ஹோர்முஸ் ஜலசந்தி பகுதியில் இரண்டு சரக்குக் கப்பல்கள் மாயமான சம்பவத்தில், திண்டுக்கல்லைச் சேர்ந்த இளம் மாலுமி நவீன்குமார் குறித்தும் ஆறு மாதங்களுக்கும் மேலாக எந்தத் தகவலும் கிடைக்கவில்லை. மகன் உயிருடன் இருக்கிறாரா, இல்லையா என்பதுகூடத் தெரியாமல் அவரது பெற்றோர் தவித்து வருகின்றனர். ஒருபுறம் மகனின் நிலை குறித்த கவலை, மறுபுறம் அவரைப் படிக்க வைப்பதற்காக வாங்கிய கடனைத் திருப்பிச் செலுத்த வேண்டிய நெருக்கடி என குடும்பத்தினர் பெரும் துயரத்தில் உள்ளனர்.
கடன் வாங்கி மகனைப் படிக்க வைத்த பெற்றோர்
திண்டுக்கல் அருகே குடைபாறை பகுதியைச் சேர்ந்தவர் வடிவேல். இவரது மனைவி பாண்டிச்செல்வி. இருவரும் கூலி வேலை செய்து குடும்பத்தை நடத்தி வருகின்றனர். இவர்களது இரண்டாவது மகன் நவீன்குமார், சென்னையில் ஜி.பி. டிரேடிங் மரைன் படிப்பை முடித்துள்ளார்.
மகனின் படிப்புச் செலவுக்காக வடிவேல் தனியார் நிதி நிறுவனங்களிடம் இருந்து சுமார் ரூ.15 லட்சம் கடன் வாங்கியுள்ளார். மகன் படித்து முடித்து நல்ல வேலைக்குச் சென்று குடும்பத்தின் வறுமையைப் போக்குவார் என்ற நம்பிக்கையில் அவரைப் படிக்க வைத்துள்ளார்.
துபாய் கப்பல் நிறுவனத்தில் முதல் வேலை
படிப்பை முடித்த நவீன்குமார், கல்லூரிப் பேராசிரியரின் உதவியுடன் மும்பையைச் சேர்ந்த தனியார் ஏஜென்ட் மூலம் துபாயில் உள்ள தனியார் கப்பல் நிறுவனத்தில் வேலைக்குச் சேர்ந்துள்ளார்.
முதல் முறையாகக் கப்பல் பணிக்குச் சென்ற அவருக்கு, ஆறு மாதங்கள் கப்பலில் வேலை பார்த்துவிட்டு மீண்டும் வீட்டுக்குத் திரும்பலாம் என்று தெரிவிக்கப்பட்டதாகக் கூறப்படுகிறது.
ஆனால், பணியில் சேர்ந்த ஒரு மாதத்திலேயே அவர் ஈரானுக்கு மாற்றப்பட்டு சரக்குக் கப்பலில் பணியமர்த்தப்பட்டுள்ளார். அவருடன் இரண்டு இந்தியர்கள், மூன்று ஈராக்கியர்கள் மற்றும் ஒரு பாகிஸ்தானியர் என மொத்தம் ஆறு மாலுமிகள் பணியாற்றி வந்ததாகக் குடும்பத்தினர் தெரிவிக்கின்றனர்.
ஹோர்முஸ் ஜலசந்தியில் மாயமான ‘பிரிட்ஜ் 1’, ‘பிரிட்ஜ் 2’ கப்பல்கள்
ஈரான் போர் பதற்றம் மற்றும் ஹோர்முஸ் ஜலசந்தி பகுதியில் வணிகக் கப்பல்கள் மீதான தாக்குதல்கள் குறித்த செய்திகள் வெளியாகி வந்த சூழலில், பொலிவியா நாட்டின் கொடியுடன் எஃகு ஏற்றிச் சென்ற ‘பிரிட்ஜ் 1’ மற்றும் ‘பிரிட்ஜ் 2’ ஆகிய இரண்டு சரக்குக் கப்பல்கள் கடந்த மே 9-ஆம் தேதி ஈரானின் கிஷ் தீவு அருகே மாயமானதாகக் கூறப்படுகிறது.
இந்த இரண்டு கப்பல்களும் ரேடார் தொடர்பில் இருந்து துண்டிக்கப்பட்டதாகவும், அவற்றிலிருந்து அவசர உதவிக்கான ‘டிஸ்ட்ரஸ்’ அழைப்புகள் எதுவும் வரவில்லை என்றும் தெரிவிக்கப்பட்டுள்ளது.
இந்தக் கப்பல்களில் பணியாற்றியதாகக் கூறப்படும் நவீன்குமார் குறித்துத் தகவல் கிடைக்காததால், அவரது குடும்பத்தினர் ஆறு மாதங்களுக்கும் மேலாகத் தவித்து வருகின்றனர்.
பொறுப்பைத் தட்டிக்கழிக்கும் நிறுவனங்கள்?
நவீன்குமாரை வேலைக்கு அனுப்பிய மும்பையைச் சேர்ந்த தனியார் ஏஜென்சியைத் தொடர்புகொண்டபோது, தங்களுக்கு எந்தத் தகவலும் தெரியாது என்று கூறிவிட்டதாகப் பெற்றோர் தெரிவிக்கின்றனர்.
துபாயில் உள்ள கப்பல் நிறுவனத்தைத் தொடர்புகொண்டாலும் உரிய பதில் கிடைக்கவில்லை எனக் கூறப்படுகிறது. இதனால் மகனின் நிலை குறித்து எந்தத் தெளிவான தகவலையும் பெற முடியாமல் பெற்றோர் பரிதவித்து வருகின்றனர்.
உடல்நலப் பாதிப்பு; கடன் கொடுத்தவர்களின் நெருக்கடி
மகன் உயிருடன் இருக்கிறாரா, இல்லையா என்பதுகூடத் தெரியாத நிலையில் வடிவேலும் பாண்டிச்செல்வியும் கடும் மன உளைச்சலுக்கு ஆளாகியுள்ளனர். இதன் காரணமாக இருவரது உடல்நிலையும் பாதிக்கப்பட்டுள்ளதாகக் கூறப்படுகிறது. வடிவேல் தற்போது படுத்த படுக்கையாகிவிட்டதாகக் குடும்பத்தினர் வேதனையுடன் தெரிவிக்கின்றனர்.
மறுபுறம், மகனின் படிப்புக்காக வாங்கிய ரூ.15 லட்சம் கடனைத் திருப்பிச் செலுத்துமாறு நிதி நிறுவனங்கள் நெருக்கடி கொடுத்து வருவதாகவும் அவர்கள் கூறுகின்றனர். மகனின் நிலை தெரியாத துயரத்துடன் கடன் சுமையையும் எதிர்கொள்ள முடியாமல் குடும்பம் தவித்து வருகிறது.
மாவட்ட ஆட்சியர், முதலமைச்சரிடம் மனு – நடவடிக்கை எடுக்கக் கோரிக்கை
இந்த விவகாரம் தொடர்பாக திண்டுக்கல் மாவட்ட ஆட்சியர் அலுவலகத்திலும், முதலமைச்சரின் தனிப்பிரிவிலும் புகார் அளித்து பல மாதங்கள் ஆகியும் இதுவரை உரிய நடவடிக்கை எடுக்கப்படவில்லை என்று பெற்றோர் குற்றம்சாட்டுகின்றனர்.
எனவே, மத்திய மற்றும் மாநில அரசுகள் உடனடியாகத் தலையிட்டு, இந்தியத் தூதரகங்கள் மற்றும் சம்பந்தப்பட்ட நாடுகளின் அதிகாரிகள் மூலம் விசாரணை நடத்த வேண்டும் என்றும், நவீன்குமாரின் தற்போதைய நிலையை உறுதிப்படுத்தி அவரைப் பாதுகாப்பாக மீட்டுத் தர நடவடிக்கை எடுக்க வேண்டும் என்றும் கண்ணீருடன் கோரிக்கை விடுத்துள்ளனர்.
ஆறு மாதங்களுக்கும் மேலாக மகனின் குரலைக் கேட்க முடியாமல் தவிக்கும் பெற்றோரின் இந்தக் கோரிக்கைக்கு மத்திய, மாநில அரசுகள் விரைந்து நடவடிக்கை எடுக்குமா என்ற எதிர்பார்ப்பு எழுந்துள்ளது.
நியூயார்க்கில் மூன்று மாடி கட்டிடம் இடிந்து விழுந்து 2 பேர் பலி – 17 பேர் காயம்!