தமிழகத்தில் சிறுமிகள் காணாமல் போகும் சம்பவங்கள், சிறையிலிருந்து கைதிகள் தப்பிய விவகாரம், போதைப்பொருள் கடத்தல் வழக்கில் ஆளுங்கட்சியைச் சேர்ந்த நிர்வாகியின் பெயர் அடிபட்டது என அடுத்தடுத்து எழுந்துள்ள சட்டம்-ஒழுங்கு தொடர்பான சர்ச்சைகள் அரசியல் களத்தில் பரபரப்பை ஏற்படுத்தியுள்ளன.
இந்த விவகாரங்கள் குறித்து தமிழக வெற்றிக் கழகத்தின் (தவெக) முக்கியப் பிரமுகரும் முன்னாள் அமைச்சருமான வைகைச்செல்வன் விளக்கம் அளித்துள்ளார்.
போதைப்பொருள் கடத்தல் விவகாரம்: தவறு செய்தவர்கள் தப்ப முடியாது!
போதைப்பொருள் கடத்தல் வழக்கில் தவெக நிர்வாகி பூபாலன் கைது செய்யப்பட்ட விவகாரம் குறித்து எழுப்பப்பட்ட கேள்விகளுக்குப் பதிலளித்த வைகைச்செல்வன், தவறு செய்தவர்கள் யாராக இருந்தாலும் அவர்களுக்குக் கட்சி பாதுகாப்பு அளிக்காது எனத் தெரிவித்துள்ளார்.
கடந்த கால ஆட்சிகளைப் போல ஆளுங்கட்சியினர் தவறு செய்தால் அதை மூடி மறைக்கும் நடைமுறை தவெக அரசில் இல்லை என்றும், தவறு செய்த நபர் கட்சியிலிருந்து உடனடியாக நீக்கப்பட்டு சட்டத்தின் முன் நிறுத்தப்பட்டுள்ளதாகவும் அவர் கூறியுள்ளார்.
சிறுமிகள் மாயம்: சிபிசிஐடி விசாரணை தீவிரம்!
தமிழகத்தில் சிறுமிகள் மற்றும் குழந்தைகள் காணாமல் போகும் சம்பவங்கள் குறித்து எழுந்துள்ள கவலைகளுக்குப் பதிலளித்த அவர், இதுபோன்ற சம்பவங்களைத் தடுக்க அரசு தீவிரமான பாதுகாப்பு நடவடிக்கைகளை மேற்கொண்டு வருவதாகக் குறிப்பிட்டார்.
குறிப்பாக, செஞ்சி உள்ளிட்ட பகுதிகளில் சிறுமிகள் மாயமான சம்பவங்கள் சிபிசிஐடி விசாரணைக்கு மாற்றப்பட்டுள்ளதாகவும், அவர்களைத் தேடும் பணிகள் தீவிரப்படுத்தப்பட்டுள்ளதாகவும் தெரிவித்தார்.
மேலும், இத்தகைய குற்றங்களில் ஈடுபடுபவர்கள் மீது கடுமையான நடவடிக்கை எடுக்கப்படும் என்றும் உறுதியளித்தார்.
தேனி சிறையிலிருந்து கைதிகள் தப்பிப்பு: அதிகாரிகள் மீது நடவடிக்கை!
தேனி கிளைச் சிறையிலிருந்து கைதிகள் தப்பிச் சென்ற சம்பவம் குறித்துப் பேசிய வைகைச்செல்வன், இந்த விவகாரத்தில் அலட்சியமாகச் செயல்பட்ட சிறைத்துறை அதிகாரிகள் மற்றும் காவலர்கள் 9-க்கும் மேற்பட்டோர் பணியிடைநீக்கம் செய்யப்பட்டு, துறை ரீதியான நடவடிக்கைகள் மேற்கொள்ளப்பட்டுள்ளதாகத் தெரிவித்தார்.
போதைப்பொருட்களை முற்றிலும் ஒழிப்பதன் மூலமே குற்றச்சம்பவங்களைக் கட்டுப்படுத்த முடியும் என்ற நோக்கில் தவெக அரசு அதிரடி நடவடிக்கைகளை மேற்கொண்டு வருவதாகவும் அவர் கூறினார்.
சட்டம்-ஒழுங்கு விவகாரத்தில் எதிர்க்கட்சிகளும் ஊடகங்களும் தொடர்ந்து கேள்விகளை எழுப்பி வரும் நிலையில், தவெக அரசு வெளிப்படைத்தன்மையுடன் செயல்பட்டு சட்டத்தின் ஆட்சிக்கு முன்னுரிமை அளித்து வருவதாக வைகைச்செல்வன் விளக்கமளித்துள்ளார்.
40 ஆண்டுகளாக வீட்டுமனைப் பட்டா கேட்டு போராடிய மக்களுக்கு தீர்வு! – அமைச்சர் வன்னி அரசு தகவல்