போலி ஆவணங்கள் மூலம் நிலம் அபகரிக்கப்பட்டதாக அளித்த புகாரில் உரிய நடவடிக்கை எடுக்கப்படவில்லை என்ற மன உளைச்சலில் இளைஞர் ஒருவர் தூக்கிட்டுத் தற்கொலை செய்துகொண்ட சம்பவம் அதிர்ச்சியை ஏற்படுத்தியுள்ளது.
தனது தற்கொலைக்கு நிலத்தை அபகரித்ததாகக் குற்றம்சாட்டப்படும் நபர்களே காரணம் எனக் குறிப்பிட்டு, இறுதிக் கடிதம் மற்றும் வீடியோவை அவர் வெளியிட்டுள்ளதாகத் தெரிவிக்கப்படுகிறது.
தனது மகனின் மரணத்திற்கு தாம்பரம் காவல் ஆணையரக காவலர்களின் நடவடிக்கையின்மையும் காரணம் என உயிரிழந்த இளைஞரின் தந்தை குற்றம்சாட்டியுள்ளார்.
சென்னை அம்பத்தூர் பாடி பகுதியைச் சேர்ந்த முருகேசன், வாடகை வாகன ஓட்டுநராகப் பணியாற்றி வருகிறார்.
இவர் தனது மனைவி, இரண்டு மகன்கள் மற்றும் மகளுடன் வாடகை வீட்டில் வசித்து வருகிறார். சுமார் 30 ஆண்டுகளுக்கு முன்பு கூடுவாஞ்சேரியில் 9,000 சதுர அடி நிலத்தை வாங்கியதாகக் கூறப்படுகிறது.
குடும்பத் தேவைக்காக, சுமார் 25 ஆண்டுகளுக்கு முன்பு அண்ணா நகரைச் சேர்ந்த நிதி நிறுவன உரிமையாளர் உமித்ராஜிடம் நிலத்தின் பத்திரத்தை அடமானமாகக் கொடுத்து ரூ.50,000 கடன் பெற்றுள்ளார்.
பின்னர் வாங்கிய கடனை முழுமையாகத் திருப்பிச் செலுத்தியபோதிலும், நிலத்தின் அசல் பத்திரத்தை உமித்ராஜ் திருப்பிக் கொடுக்காமல் பல்வேறு காரணங்களைக் கூறி அலைக்கழித்ததாக முருகேசன் குற்றம்சாட்டியுள்ளார்.
போலி ஆவணங்கள் மூலம் நிலம் விற்பனை செய்யப்பட்டதாகப் புகார்
இதற்கிடையே, முருகேசனுக்குச் சொந்தமான நிலத்திற்கு போலி ஆவணங்கள் தயாரித்து, உமித்ராஜ் மற்றும் அவரது மகன்கள் மூன்று பேருக்கு அந்த நிலத்தை விற்பனை செய்ததாகக் கூறப்படுகிறது.
இதுகுறித்து முருகேசன் பலமுறை கேட்டபோதும் முறையான பதில் கிடைக்கவில்லை என்றும், காவல்துறையிடம் புகார் அளித்தும் உரிய நடவடிக்கை எடுக்கப்படவில்லை என்றும் அவர் தரப்பில் தெரிவிக்கப்படுகிறது.
நில அபகரிப்பு தொடர்பாக நீதிமன்றத்திலும் வழக்குத் தொடரப்பட்டு விசாரணை நடைபெற்று வருவதாகக் கூறப்படுகிறது.
மேலும், கடந்த ஆண்டு தாம்பரம் காவல் ஆணையரகத்தின் நில மோசடி பிரிவில் நிலத்தை மீட்டுத் தரக் கோரி புகார் மனு அளித்ததாகவும், பல மாதங்களாக முதல் தகவல் அறிக்கை பதிவு செய்யப்படாமல் தாமதம் ஏற்பட்டதாகவும் முருகேசன் தரப்பில் குற்றம்சாட்டப்பட்டுள்ளது.
ஒருபுறம் குடும்பத்தில் மருத்துவச் செலவு; மறுபுறம் நிலத்தை இழந்த வேதனை
இந்தச் சூழலில், முருகேசனின் இளைய மகனுக்கு உடல்நலக் குறைவு ஏற்பட்டு, இரு சிறுநீரகங்களும் செயலிழந்ததாகக் கூறப்படுகிறது. இதனால் வாரத்திற்கு இரண்டு முறை டயாலிசிஸ் சிகிச்சை மேற்கொள்ள வேண்டிய நிலை ஏற்பட்டுள்ளது.
முருகேசனுக்கும் உடல்நலப் பாதிப்பு ஏற்பட்டதால், குடும்பத்தின் மருத்துவச் செலவுகள் மற்றும் இதர தேவைகளுக்காகக் கடன் வாங்க வேண்டிய கட்டாயம் உருவானதாகத் தெரிவிக்கப்படுகிறது.
ஏற்கெனவே நிலம் தொடர்பான பிரச்சினையால் மன உளைச்சலில் இருந்த குடும்பத்தினருக்கு, மருத்துவச் செலவுகளும் பொருளாதார நெருக்கடியும் கூடுதல் சுமையை ஏற்படுத்தியதாகக் கூறப்படுகிறது.
இந்நிலையில், முருகேசனின் மூத்த மகன் வைரமுத்து கடந்த 14ஆம் தேதி கடிதம் எழுதியதுடன், தனது நிலைப்பாட்டை விளக்கும் வீடியோ ஒன்றையும் பதிவு செய்துவிட்டு வீட்டில் தூக்கிட்டுத் தற்கொலை செய்துகொண்டதாகத் தெரிவிக்கப்பட்டுள்ளது.
இறப்பதற்கு முன்பு வீடியோ வெளியிட்ட இளைஞர்
தனது தற்கொலைக்குக் காரணமாக, தங்களது நிலத்தைப் போலி ஆவணங்கள் மூலம் அபகரித்ததாகக் குற்றம்சாட்டப்படும் உமித்ராஜ் மற்றும் அவரது மகன்களைக் குறிப்பிட்டுள்ள வைரமுத்து, தங்களை ஏமாற்றியவர்கள் மீது முதலமைச்சர் உரிய நடவடிக்கை எடுக்க வேண்டும் என்று வீடியோவில் கோரிக்கை விடுத்துள்ளதாகக் கூறப்படுகிறது.
மேலும், சிறுநீரகங்கள் செயலிழந்த நிலையில் சிகிச்சை பெற்று வரும் தனது தம்பிக்கு, தன்னுடைய சிறுநீரகத்தைத் தானமாக வழங்க வேண்டும் என்றும், மற்ற உறுப்புகளைத் தானமாக வழங்கலாம் என்றும் அவர் உருக்கமாகப் பதிவு செய்துள்ளதாகத் தெரிவிக்கப்படுகிறது.
தந்தை விடுத்துள்ள எச்சரிக்கை
மகனின் மரணத்தால் கடும் துயரத்தில் உள்ள முருகேசன், தங்களது நிலத்தை மீட்டுக் கொடுத்து, புகாரில் உரிய நடவடிக்கை எடுக்க வேண்டும் என வலியுறுத்தியுள்ளார். இல்லையெனில், தலைமைச் செயலகம் முன்பு தீக்குளித்து உயிரை மாய்த்துக்கொள்வோம் என எச்சரிக்கை விடுத்துள்ளதாகக் கூறப்படுகிறது.
இதற்கிடையே, வைரமுத்துவின் தற்கொலை தொடர்பாக கொரட்டூர் காவல்துறையினர் வழக்குப் பதிவு செய்து விசாரணை மேற்கொண்டு வருகின்றனர். நில மோசடி தொடர்பான குற்றச்சாட்டுகள், காவல்துறையினர் மீது முன்வைக்கப்பட்டுள்ள புகார்கள் மற்றும் இளைஞரின் மரணத்துக்கான சூழ்நிலைகள் குறித்து விசாரணையில் உண்மைகள் வெளிவர வேண்டியுள்ளது.
நிலத்தை இழந்ததாகக் கூறப்படும் குடும்பம், ஒருபுறம் சட்டப் போராட்டத்தையும் மறுபுறம் மருத்துவச் செலவுகளையும் எதிர்கொண்ட நிலையில், இளைஞரின் மரணம் அப்பகுதியில் சோகத்தை ஏற்படுத்தியுள்ளது.
புகாரில் உரிய விசாரணை நடத்தி, தவறு செய்தவர்கள் மீது சட்டப்படி நடவடிக்கை எடுக்க வேண்டும் என்பதே பாதிக்கப்பட்ட குடும்பத்தின் கோரிக்கையாக உள்ளது.