சித்து – தர்ஷிகா மீண்டும் இணையும் கிரைம் திரில்லர்! பிரசாத் லேப் பிள்ளையார் கோவிலில் படத்தின் தொடக்க விழா!
விமர்சன ரீதியாகவும், வணிக ரீதியாகவும் வரவேற்பைப் பெற்ற ‘தி டார்க் ஹெவன்’ திரைப்படத்தை இயக்கிய பாலாஜி, தனது அடுத்த படைப்பாக ‘தி லாஸ்ட் கேஸ்’ (The Last Case) என்ற புதிய திரைப்படத்தை இயக்குகிறார். இதில் சித்து கதாநாயகனாகவும், தர்ஷிகா கதாநாயகியாகவும் நடிக்கின்றனர்.
ட்ரீம் 7 சினிமாஸ் நிறுவனம் தயாரிக்கும் இப்படத்தின் தொடக்க விழா இன்று சென்னை பிரசாத் லேப் பிள்ளையார் கோவிலில் பத்திரிகையாளர்கள் முன்னிலையில் நடைபெற்றது.
மீண்டும் இணையும் ‘தி டார்க் ஹெவன்’ படக்குழு!
முந்தைய படத்தில் நடித்த சித்து, தர்ஷிகா ஆகியோர் மீண்டும் இந்தப் படத்தில் இணைந்துள்ளனர். இவர்களுடன் குணச்சித்திர நடிகர் ஜெயக்குமார் உள்ளிட்ட பலர் நடிக்கின்றனர். முந்தைய படத்தில் பணியாற்றிய ஒளிப்பதிவாளர், இசையமைப்பாளர் உள்ளிட்ட தொழில்நுட்பக் கலைஞர்களும் இப்படத்தில் தொடர்கின்றனர்.
ஒவ்வொரு குற்றமும் ஏதாவது ஒரு தடயத்தை விட்டுச் செல்லும் என்ற மையக் கருத்தை அடிப்படையாகக் கொண்டு இப்படத்தின் கதை அமைக்கப்பட்டுள்ளதாக படக்குழுவின் போஸ்டர்கள் உணர்த்துகின்றன.
முற்றிலும் மாறுபட்ட கிரைம் திரில்லர் – இயக்குநர் பாலாஜி!
விழாவில் இயக்குநர் பாலாஜி பேசுகையில்,
“‘தி டார்க் ஹெவன்’ திரைப்படம் திரையரங்குகளில் வெற்றி பெற்றதுடன், செப்டம்பர் 18ஆம் தேதி ஓடிடியில் வெளியாகி நல்ல வரவேற்பைப் பெற்றுள்ளது. அந்த மகிழ்ச்சியுடன் எங்களது அடுத்த படமான ‘தி லாஸ்ட் கேஸ்’ திரைப்படத்தைத் தொடங்கியுள்ளோம்.
இதுவும் கிரைம் திரில்லர் திரைப்படமாக உருவாகிறது. முந்தைய படத்தில் நடித்த சித்து, தர்ஷிகா, ஜெயக்குமார் ஆகியோர் இந்தப் படத்திலும் நடிக்கின்றனர். மேலும் புதிய நடிகர்களும் இடம்பெறுகின்றனர்.
மலைப்பகுதியில் நடைபெறும் குற்றப் புலனாய்வை மையமாகக் கொண்ட கதைதான் என்றாலும், முந்தைய படத்திலிருந்து முற்றிலும் மாறுபட்டதாக இருக்கும். இதில் இடம்பெறும் நிலப்பரப்புக் காட்சிகள் படத்திற்கு வித்தியாசமான பின்னணியை உருவாக்கும்.
ஒவ்வொரு கதாபாத்திரத்திலும் ஆழமான உணர்வுகள் வெளிப்படும் வகையில் கதை மற்றும் காட்சிகள் அமைக்கப்படும். முந்தைய படத்தில் இருந்த பேண்டஸி அம்சங்கள் இதில் இருக்காது. உணர்ச்சிகரமான காட்சிகளுக்கும் முக்கியத்துவம் அளிக்கப்படும்.
இந்தக் கதையின் பின்னணியில் உண்மைச் சம்பவங்கள் உள்ளன. படத்தைப் பற்றிய கூடுதல் தகவல்கள் அடுத்தடுத்து வெளியாகும். எங்களது முந்தைய படத்தின் வெற்றிக்கு ஊடகங்களின் ஆதரவு முக்கியக் காரணம். இந்தப் படத்திற்கும் தொடர்ந்து ஆதரவு அளிக்க வேண்டும்” என்றார்.
‘பாரி’ கதாபாத்திரம் எனக்கு அடையாளம் தந்தது – நடிகர் சித்து!
நிகழ்ச்சியில் கதாநாயகன் சித்து பேசும்போது,
“‘தி டார்க் ஹெவன்’ திரைப்படம்தான் எனது வெற்றிப் பயணத்திற்கு முக்கியமான தொடக்கப் புள்ளியாக அமைந்தது. இயக்குநர் பாலாஜி அந்தப் படத்தின் மூலம் எனக்கு ஒரு நல்ல வாய்ப்பை வழங்கினார்.
அந்தப் படத்தின் வெற்றிக்குப் பிறகு நான் செல்லும் இடங்களில் எல்லாம் படத்தில் நடித்த பாரி கதாபாத்திரத்தின் பெயரைச் சொல்லி என்னை அழைக்கிறார்கள். அதற்கு முன்பு எனது தொலைக்காட்சிப் பங்களிப்பைப் பற்றித்தான் பலரும் பேசுவார்கள். இப்போது பாரி என்ற கதாபாத்திரம் எனக்கு ஒரு தனி அடையாளத்தைப் பெற்றுத் தந்துள்ளது.
அதேபோல் ‘தி லாஸ்ட் கேஸ்’ திரைப்படமும் வெற்றிப் படமாக அமையும் என்ற நம்பிக்கை இருக்கிறது” என்றார்.
முந்தைய படத்திலிருந்து மாறுபட்ட கதாபாத்திரம் – தர்ஷிகா!
கதாநாயகி தர்ஷிகா பேசுகையில்,
“‘தி டார்க் ஹெவன்’ படத்தின் முன்னோட்ட வெளியீட்டு விழாவில் கலந்து கொண்டது போல இருக்கிறது. அதற்குள் அந்தப் படம் வெளியாகி வெற்றி பெற்று, அடுத்த படத்தையும் தொடங்கியிருப்பது மிகுந்த மகிழ்ச்சியாக இருக்கிறது.
இந்தப் படமும் நன்றாக வரும் என்ற நம்பிக்கை உள்ளது. முந்தைய படத்தைவிட இதில் எனக்கு முற்றிலும் மாறுபட்ட, குறிப்பிடத்தக்க கதாபாத்திரம் அமைந்துள்ளது” என்றார்.
படக்குழுவினர் பங்கேற்பு!
இந்தத் தொடக்க விழாவில் குணச்சித்திர நடிகர் ஜெயக்குமார், தயாரிப்பாளர்கள் கோபால், சரண், இசையமைப்பாளர் சக்தி பாலாஜி மற்றும் படக்குழுவினர் கலந்து கொண்டனர்.
‘தி டார்க் ஹெவன்’ படத்தின் வெற்றியைத் தொடர்ந்து அதே கூட்டணியில் உருவாகும் ‘தி லாஸ்ட் கேஸ்’ திரைப்படம் ரசிகர்கள் மத்தியில் எதிர்பார்ப்பை ஏற்படுத்தியுள்ளது.