ஸ்காட்லாந்து நாட்டின் சதுப்பு நிலத்தில் சுமார் 200 ஆண்டுகளுக்கு முன்பு கண்டெடுக்கப்பட்ட மர்மமான வெண்கலக் கால் குறித்த புதிய வரலாற்றுத் தகவல்கள் வெளியாகியுள்ளன.
இந்த வெண்கலப் பகுதி, சுமார் 1,800 ஆண்டுகளுக்கு முன்பு ரோமானியப் பேரரசர் அன்டோனினஸ் பியஸை குதிரை மீது அமர்ந்த நிலையில் சித்தரிக்கும் பிரம்மாண்டமான தங்க முலாம் பூசப்பட்ட சிலையின் ஒரு பகுதியாக இருந்திருக்கலாம் எனத் தொல்லியல் ஆய்வாளர்கள் தெரிவித்துள்ளனர்.
1820-ல் கிடைத்த அரிய பொக்கிஷம்:
ஸ்காட்லாந்தின் ஹாவிக் நகருக்கு அருகிலுள்ள மில்சிங்டன் என்ற பகுதியில் கடந்த 1820-ம் ஆண்டு சதுப்பு நிலத்தில் இந்த வெண்கலக் கால் கண்டெடுக்கப்பட்டது.
பெரிய மனித உருவச் சிலையின் வலது காலின் கீழ்ப்பகுதியையும், காலணியுடன் கூடிய பாதத்தையும் கொண்ட இந்தப் பொருள் வழக்கமான அளவைவிட மிகப் பெரியதாக இருந்தது. மேலும், அதன் மேற்பரப்பில் தங்க முலாம் பூசப்பட்டிருந்தது ஆய்வாளர்களின் கவனத்தை ஈர்த்தது.
சுமார் கி.பி. 140-களில் உருவாக்கப்பட்டதாகக் கருதப்படும் இந்தப் பொருள், ஸ்காட்லாந்தில் இதுவரை கண்டெடுக்கப்பட்ட ரோமானியப் பேரரசரின் பிரம்மாண்டச் சிலை தொடர்பான ஒரே அறியப்பட்ட எச்சமாகக் கருதப்படுகிறது.
யாருடைய சிலை?
இந்த வெண்கலக் கால் கண்டுபிடிக்கப்பட்ட காலம் முதல், இது இங்கிலாந்தின் யார்க் பகுதியில் இருந்த ரோமானியச் சிலையிலிருந்து கொள்ளையடிக்கப்பட்டு ஸ்காட்லாந்துக்குக் கொண்டு வரப்பட்டிருக்கலாம் என்று வரலாற்று ஆய்வாளர்கள் கருதி வந்தனர்.
ஆனால், தற்போது மேற்கொள்ளப்பட்ட புதிய ஆய்வுகள் இந்தக் கருத்தை மாற்றியுள்ளன.
இந்தப் பகுதி, குதிரை மீது அமர்ந்திருக்கும் ரோமானியப் பேரரசர் அன்டோனினஸ் பியஸின் பிரம்மாண்டமான சிலையைச் சேர்ந்ததாக இருக்கலாம் என தேசிய ஸ்காட்லாந்து அருங்காட்சியக ஆய்வாளர்கள் தெரிவித்துள்ளனர்.
ரோமில் உள்ள மார்கஸ் ஆரேலியஸ் குதிரைச் சிலையைப் போன்ற வடிவத்தில் இந்தச் சிலை அமைந்திருக்கலாம் எனவும் கணிக்கப்பட்டுள்ளது.
ரோமானியர்கள் திட்டமிட்டு புதைத்தனரா?:
சுமார் கி.பி. 161-ம் ஆண்டுக்குப் பிறகு ரோமானியப் படைகள் ஸ்காட்லாந்தின் தெற்குப் பகுதிகளில் இருந்து பின்வாங்கியபோது, தங்களது பேரரசரின் சிலையை அவர்களே கவனமாகப் பிரித்து அகற்றியிருக்கலாம் என ஆய்வாளர்கள் கருதுகின்றனர்.
இந்த வெண்கலக் காலின் மேற்பகுதியில் வெட்டப்பட்டதற்கான அடையாளங்கள் இல்லாதது இந்தக் கருத்துக்கு முக்கிய ஆதாரமாகக் கூறப்படுகிறது.
எனவே, உள்ளூர் மக்கள் சிலையை உடைத்துக் கொள்ளையடித்திருக்கலாம் என்ற பழைய கருத்துக்குப் பதிலாக, ரோமானியப் படைகளே சிலையைத் திட்டமிட்டு அகற்றி புதைத்திருக்கலாம் என்ற புதிய விளக்கம் முன்வைக்கப்பட்டுள்ளது.
இருப்பினும், சிலையின் மற்ற பாகங்கள் எங்கு சென்றன என்பது இன்னும் மர்மமாகவே உள்ளது.
அருங்காட்சியகத்தில் பிரம்மாண்ட மறுவடிவம்:
இந்த அரிய கண்டுபிடிப்பை மையமாகக் கொண்டு, எடின்பர்க் நகரில் உள்ள தேசிய ஸ்காட்லாந்து அருங்காட்சியகத்தில் ‘Roman Scotland: Life on the Edge of Empire’ என்ற பெயரில் புதிய கண்காட்சி தொடங்கப்பட்டுள்ளது.
இதில் கண்டெடுக்கப்பட்ட உண்மையான வெண்கலக் காலுடன், அந்தப் பிரம்மாண்டச் சிலை எப்படி இருந்திருக்கும் என்பதைக் காட்டும் மறுவடிவமும் காட்சிப்படுத்தப்பட்டுள்ளது.
சுமார் இரண்டு நூற்றாண்டுகளாகத் தீர்க்கப்படாமல் இருந்த இந்த மர்மம், தற்போது ரோமானியப் பேரரசின் ஸ்காட்லாந்து வரலாறு குறித்த புதிய புரிதலுக்கு வழிவகுத்துள்ளது.