தென்கிழக்கு வங்கக்கடல் மற்றும் அதனை ஒட்டிய தென்மேற்கு வங்கக்கடல் பகுதிகளில் நிலவி வந்த ஆழ்ந்த காற்றழுத்தத் தாழ்வுப் பகுதி, தற்போது காற்றழுத்தத் தாழ்வு மண்டலமாக வலுப்பெற்றுள்ளது. இது அடுத்தடுத்த நாட்களில் புயலாகவும், தீவிரப் புயலாகவும் வலுப்பெற வாய்ப்புள்ளதாக வானிலை ஆய்வு மையம் தெரிவித்துள்ளது.
காற்றழுத்தத் தாழ்வு மண்டலம் எங்கு நிலை கொண்டுள்ளது?
நவம்பர் 15ஆம் தேதி காலை 5.30 மணி நிலவரப்படி, இந்தக் காற்றழுத்தத் தாழ்வு மண்டலம் தென்கிழக்கு மற்றும் அதனை ஒட்டிய தென்மேற்கு வங்கக்கடல் பகுதிகளில் மையம் கொண்டுள்ளது.
இது நிலநடுக்கோட்டிலிருந்து 9.0 டிகிரி வடக்கு அட்சரேகையிலும், 86.9 டிகிரி கிழக்கு தீர்க்கரேகையிலும் நிலை கொண்டுள்ளது.
மேலும், அந்தமான் தீவுகளின் போர்ட் பிளேர் பகுதியில் இருந்து சுமார் 700 கி.மீ. மேற்கு-தென்மேற்கிலும், சென்னையில் இருந்து சுமார் 860 கி.மீ. கிழக்கு-தென்கிழக்கிலும் நிலை கொண்டுள்ளது.
அதேபோல், ஆந்திரப் பிரதேசத்தின் விசாகப்பட்டினத்தில் இருந்து 1,040 கி.மீ. தெற்கு-தென்கிழக்கிலும், ஒடிசாவின் கோபால்பூரில் இருந்து 1,160 கி.மீ. தெற்கு-தென்கிழக்கிலும் அமைந்துள்ளது.
நவம்பர் 16-ல் புயலாக வலுப்பெறும்!
இந்தக் காற்றழுத்தத் தாழ்வு மண்டலம் தொடர்ந்து வடக்கு-வடமேற்கு திசையில் நகரும் என எதிர்பார்க்கப்படுகிறது.
இதன் காரணமாக நவம்பர் 16ஆம் தேதி தெற்கு மற்றும் அதனை ஒட்டிய மத்திய மேற்கு வங்கக்கடலின் மத்திய பகுதிகளில் புயலாக வலுப்பெற அதிக வாய்ப்புள்ளது.
நவம்பர் 17-ல் தீவிரப் புயலாக மாற வாய்ப்பு!
தொடர்ந்து நகர்ந்து வரும் இந்த வானிலை அமைப்பு நவம்பர் 17ஆம் தேதி மத்திய மேற்கு வங்கக்கடல் பகுதியில் தீவிரப் புயலாக வலுப்பெற அதிக வாய்ப்புள்ளதாக வானிலை ஆய்வு மையம் தெரிவித்துள்ளது.
வங்கக்கடலில் உருவாகியுள்ள இந்தப் புதிய காற்றழுத்தத் தாழ்வு மண்டலம் புயலாக வலுப்பெற உள்ளதால், அடுத்தடுத்த நாட்களில் வானிலையில் ஏற்படும் மாற்றங்கள் மற்றும் அதிகாரப்பூர்வ வானிலை அறிவிப்புகளைப் பொதுமக்கள் தொடர்ந்து கவனிக்க வேண்டியது அவசியமாகும்.
வங்கக்கடலில் உருவாகும் ‘அக்வான்’ புயல்? நவம்பர் 15 முதல் தமிழகத்தில் கனமழை எச்சரிக்கை!