சென்னையில் அடுத்த 24 முதல் 48 மணி நேரத்தில் கனமழை பெய்ய வாய்ப்புள்ளதாக வானிலை முன்னறிவிப்பு வெளியாகியுள்ள நிலையில், மழை வெள்ள பாதிப்புகளைத் தடுக்க மாநகராட்சி சார்பில் பல்வேறு முன்னெச்சரிக்கை நடவடிக்கைகள் மேற்கொள்ளப்பட்டு வருகின்றன.
மணலி மண்டலத்தில் 17 தாழ்வான மற்றும் பாதிப்பு ஏற்படக்கூடிய பகுதிகள் கண்டறியப்பட்டுள்ளன. அப்பகுதிகளைக் கண்காணிக்க கேமராக்கள், ட்ரோன்கள் மற்றும் தனி கட்டுப்பாட்டு அறை ஏற்பாடுகள் செய்யப்பட்டுள்ளதாக மாநகராட்சி ஆணையர் சமீரன் தெரிவித்துள்ளார்.
மணலி மண்டலத்தில் மாநகராட்சி ஆணையர் ஆய்வு
சென்னை மாநகராட்சி ஆணையர் சமீரன், மணலி மண்டலத்தில் உள்ள ஆ.முல்லைவாயல் பாலம், கட்டுப்பாட்டு அறை மற்றும் உணவு தயாரிக்கும் மையம் உள்ளிட்ட இடங்களில் ஆய்வு மேற்கொண்டார்.
பின்னர் செய்தியாளர்களிடம் பேசிய அவர், சென்னையில் கடந்த ஒரு வாரமாக விட்டுவிட்டு கனமழை பெய்து வருவதாகவும், அடுத்தடுத்த நாட்களில் கனமழை பெய்ய வாய்ப்புள்ளதாக வானிலை ஆய்வு மையம் தெரிவித்திருப்பதால் மண்டல வாரியாக முன்னெச்சரிக்கைப் பணிகள் ஆய்வு செய்யப்பட்டுள்ளதாகவும் கூறினார்.
மணலியில் 17 பாதிப்புக்குள்ளாகக்கூடிய பகுதிகள்
சென்னை மாநகரம் முழுவதும் 219 தாழ்வான பகுதிகள் கண்டறியப்பட்டுள்ள நிலையில், மணலி மண்டலத்தில் மட்டும் 17 பகுதிகள் பாதிப்பு ஏற்படக்கூடிய இடங்களாக அடையாளம் காணப்பட்டுள்ளன.
இந்தப் பகுதிகளில் மழைநீர் தேங்குகிறதா, பொதுமக்களுக்கு பாதிப்பு ஏற்படுகிறதா என்பதைக் கண்காணிக்க நடவடிக்கை எடுக்கப்பட்டுள்ளது.
கடந்த காலங்களில் பெருவெள்ளத்தின்போது ஆ.முல்லைவாயல் பாலம் மற்றும் அதைச் சுற்றியுள்ள பகுதிகளில் வெள்ளநீர் சூழ்ந்த அனுபவம் இருப்பதால், இந்த முறை முன்னெச்சரிக்கை நடவடிக்கைகள் தீவிரப்படுத்தப்பட்டுள்ளதாக ஆணையர் தெரிவித்தார்.
கேமராக்கள், ட்ரோன்கள் மூலம் வெள்ளக் கண்காணிப்பு
இதுவரை மாநகராட்சி ரிப்பன் மாளிகையில் இயங்கி வந்த மையக் கட்டுப்பாட்டு அறையுடன் இணைந்து, ஒவ்வொரு மண்டலத்திலும் தனித்தனியாகக் கட்டுப்பாட்டு அறைகள் அமைக்கப்பட்டுள்ளதாகத் தெரிவிக்கப்பட்டுள்ளது.
ரிப்பன் மாளிகையில் கிடைக்கும் தகவல்களைப் போலவே, மண்டலக் கட்டுப்பாட்டு அறைகளிலும் தேவையான தரவுகளை ஒருங்கிணைத்துக் கண்காணிக்க ஏற்பாடுகள் செய்யப்பட்டுள்ளன.
தாழ்வான பகுதிகளில் கேமராக்கள் பொருத்தப்பட்டு, மழைநீர் தேக்கம் மற்றும் மக்களின் நிலைமை கண்காணிக்கப்படும்.
மேலும், ஒவ்வொரு மண்டலத்திலும் இரண்டு ட்ரோன்கள் பயன்படுத்த ஏற்பாடு செய்யப்பட்டுள்ளதாகவும், வாகனங்கள் செல்ல முடியாத வெள்ளப் பாதிப்புக்குள்ளான இடங்களை ட்ரோன்கள் மூலம் கண்டறிந்து நடவடிக்கை எடுக்கப்படும் என்றும் ஆணையர் கூறினார்.
இருளர் காலனி, பர்மா காலனி உள்ளிட்ட பகுதிகளுக்கு எச்சரிக்கை
அதிக கனமழை பெய்து ஏரிகளின் நீர்வரத்து அதிகரித்தால், இருளர் காலனி, பர்மா காலனி, பாலசுப்பிரமணியம் நகர், பெருமாள் நகர் உள்ளிட்ட குடியிருப்புப் பகுதிகளில் வெள்ளப் பாதிப்பு ஏற்படும் அபாயம் இருப்பதாக மாநகராட்சி ஆணையர் எச்சரித்துள்ளார்.
இதைக் கருத்தில் கொண்டு, அப்பகுதிகளில் கண்காணிப்பையும் முன்னெச்சரிக்கை நடவடிக்கைகளையும் மேற்கொள்ள ஏற்பாடுகள் செய்யப்பட்டுள்ளன.
ஏரிகள் மற்றும் நீர்வழித்தடங்களில் பணிகள் தீவிரம்
சென்னையைச் சுற்றியுள்ள பூண்டி, புழல், சோழவரம், தேர்வாய் கண்டிகை உள்ளிட்ட ஏரிகளின் நிலவரம் கண்காணிக்கப்பட்டு வருவதாக ஆணையர் தெரிவித்தார். ரெட் ஹில்ஸ் ஏரியின் நீர்மட்டம் குறித்தும் கண்காணிப்பு நடைபெற்று வருகிறது.
ஆ.முல்லைவாயல் பகுதியில் ஆகாயத்தாமரைகளை அகற்றி நீர்வழித்தடத்தை அகலப்படுத்தும் பணிகள் நடைபெற்று வருகின்றன. மேலும், நீர் வெளியேறுவதற்கு இடையூறாக இருந்த சிபிசிஎல் நிறுவனத்தின் சுற்றுச்சுவர் அகற்றப்பட்டுள்ளதாகவும், நீரோட்டத்தை மேம்படுத்தும் பணிகள் மேற்கொள்ளப்பட்டு வருவதாகவும் அவர் கூறினார்.
கொரட்டூர், ரெட்டேரி மற்றும் ரெட் ஹில்ஸ் ஏரிகளில் இருந்து வெளியேறும் நீரை ஆ.முல்லைவாயல் பாலத்துடன் இணைக்கும் திட்டம் குறித்தும் நடவடிக்கைகள் திட்டமிடப்பட்டுள்ளன.
தொழிற்சாலைகளுக்கு மாநகராட்சி எச்சரிக்கை
மணலி சுற்றுவட்டாரத்தில் பல்வேறு தொழிற்சாலைகள் அமைந்துள்ளதால், மழைநீருடன் தொழிற்சாலைக் கழிவுகள் கலந்து குடிநீர் மற்றும் சுற்றுச்சூழல் பாதிப்பு ஏற்படாமல் தடுக்க முன்னெச்சரிக்கை நடவடிக்கைகளை மேற்கொள்ளுமாறு தொழிற்சாலை நிர்வாகங்களுக்கு அறிவுறுத்தப்பட்டுள்ளதாக ஆணையர் தெரிவித்தார்.
தொழிற்சாலைகளில் கசிவுகள் மற்றும் அடைப்புகள் உள்ளனவா என்பதைக் கண்காணித்து வருவதாகவும், அரசு மற்றும் தனியார் நிறுவனங்களுக்கு தொடர்ந்து எச்சரிக்கை விடுக்கப்பட்டு வருவதாகவும் அவர் கூறினார்.
உணவு, மருத்துவம் மற்றும் நிவாரண முகாம்கள் தயார்
ஒவ்வொரு மண்டலத்திலும் தனித்தனியாகச் சமையலறைகள் மற்றும் பாதுகாப்பு முகாம்கள் ஏற்பாடு செய்யப்பட்டுள்ளன. பொதுமக்களிடமிருந்து வரும் புகார்களை உடனுக்குடன் சரிசெய்ய பணியாளர்கள் நியமிக்கப்பட்டுள்ளதுடன், தேவையான இயந்திரங்களும் தயார் நிலையில் வைக்கப்பட்டுள்ளன.
மழைநீர் தேங்கிய பகுதிகளில் கொசு உற்பத்தியைத் தடுக்கப் பணியாளர்கள் நியமிக்கப்பட்டுள்ளனர். காய்ச்சல் மற்றும் தொற்றுநோய்கள் பரவாமல் தடுக்க மருத்துவக் குழுவும் செயல்பட்டு வருகிறது.
7,000 தன்னார்வலர்கள்; 12,000 களப்பணியாளர்கள் தயார்
சென்னை மாநகராட்சியின் செயலி மூலம் சுமார் 7,000 தன்னார்வலர்கள் பதிவு செய்துள்ளதாக ஆணையர் தெரிவித்தார்.
கட்டுப்பாட்டு அறை, களப்பணி, சமையலறை, ட்ரோன் இயக்கம் மற்றும் மருத்துவ உதவி உள்ளிட்ட பணிகளில் அவர்கள் ஈடுபடுத்தப்பட உள்ளனர்.
மேலும், சுமார் 12,000 களப்பணியாளர்கள் தற்போது தயார் நிலையில் உள்ளதாகவும், தேவைப்பட்டால் இந்த எண்ணிக்கையை 15,000 வரை உயர்த்த நடவடிக்கை எடுக்கப்படும் என்றும் கூறினார். மழைக்கோட்டுகள், இரவு நேரப் பணிகளுக்கான பிரதிபலிப்பு ஆடைகள் உள்ளிட்ட பாதுகாப்பு உபகரணங்களும் பணியாளர்களுக்கு வழங்கப்பட்டுள்ளதாகத் தெரிவித்தார்.
113 படகுகள் தயார் – மேலும் அதிகரிக்கத் திட்டம்
வெள்ளப் பாதிப்புகளின்போது பொதுமக்களை மீட்பதற்காக சென்னையில் 13 இடங்களில் 113 படகுகள் தயார் நிலையில் வைக்கப்பட்டுள்ளன. தேவைக்கேற்ப படகுகளின் எண்ணிக்கையை 250 ஆக உயர்த்தவும் நடவடிக்கை எடுக்கப்பட்டு வருவதாக ஆணையர் தெரிவித்தார். மீனவர்களும் மீட்புப் பணிகளுக்கு உதவத் தயாராக உள்ளதாகக் கூறினார்.
பொதுமக்களுக்கு ஆணையர் அறிவுறுத்தல்
அதிக கனமழை பெய்து வெள்ள அபாயம் ஏற்படும் பகுதிகளில் வசிப்பவர்கள், அதிகாரிகள் அறிவுறுத்தினால் அருகிலுள்ள பாதுகாப்பு முகாம்களுக்குச் செல்ல வேண்டும் என ஆணையர் கேட்டுக்கொண்டார்.
வெள்ளம் அதிகரித்த பிறகு வெளியேறலாம் எனக் காத்திருக்காமல், முன்னெச்சரிக்கையுடன் செயல்பட வேண்டும் என்றும் அறிவுறுத்தினார்.
பாஸ்போர்ட், ரேஷன் அட்டை, ஆதார் அட்டை உள்ளிட்ட முக்கிய ஆவணங்களைப் பிளாஸ்டிக் உறைகளில் பாதுகாப்பாக வைத்திருக்க வேண்டும். குழந்தைகள் மற்றும் வயதானவர்களைப் பாதுகாப்பாக வெளியேற்றுவதற்கு முன்னுரிமை அளிக்க வேண்டும் என்றும் தெரிவித்தார்.
மணலி மண்டலக் கட்டுப்பாட்டு அறை உதவி எண்
மழை மற்றும் வெள்ளப் பாதிப்புகள் தொடர்பாக மணலி மண்டலக் கட்டுப்பாட்டு அறையைத் தொடர்புகொள்ள 94454 67126 என்ற உதவி எண் அறிவிக்கப்பட்டுள்ளது. பொதுமக்கள் அவசரத் தேவைகளின்போது இந்த எண்ணைப் பயன்படுத்தலாம் எனத் தெரிவிக்கப்பட்டுள்ளது.
மழை தொடர்பான முன்னெச்சரிக்கை நடவடிக்கைகள் தொடர்ந்து மேற்கொள்ளப்பட்டு வரும் நிலையில், பொதுமக்கள் மாநகராட்சி மற்றும் அதிகாரிகளின் அறிவுறுத்தல்களைப் பின்பற்றி பாதுகாப்பாக இருக்க வேண்டும் என அறிவுறுத்தப்பட்டுள்ளது.