உலகின் முன்னணி செயற்கை நுண்ணறிவு (AI) சிப் தயாரிப்பு நிறுவனமான என்விடியா (Nvidia) நிறுவனத்தின் பங்குகள் கடுமையாகச் சரிந்துள்ளதால், இந்தியாவில் பணியாற்றும் அதன் ஊழியர்களுக்கு சுமார் ரூ.5,000 கோடி அளவுக்கு காகித மதிப்பு இழப்பு ஏற்பட்டுள்ளதாகத் தகவல் வெளியாகியுள்ளது.
அமெரிக்கப் பங்குச்சந்தையில் என்விடியா நிறுவனத்தின் பங்குகள் சரிந்ததற்கு, உலகளாவிய AI பங்குகளின் விற்பனை அழுத்தம் மற்றும் நிறுவனத்தின் தலைமைச் செயல் அதிகாரி ஜென்சன் ஹுவாங் தொடர்பான சர்ச்சைகள் முக்கியக் காரணங்களாகக் கூறப்படுகின்றன.
6 வாரங்களில் 5,000 கோடி ரூபாய் மதிப்பு சரிவு!
என்விடியாவின் இந்தியப் பிரிவான Nvidia Graphics Pvt Ltd நிறுவனத்தில் பணியாற்றும் ஊழியர்களுக்கு வழங்கப்பட்டுள்ள பங்குச் சலுகைகள் தொடர்பான கணக்கீட்டின்படி, கடந்த மார்ச் 31-ம் தேதி நிலவரப்படி சுமார் 70.5 லட்சம் வழங்கப்படாத கட்டுப்படுத்தப்பட்ட பங்கு அலகுகள் (RSUs) இருந்துள்ளன.
அக்டோபர் 6-ம் தேதி என்விடியா பங்கு விலை 244 டாலராக உயர்ந்தபோது, இந்தப் பங்குகளின் மதிப்பு சுமார் 1.73 பில்லியன் டாலராக இருந்தது.
ஆனால், நவம்பர் 11-ம் தேதி வர்த்தகத்துக்குப் பிந்தைய நிலையில் பங்கு விலை சுமார் 158.85 டாலராகக் குறைந்ததால், இந்தப் பங்குகளின் மதிப்பு 1.11 பில்லியன் டாலராகச் சரிந்தது.
இதன் மூலம் சுமார் 600 மில்லியன் டாலர் அளவுக்கு, அதாவது இந்திய மதிப்பில் ரூ.5,000 கோடிக்கும் அதிகமான காகித மதிப்பு இழப்பு ஏற்பட்டுள்ளதாகக் கணக்கிடப்பட்டுள்ளது.
RSU என்றால் என்ன? ஊழியர்களுக்கு எப்படி பாதிப்பு?
நிறுவனங்கள் தங்களது ஊழியர்களுக்கு சம்பளத்துடன் கூடுதலாக வழங்கும் பங்குச் சலுகைகளில் ஒன்றுதான் RSU (Restricted Stock Units).
இந்தப் பங்குகள் ஒரே நேரத்தில் ஊழியர்களுக்குக் கிடைக்காது. பொதுவாக நான்கு ஆண்டுகளில் படிப்படியாக வழங்கப்படும் வகையில் என்விடியா நிறுவனம் திட்டமிட்டுள்ளது.
முதல் ஆண்டில் 25 சதவீதமும், அதன்பிறகு ஒவ்வொரு காலாண்டிலும் 6.25 சதவீதமும் ஊழியர்களுக்கு வழங்கப்படும்.
எனவே, பங்கு விலை உயரும்போது ஊழியர்களின் பங்குச் சலுகைகளின் மதிப்பும் அதிகரிக்கும். அதேபோல் பங்கு விலை சரியும்போது அவற்றின் மதிப்பும் குறையும்.
பங்கு விலை சரிவுக்கு என்ன காரணம்?
செயற்கை நுண்ணறிவுத் தொழில்நுட்பத்தில் மேற்கொள்ளப்படும் மிகப்பெரிய முதலீடுகளால் எதிர்பார்க்கப்படும் வருவாய் கிடைக்குமா என்ற சந்தேகம் முதலீட்டாளர்கள் மத்தியில் எழுந்துள்ளது.
இதனால் அக்டோபர் மாதம் முதலே அமெரிக்க தொழில்நுட்பப் பங்குகளில் விற்பனை அழுத்தம் ஏற்பட்டது.
இதற்கிடையே, என்விடியா நிறுவனத்தின் தலைமைச் செயல் அதிகாரி ஜென்சன் ஹுவாங் தொடர்பான தனிப்பட்ட சர்ச்சைகள் மற்றும் சீன உளவு அமைப்புகளுடன் தொடர்புடையதாகக் கூறப்படும் குற்றச்சாட்டுகள் நிறுவனத்தின் மீதான முதலீட்டாளர்களின் நம்பிக்கையையும் பாதித்ததாகச் செய்திகள் தெரிவிக்கின்றன.
இந்தக் குற்றச்சாட்டுகள் உறுதிப்படுத்தப்படாத நிலையில், நிறுவனத்தின் எதிர்காலத் தலைமை குறித்த நிச்சயமற்ற தன்மையும் பங்கு விலை சரிவுக்கு அழுத்தம் ஏற்படுத்தியுள்ளது.
5,590 இந்திய ஊழியர்கள் – அனைவருக்கும் பாதிப்பா?
கடந்த மார்ச் மாத இறுதியில் என்விடியாவின் இந்தியப் பிரிவில் மொத்தம் 5,590 ஊழியர்கள் பணியாற்றியுள்ளனர்.
இருப்பினும், இவர்களில் எத்தனை பேருக்கு RSU பங்குச் சலுகைகள் வழங்கப்பட்டுள்ளன என்பது தனியாக உறுதிப்படுத்தப்படவில்லை.
மேலும், இந்த ரூ.5,000 கோடிக்கும் அதிகமான இழப்பு என்பது பங்குகளின் சந்தை மதிப்பில் ஏற்பட்ட சரிவையே குறிக்கிறது. ஊழியர்கள் அனைவரும் அந்தத் தொகையை நேரடியாக இழந்துவிட்டார்கள் என்று அர்த்தமல்ல.
இதற்கிடையே, 2018 முதல் 2026 வரையிலான காலகட்டத்தில் என்விடியாவின் இந்திய ஊழியர்கள் சுமார் 3.1 பில்லியன் டாலர் மதிப்பிலான பங்குகளைப் பெற்றுள்ளதாகவும் தகவல்கள் தெரிவிக்கின்றன.
என்விடியா பங்குகளின் அடுத்தகட்ட நகர்வு மற்றும் நிறுவனத்தின் வருவாய் அறிவிப்பு ஆகியவை ஊழியர்களின் பங்குச் சலுகைகளின் மதிப்பில் தாக்கத்தை ஏற்படுத்தும் என எதிர்பார்க்கப்படுகிறது.
ரகசிய உறவு, சீன உளவு சர்ச்சை எதிரொலி: என்விடியா சிஇஓ ஜென்சன் ஹுவாங் திடீர் ராஜினாமா!