உலகப் பிரசித்தி பெற்ற திருவண்ணாமலை திருக்கார்த்திகை தீபத் திருவிழா, வரும் நவம்பர் 15ஆம் தேதி அண்ணாமலையார் திருக்கோவிலில் கொடியேற்றத்துடன் கோலாகலமாகத் தொடங்கவுள்ளது.
இதையொட்டி, திருக்கோவில் நிர்வாகம் சார்பில் பல்வேறு முன்னேற்பாட்டுப் பணிகள் தீவிரமாக நடைபெற்று வருகின்றன.
நவம்பர் 24ஆம் தேதி பரணி தீபம், மகா தீபம்
திருவிழாவின் முக்கிய நிகழ்வான பரணி தீபம், நவம்பர் 24ஆம் தேதி அதிகாலை 4 மணிக்கு அண்ணாமலையார் திருக்கோவிலில் ஏற்றப்பட உள்ளது. தொடர்ந்து, அன்று மாலை 2,668 அடி உயரம் கொண்ட திருவண்ணாமலை தீப மலையின் மீது மகா தீபம் ஏற்றப்படவுள்ளது.
வாகனங்களைத் தூய்மைப்படுத்தும் பணிகள் தீவிரம்
திருக்கார்த்திகை தீபத் திருவிழாவை முன்னிட்டு, அண்ணாமலையார் திருக்கோவிலில் பல்வேறு ஏற்பாடுகள் மேற்கொள்ளப்பட்டு வருகின்றன.
குறிப்பாக, தினமும் காலை மற்றும் மாலை வேளைகளில் சுவாமி வீதி உலா நடைபெறும்போது பயன்படுத்தப்படும் பல்வேறு வாகனங்களைத் தூய்மைப்படுத்தும் பணியில் கோவில் ஊழியர்கள் ஈடுபட்டுள்ளனர்.
திருவிழாவுக்கான ஏற்பாடுகள் தொடர்ந்து நடைபெற்று வரும் நிலையில், கொடியேற்றம் முதல் மகா தீபம் ஏற்றப்படும் நாள் வரையிலான நிகழ்வுகளைச் சிறப்பாக நடத்துவதற்கான பணிகளில் கோவில் நிர்வாகம் கவனம் செலுத்தி வருகிறது.