அக்டோபர் 30 மாலை 4 மணி முதல் 31ஆம் தேதி காலை 6 மணி வரை கட்டுப்பாடு – மீன்வளத்துறை அறிவிப்பு
ஆந்திர மாநிலம் ஸ்ரீஹரிகோட்டாவில் இருந்து ராக்கெட் ஏவப்பட உள்ளதை முன்னிட்டு, பழவேற்காடு உள்ளிட்ட திருவள்ளூர் மாவட்ட மீனவர்கள் குறிப்பிட்ட நேரத்திற்கு கடலுக்குச் செல்ல மீன்வளத்துறை தடை விதித்துள்ளது.
ஆந்திர மாநிலம் ஸ்ரீஹரிகோட்டாவில் அமைந்துள்ள சதீஷ் தவான் விண்வெளி ஆய்வு மையத்தின் ராக்கெட் ஏவுதளத்தில் இருந்து, அக்டோபர் 30ஆம் தேதி இரவு 11.51 மணிக்கு ஜி.எஸ்.எல்.வி. எஃப்18 (GSLV F18) ராக்கெட் மூலம் என்.வி.எஸ்.-03 (NVS-03) விண்கலம் விண்ணில் ஏவப்பட உள்ளதாக அறிவிக்கப்பட்டுள்ளது.
மீனவர்கள் கடலுக்குச் செல்லத் தடை
ராக்கெட் ஏவப்படும் காலகட்டத்தில், கடலில் குறிப்பிட்ட பகுதிகளில் பாதுகாப்பு முன்னெச்சரிக்கை நடவடிக்கைகள் மேற்கொள்ளப்படுவது வழக்கம். அசம்பாவிதங்களைத் தவிர்க்கும் வகையில், அக்டோபர் 30ஆம் தேதி மாலை 4 மணி முதல் அக்டோபர் 31ஆம் தேதி காலை 6 மணி வரை பழவேற்காடு பகுதி மீனவர்கள் உட்பட திருவள்ளூர் மாவட்ட மீனவர்கள் யாரும் கடலில் மீன்பிடிக்கச் செல்ல வேண்டாம் என அறிவுறுத்தப்பட்டுள்ளது.
மீனவக் கூட்டுறவு சங்கங்கள் மூலம் அறிவிப்பு
இதுதொடர்பாக, மீன்வளத்துறை உதவி இயக்குநர் ஜனார்த்தனன் சுற்றறிக்கை அனுப்பியுள்ளார். மீனவக் கூட்டுறவு சங்கங்கள் மூலம் மீனவர்களுக்குத் தடை குறித்த தகவல் தெரிவிக்கப்பட்டுள்ளது.
ராக்கெட் ஏவுதலை முன்னிட்டு விதிக்கப்பட்டுள்ள இந்தக் கட்டுப்பாட்டை மீனவர்கள் கடைப்பிடிக்க வேண்டும் என அறிவுறுத்தப்பட்டுள்ளது.
இதனால் பழவேற்காடு மற்றும் திருவள்ளூர் மாவட்டத்தின் தொடர்புடைய மீனவப் பகுதிகளில் அக்டோபர் 30ஆம் தேதி மாலை முதல் மறுநாள் காலை வரை மீன்பிடித் தொழில் தற்காலிகமாகப் பாதிக்கப்படும்.
தீபாவளி நேரத்தில் அதிரடி விலையேற்றம்: ஆவின் பொருட்கள் விலை உயர்வால் இல்லத்தரசிகள் வேதனை!