தீபாவளி பண்டிகையை முன்னிட்டு நவம்பர் 6 முதல் 10-ம் தேதி வரை சுங்கச்சாவடிகளில் கட்டணம் வசூலிப்பதை ரத்து செய்ய வேண்டும் என தமிழ்நாடு அரசுக்கு விசிக தலைவர் தொல். திருமாவளவன் கோரிக்கை விடுத்துள்ளார்.
தீபாவளி பயண நெரிசல் – பொதுமக்கள் அவதி
தீபாவளி பண்டிகையை முன்னிட்டு சென்னையிலிருந்து தென் மாவட்டங்கள், மேற்கு மாவட்டங்கள் மற்றும் டெல்டா மாவட்டங்களுக்கு இலட்சக்கணக்கான மக்கள் சொந்த ஊர்களுக்குப் பயணம் செய்வது வழக்கம்.
இந்த ஆண்டு தீபாவளி நவம்பர் 8-ம் தேதி கொண்டாடப்படுவதால், நவம்பர் 6, 7, 8, 9, 10 ஆகிய நாட்களில் நெடுஞ்சாலைகளில் வழக்கத்தை விட பல மடங்கு வாகன நெரிசல் ஏற்படும் என எதிர்பார்க்கப்படுகிறது.
சுங்கச்சாவடிகளில் வாகனங்கள் மணிக்கணக்கில் காத்திருப்பதே இந்த நெரிசலுக்கு முக்கிய காரணமாக உள்ளது. ஒவ்வொரு பண்டிகை காலத்திலும் தொடரும் இந்த நிலை காரணமாக குழந்தைகள், முதியவர்கள் மற்றும் நோயாளிகள் கடும் அவதிக்கு உள்ளாகின்றனர். மேலும், எரிபொருள் விரயமும் காற்று மாசும் அதிகரிக்கின்றன.
தமிழ்நாடு அரசுக்கு திருமாவளவன் கோரிக்கை
மக்கள் நலன் கருதி தமிழ்நாடு அரசு பின்வரும் நடவடிக்கைகளை மேற்கொள்ள வேண்டும் என தொல். திருமாவளவன் வலியுறுத்தியுள்ளார்.
- தீபாவளி பயண நாட்களான நவம்பர் 6 முதல் நவம்பர் 10 வரை, சென்னையிலிருந்து வெளி மாவட்டங்களுக்குச் செல்லும் அனைத்து தேசிய மற்றும் மாநில நெடுஞ்சாலைகளிலும் உள்ள சுங்கச்சாவடிகளில் கட்டணம் வசூலிப்பதை ரத்து செய்ய வேண்டும்.
- தீபாவளி மற்றும் பொங்கல் பண்டிகைகளையொட்டி கட்டணம் ரத்து செய்யப்படும் நாட்களில் சுங்கச்சாவடித் தடுப்புகளை முழுமையாகத் திறந்து வைத்து, தடையில்லா போக்குவரத்துக்கு வழிவகை செய்ய வேண்டும்.
- பண்டிகை கால நெரிசலைக் கட்டுப்படுத்த கூடுதல் காவல்துறையினரைப் பணியில் ஈடுபடுத்த வேண்டும். அவசர மருத்துவ உதவி மையங்களை அமைப்பதுடன், நெடுஞ்சாலைகளில் கூடுதல் ஆம்புலன்சுகளையும் ஏற்பாடு செய்ய வேண்டும்.
மக்களின் பாதுகாப்பே முக்கியம்!
சுங்கக் கட்டணத்தை விட மக்களின் நேரமும், பாதுகாப்பும், நிம்மதியான பயணமுமே முக்கியம் என்பதை கருத்தில் கொண்டு, தீபாவளி பயண நாட்களில் சுங்கக் கட்டணத்தை ரத்து செய்ய தமிழ்நாடு அரசு நடவடிக்கை எடுக்க வேண்டும் என விசிக நிறுவனர்-தலைவர் தொல். திருமாவளவன் கேட்டுக்கொண்டுள்ளார்.