உலகளாவிய பொருளாதார மாற்றங்கள் மற்றும் அமெரிக்காவின் வட்டி விகிதம் தொடர்பான நடவடிக்கைகள் காரணமாகத் தங்கத்தின் விலையில் ஏற்ற இறக்கங்கள் நிலவி வரும் நிலையில், எதிர்காலத்தில் தங்கத்தின் விலை மேலும் குறைய வாய்ப்புள்ளதாகப் பொருளாதார நிபுணர் ஆனந்த் சீனிவாசன் தெரிவித்துள்ளார்.
அதே நேரத்தில், சீனாவின் தொடர் தங்கக் கொள்முதல் சர்வதேசச் சந்தையில் முக்கியத் தாக்கத்தை ஏற்படுத்தி வருவதாகவும் அவர் சுட்டிக்காட்டியுள்ளார்.
தங்கம் விலை குறையக் காரணம் என்ன?
தங்கத்தின் தற்போதைய விலைப் போக்கு குறித்து விளக்கமளித்த அவர், அமெரிக்காவில் பணவீக்கத்தைக் கட்டுப்படுத்த அந்நாட்டு மத்திய வங்கி வட்டி விகிதத்தை உயர்த்தும் நடவடிக்கைகளை மேற்கொள்வதாகக் குறிப்பிட்டுள்ளார். வட்டி விகிதம் உயரும்போது அமெரிக்க டாலரின் மதிப்பு வலுப்பெறுவதுடன், சர்வதேசச் சந்தையில் தங்கத்தின் விலையிலும் சரிவு ஏற்பட வாய்ப்புள்ளதாக அவர் தெரிவித்துள்ளார்.
மேலும், வரும் மார்ச் மாதம் வரை அமெரிக்கா வட்டி விகிதத்தை உயர்த்த வாய்ப்புள்ளதால், அதுவரை தங்கத்தின் விலை இறங்குமுகத்தில் இருக்கக்கூடும் என்றும் அவர் கணித்துள்ளார்.
மேலும் 10 சதவீதம் வரை குறைய வாய்ப்பு
தற்போது ஒரு சவரன் ஆபரணத் தங்கத்தின் விலை ஒரு லட்சம் ரூபாய்க்கும் கீழ் குறைந்துள்ள நிலையில், மேலும் சுமார் 10 சதவீதம் வரை விலை சரியக்கூடும் என ஆனந்த் சீனிவாசன் தெரிவித்துள்ளார். இதன் மூலம் ஒரு சவரன் தங்கத்தின் விலை ரூ.90,000 வரை குறைய வாய்ப்புள்ளதாகவும் அவர் குறிப்பிட்டுள்ளார்.
சீனாவின் தங்கக் கொள்முதல் சந்தையில் ஏற்படுத்தும் தாக்கம்
தங்கத்தின் விலை குறையும் அதேவேளையில், சீனாவின் மத்திய வங்கி தொடர்ந்து அதிக அளவில் தங்கத்தைக் கொள்முதல் செய்து வருவதாக ஆனந்த் சீனிவாசன் சுட்டிக்காட்டியுள்ளார்.
சர்வதேசச் சந்தையில் தங்கத்தின் விலை குறையும்போதெல்லாம் சீனா பெருமளவில் தங்கத்தைக் கொள்முதல் செய்வதாகவும், இதனால் தங்கத்தின் விலை எந்த அளவுக்குக் கீழே செல்லும் என்பதைத் துல்லியமாகக் கணிப்பது கடினமாக இருப்பதாகவும் அவர் தெரிவித்துள்ளார்.
எனவே, நகை வாங்கத் திட்டமிட்டுள்ள பொதுமக்களும் முதலீட்டாளர்களும் தங்கத்தின் தற்போதைய விலை நிலவரம் மற்றும் சர்வதேசச் சந்தையின் போக்கைக் கவனித்து முடிவெடுக்க வேண்டும் எனப் பொருளாதார வல்லுநர்கள் அறிவுறுத்துகின்றனர்.
