மைக்ரோசாப்ட் நிறுவனத்தின் அவுட்லுக் (Outlook), டீம்ஸ் (Teams), கோபைலட் (Copilot) உள்ளிட்ட சேவைகளில் ஏற்பட்ட தொழில்நுட்பக் கோளாறு சுமார் 36 மணி நேரத்திற்குப் பிறகு சரிசெய்யப்பட்டுள்ளது. இதனால் உலகம் முழுவதும் 74 நாடுகளில் உள்ள வணிக நிறுவனங்கள் மற்றும் அரசு அலுவலகங்களின் தகவல் தொடர்பு பாதிக்கப்பட்டது.
36 மணி நேரத்துக்குப் பிறகு சீரான சேவை
மைக்ரோசாப்ட் நிறுவனத்தின் முக்கியமான தகவல் தொடர்பு மற்றும் செயற்கை நுண்ணறிவு சேவைகள் திடீரென செயலிழந்ததால், ஏராளமான பயனர்கள் பாதிக்கப்பட்டனர். குறிப்பாக, அலுவலகப் பணிகள், மின்னஞ்சல் பரிமாற்றம், ஆன்லைன் கூட்டங்கள் உள்ளிட்ட செயல்பாடுகளில் சிக்கல்கள் ஏற்பட்டன.
இந்நிலையில், தொழில்நுட்பக் கோளாறுக்கான காரணத்தைக் கண்டறிந்து சரிசெய்துள்ளதாகவும், பாதிக்கப்பட்ட சேவைகள் மீண்டும் சீராகச் செயல்படுவதாகவும் மைக்ரோசாப்ட் நிறுவனம் தெரிவித்துள்ளது.
சைபர் தாக்குதல் காரணமா?
இந்தச் செயலிழப்பு சைபர் தாக்குதலால் ஏற்பட்டதா அல்லது செயற்கை நுண்ணறிவு ஏஜென்ட்களின் செயல்பாட்டில் ஏற்பட்ட பிரச்சினையா என்ற கேள்விகள் எழுந்தன.
ஆனால், இந்தப் பாதிப்புக்கு சைபர் தாக்குதலோ அல்லது ஏஐ ஏஜென்ட்களோ காரணம் இல்லை என்றும், தொழில்நுட்பக் கோளாறே இதற்குக் காரணம் என்றும் மைக்ரோசாப்ட் நிறுவனம் விளக்கம் அளித்துள்ளது.
இந்தியாவிலும் பாதிப்பு
இந்தியாவிலும் மைக்ரோசாப்ட் சேவை முடக்கத்தால் பல்வேறு நிறுவனங்களின் செயல்பாடுகள் பாதிக்கப்பட்டன. குறிப்பாக, இண்டிகோ மற்றும் அகாசா ஏர் விமான நிறுவனங்களின் மின்னஞ்சல் சேவைகளிலும் பாதிப்பு ஏற்பட்டதாகத் தெரிவிக்கப்பட்டுள்ளது.
உலகம் முழுவதும் பயனர்களுக்கு ஏற்பட்ட இந்த இடையூறுக்கு மைக்ரோசாப்ட் நிறுவனம் வருத்தம் தெரிவித்துள்ளது. தற்போது சேவைகள் மீண்டும் சீரடைந்துள்ளதால் பயனர்கள் நிம்மதி அடைந்துள்ளனர்.
ஜென்சென் ஹுவாங் மீதான விசாரணை எதிரொலி: என்விடியாவை முந்திய மைக்ரோசாப்ட் – முதலிடத்தில் ஆப்பிள்!