
தொடர்ந்து உச்சத்திலிருந்த ஆபரணத் தங்கத்தின் விலை தற்போது சவரனுக்கு ரூ.1 லட்சத்திற்கும் கீழ் குறைந்துள்ளதால், இல்லத்தரசிகள் மற்றும் பொதுமக்கள் மிகுந்த மகிழ்ச்சியடைந்துள்ளனர். சென்னையில் ஆபரணத் தங்கத்தின் விலை இன்று (நவம்பர் 19) அதிரடியாகச் சவரனுக்கு ரூ.1,880 குறைந்து, ஒரு சவரன் ரூ.95,840-க்கு விற்பனை செய்யப்படுகிறது. கடந்த 2 வாரங்களில் மட்டும் ஆபரணத் தங்கத்தின் விலை சவரனுக்கு ரூ.11,240 வரை குறைந்துள்ளதாகச் சந்தை நிலவரங்கள் தெரிவிக்கின்றன.
இந்த விலை குறைவையொட்டி நகைகள் வாங்குவதற்காகத் தமிழகம் முழுவதும் உள்ள நகைக் கடைகளுக்குப் பொதுமக்கள் ஆர்வத்துடன் வரத் தொடங்கியுள்ளனர். தங்கத்தை சிறந்த சேமிப்பாக கருதும் மக்கள் விலை குறைவாக இருக்கும்போதே நகைகளை வாங்க வேண்டும் என நகைக்கடைகளில் குவிந்து வருகின்றனர்.
பொதுமக்கள் பகிர்ந்துகொண்ட முக்கியக் கருத்துகள்:
மிகுந்த மகிழ்ச்சி அளிக்கிறது: “தங்கத்தின் விலை குறைந்துள்ளதாக வெளியான செய்தியைக் கேட்டதும் மிகுந்த மகிழ்ச்சியாக உள்ளது. இனி வரும் நாட்களிலும் தங்கத்தின் விலை இன்னும் குறைய வாய்ப்புள்ளதாகக் கூறப்படுகிறது. இவ்வாறு தொடர்ந்து விலை குறைந்தால் எங்களுக்கு இரட்டிப்பு மகிழ்ச்சிதான்.”
வாய்ப்பைத் தவறவிடக் கூடாது: “வருங்காலங்களில் தங்கத்தின் விலை மேலும் குறையுமா அல்லது மீண்டும் உயர்ந்துவிடுமா என்பது உறுதியாகத் தெரியவில்லை. எனவே, கிடைத்திருக்கும் இந்தத் தற்போதைய விலை குறைவைப் பயன்படுத்தி இப்போதே தங்கம் வாங்கிவிடலாம் எனக் கடைக்கு வந்துள்ளோம்.”

சேமிப்பும் அவசரத் தேவையும்: “தங்கம் வாங்குவது எங்களது எதிர்காலச் சேமிப்பிற்காகத்தான். தங்கம் என்பது வெறும் ஆபரணமாகவும் சேமிப்பாகவும் மட்டுமின்றி, குடும்பத்தின் அவசரத் தேவைகளின்போதும் கைகொடுக்கக் கூடியது. அதனைக் கருத்தில் கொண்டே வாங்குகிறோம்.“
நடுத்தரக் குடும்பங்களுக்குச் சாதகமான சூழல்: “தங்கத்தின் விலை குறைந்துள்ளது என்ற செய்தியைக் கேட்டதுமே, சிறியதாக ஏதாவது ஒரு நகையாவது வாங்க வேண்டும் என்று தோன்றியது. தற்போதைய விலை குறைவு நடுத்தரக் குடும்பத்தினருக்குத் தங்கம் வாங்குவதற்கு ஓரளவுக்குச் சாதகமாக உள்ளது. இந்தச் சூழலைப் பயன்படுத்தி வாங்கிவிடலாம் என நினைக்கிறோம்.”
மொத்தத்தில், ரூ.1 லட்சத்தைக் கடந்து சாமானியர்களுக்கு எட்டாக்கனியாக மாறிவிடுமோ என்ற அச்சத்தை ஏற்படுத்தியிருந்த தங்கம் விலை தற்போது சற்று இறங்குமுகத்தில் இருப்பது, நடுத்தர வர்க்கத்தினர் மற்றும் திருமணத் தேவைக்காக நகை வாங்கக் காத்திருப்போர் மத்தியில் பெரும் நிம்மதியையும் உற்சாகத்தையும் ஏற்படுத்தியுள்ளது.

