்ளது.
உடலை மீட்டு போலீசார் விசாரணை
தகவலறிந்து சம்பவ இடத்துக்குச் சென்ற ஓட்டேரி காவல்துறையினர், கோகிலாவின் உடலைக் கைப்பற்றி பிரேதப் பரிசோதனைக்காக கீழ்ப்பாக்கம் அரசு மருத்துவமனைக்கு அனுப்பிவைத்தனர். தொடர்ந்து, அவரது கணவர் சந்தோஷிடம் விசாரணை நடத்தி வருகின்றனர்.
ஆர்டிஓ விசாரணை நடைபெறுகிறது
திருமணமாகி ஆறு மாதங்களே ஆன நிலையில், கோகிலா உயிரிழந்துள்ளதால், இந்தச் சம்பவம் தொடர்பாக வருவாய் கோட்டாட்சியர் (ஆர்டிஓ) விசாரணையும் நடைபெற்று வருகிறது.
வரதட்சணை தொடர்பாகத் துன்புறுத்தப்பட்டதாகத் தாய் அளித்துள்ள புகாரின் அடிப்படையில், காவல்துறையினர் விசாரணையைத் தொடர்ந்து மேற்கொண்டு வருகின்றனர்.
அம்பத்தூரில் மாயமான 5 வடமாநில சிறுவர்கள் ஆந்திராவில் ரயிலில் மீட்பு!