‘சர்க்கார்’ திரைப்படத்தில் ஒரு வாக்கின் முக்கியத்துவத்தை வலியுறுத்தி நடித்த தமிழக முதல்வர் விஜய், தற்போது வாக்காளர் பட்டியல் சிறப்பு தீவிர திருத்தம் (SIR) தொடர்பாக எழுந்துள்ள 13 கோடி வாக்காளர் பெயர்கள் விவகாரத்தில் ஏன் மௌனம் காக்கிறார் என இந்திய கம்யூனிஸ்ட் கட்சியின் (சிபிஐ) மாநிலச் செயலாளர் மு. வீரபாண்டியன் கேள்வி எழுப்பியுள்ளார்.
சென்னையில் செய்தியாளர்களிடம் பேசிய அவர், ஒரு வாக்கின் மதிப்பை எடுத்துரைக்கும் வகையில் விஜய் நடித்த திரைப்படத்தை மீண்டும் பார்க்க வேண்டும் என்று கூறினார்.
‘சர்க்கார்’ படத்தை மீண்டும் பார்க்க வேண்டும்!
இதுகுறித்து வீரபாண்டியன் பேசுகையில், “சகோதரர் விஜய் ஒரு திரைப்படத்தில் ஒரே ஒரு வாக்குக்காகப் போராடியிருப்பார். அந்தப் படம் மிகவும் சிந்திக்க வைக்கும் வகையில் அமைந்திருந்தது. வாக்கு என்பது சாதாரணமானது அல்ல; அது நமது எதிர்காலத்தையும் நாட்டின் போக்கையும் தீர்மானிக்கும் உரிமை. எனவே, தமிழக முதல்வர் அந்தத் திரைப்படத்தை மீண்டும் ஒருமுறை பார்க்க வேண்டும் என்று அன்புடன் கேட்டுக்கொள்கிறேன்” என்றார்.
விஜய்யின் மௌனம் ஏன்? – வீரபாண்டியன் கேள்வி
தொடர்ந்து பேசிய அவர், “திரைப்படத்தில் ஒரு வாக்கின் முக்கியத்துவத்திற்காகக் குரல் கொடுத்தவர், தற்போது 13 கோடி வாக்காளர் பெயர்கள் தொடர்பாக எழுந்துள்ள விவகாரத்தில் ஏன் ஒரு வார்த்தைகூடப் பேசவில்லை? இந்த விவகாரம் குறித்து தனது கண்டனத்தை ஏன் தெரிவிக்கவில்லை?” என்று கேள்வி எழுப்பினார்.
மேலும், “தமிழகத்தில் ஒரு கோடியே 70 லட்சம் மக்கள் விஜய்க்கு வாக்களித்துள்ளனர். அவர்களது வாக்குகளை நாங்கள் மதிக்கிறோம். அவர் அரசியலுக்கு அண்மையில் வந்திருக்கலாம். ஆனால், அவருக்கு வாக்களித்தவர்கள் இந்த நாட்டின் மக்கள்தான். வாக்குரிமை தொடர்பான பிரச்சினையில் அவர் தனது நிலைப்பாட்டைத் தெளிவுபடுத்த வேண்டும்” என்றும் வலியுறுத்தினார்.
13 கோடி என்ற எண்ணிக்கை குறித்து தேர்தல் ஆணையத்தின் விளக்கம்
இதற்கிடையே, SIR நடவடிக்கையில் 13 கோடிக்கும் அதிகமான வாக்காளர் பெயர்கள் நீக்கப்பட்டதாக அரசியல் கட்சிகள் குற்றம்சாட்டி வருகின்றன. ஆனால், தேர்தல் ஆணையம் வெளியிட்ட விளக்கத்தின்படி, இந்த எண்ணிக்கை இறுதியாக நீக்கப்பட்ட வாக்காளர்களின் எண்ணிக்கை அல்ல. மாறாக, வரைவுப் பட்டியல் தயாரிப்பின்போது ‘இல்லாதவர்கள், நிரந்தரமாக இடம்பெயர்ந்தவர்கள், உயிரிழந்தவர்கள், ஒன்றுக்கு மேற்பட்ட இடங்களில் பெயர் இடம்பெற்றவர்கள்’ உள்ளிட்ட பிரிவுகளில் வகைப்படுத்தப்பட்ட பதிவுகளின் மொத்த எண்ணிக்கையாகும்.
இந்த வகைப்பாட்டில் இடம்பெற்ற தகுதியுள்ள வாக்காளர்கள், தங்களது பெயர்களை மீண்டும் சேர்க்க உரிய விண்ணப்பங்கள் மற்றும் ஆட்சேபனை நடைமுறைகளைப் பயன்படுத்தலாம் என்றும் தேர்தல் ஆணையம் தெரிவித்துள்ளது.
இந்நிலையில், SIR நடவடிக்கையில் வாக்காளர் உரிமைகள் பாதிக்கப்படுவதாக எதிர்க்கட்சிகள் தொடர்ந்து விமர்சித்து வருகின்றன. இந்த விவகாரத்தில் தமிழக முதல்வர் விஜய் தனது நிலைப்பாட்டை வெளிப்படையாகத் தெரிவிக்க வேண்டும் என்பதே வீரபாண்டியனின் கோரிக்கையாக உள்ளது.