கொரோனா ஊரடங்குக் காலத்தில் பல தொழில்களும் வணிக நிறுவனங்களும் முடங்கிப் போனபோது, அந்த நெருக்கடி நிலையையே தனக்கான மிகப்பெரிய வாய்ப்பாக மாற்றிக் காட்டியுள்ளார் ‘சிம்ரிதா என்டர்பிரைசஸ்’ (Simritha Enterprises) நிறுவனத்தின் உரிமையாளர் லட்சுமி. தொழில் முனைவோராகத் தனது 16 ஆண்டுகாலப் பயணத்தையும், சவால்களை எதிர்கொண்டு வெற்றி பெற்ற கதையையும் அவர் விரிவாகப் பகிர்ந்து கொண்டுள்ளார்.
ஹோட்டல்களில் இருந்து வீடுகளுக்கு: மாறிய வியாபாரப் பாதை
தொடக்கத்தில் நட்சத்திர ஹோட்டல்கள் மற்றும் ரெஸ்டாரண்டுகளுக்கு மட்டுமே (B2B) பிரீமியம் வகை உணவுப் பொருட்களை விநியோகம் செய்து வந்தவர் லட்சுமி. பெருந்தொற்றுக் காலத்தில் அமல்படுத்தப்பட்ட கடுமையான கட்டுப்பாடுகள் மற்றும் நேர வரம்புகளால் பாரம்பரியமான வணிக முறைகளில் தொய்வு ஏற்பட்டது.
ஆனால், சோர்வடைந்து முடங்கிப் போகாமல், “அடுத்தது என்ன?” என்ற தேடலையே தனது பலமாக மாற்றினார் அவர். “கோவிட் காலத்தில் வீடுகளிலேயே முடங்கியிருந்த பொதுமக்களுக்கு ஸ்நாக்ஸ் வகைகள் மற்றும் உணவுப் பொருட்கள் தேவைப்பட்டன. அந்த நேரத்தில்தான் நாங்கள் நேரடியாக நுகர்வோரைச் சென்றடையும் (B2C) சில்லறை வணிகத்தில் கால்பதித்தோம்” என்று அவர் கூறுகிறார்.
மக்களிடம் நெருக்கமான பிராண்ட்!
இந்தத் திடீர் மாற்றத்தின் மூலம் பிரஞ்சு பிரைஸ், மோமோஸ், நக்கட்ஸ் மற்றும் பல்வேறு வகையான சீஸ் வகைகள் போன்ற உணவுப் பொருட்கள் வீடுகளுக்கே நேரடியாகச் செல்லும் வசதியை ஏற்படுத்திக் கொடுத்தார். முன்பெல்லாம் ஹோட்டல்களுக்கு மட்டுமே பரிச்சயமாயிருந்த சிம்ரிதா நிறுவனம், இன்று ஆன்லைன் மற்றும் வாட்ஸ்அப் (WhatsApp) ஆர்டர்கள் மூலம் பொதுமக்கள் பலரையும் சென்றடைந்து முன்னணி பிராண்டாக உயர்ந்துள்ளது.
வெற்றிக்குப் பின்னால் உள்ள அர்ப்பணிப்பு
தனது இந்தச் சாதனைக் பயணம் குறித்துப் பேசுகையில், வணிக ரீதியான வெற்றிகளுக்கு அப்பால் தனக்குத் துணையாக நின்ற குடும்பத்தினரின் ஆதரவையும், இக்கட்டான சூழலிலும் நிறுவனத்தைக் கைவிடாமல் உழைத்த ஊழியர்களின் பங்களிப்பையும் நன்றியுடன் நினைவு கூர்ந்தார். மேலும், பெண் தொழில்முனைவோர்கள் தங்களது உடல்நலம் மற்றும் மன அழுத்தம் போன்ற விஷயங்களில் தயக்கமின்றித் தெளிவு பெற வேண்டும் என்பதை வலியுறுத்தி, கீர்த்திகா தரன் எழுதிய ‘மெனோபாஸ்’ புத்தகத்தை வாசிக்க பரிந்துரைத்தார்.
எல்லைகளைக் கடக்கும் இலக்கு
தற்போது சென்னை, பாண்டிச்சேரி மற்றும் தமிழகத்தின் பல்வேறு பகுதிகளில் வெற்றிகரமாக இயங்கி வரும் சிம்ரிதா என்டர்பிரைசஸ், எதிர்காலத்தில் அந்தமான் உள்ளிட்ட தொலைதூரப் பகுதிகளுக்கும், வெளிநாடுகளுக்கும் தனது ஏற்றுமதியை விரிவுபடுத்தும் திட்டத்துடன் பயணித்து வருகிறது.