‘கமல்ஹாசன் 237’ படத்தில் ஏற்பட்ட மாற்றம்…. விரைவில் வெளியாகும் அறிவிப்பு?

கமல்ஹாசனின் 237 வது படம் குறித்த லேட்டஸ்ட் தகவல் வெளியாகியுள்ளது.தனது சிறுவயதிலிருந்தே திரைத்துறையில் பணியாற்றி ஏகப்பட்ட விருதுகளை வென்று மிகப்பெரிய நடிப்பு ஜாம்பவானாக வலம் வருபவர் நடிகர் கமல்ஹாசன். இவரது நடிப்பில் கடைசியாக இந்தியன் 2 திரைப்படம் வெளியானது. மிகுந்த எதிர்பார்ப்புகளுடன் திரையிடப்பட்ட இப்படம் ரசிகர்கள் மத்தியில் கலவையான விமர்சனங்களை பெற்று வசூலிலும் சரிவை சந்தித்தது. இதைத்தொடர்ந்து கமல்ஹாசன், மணிரத்னம் இயக்கத்தில் தக் லைஃப் எனும் திரைப்படத்தில் நடித்து முடித்துள்ளார். இந்த படமானது 2025 ஜூன் மாதம் 5ஆம் தேதி திரைக்கு வர தயாராகி வருகிறது. இதற்கிடையில் கமல்ஹாசன், ஹெச். வினோத் இயக்கத்தில் புதிய படம் ஒன்றில் நடிக்கப் போவதாக அறிவிக்கப்பட்டது. ஆனால் அந்த படம் அடுத்த கட்டத்திற்கு நகராமல் கைவிடப்பட்டது. இந்நிலையில் தான் கடந்த சில மாதங்களுக்கு முன்னர் கமல்ஹாசனின் 237 வது படத்தை அன்பறிவ் மாஸ்டர்கள் இயக்கப் போகிறார்கள் என அறிவிக்கப்பட்டது. அதாவது தற்காலிகமாக KH 237 என்று தலைப்பு வைக்கப்பட்டிருக்கும் இந்த படத்தை கமல்ஹாசனின் ராஜ்கமல் பிலிம்ஸ் இன்டர்நேஷனல் நிறுவனம் தயாரிக்கிறது. முழுக்க முழுக்க ஆக்சன் கதைக்களத்தில் உருவாகும் இந்த படத்தின் மீதான எதிர்பார்ப்பு ஆரம்பத்திலிருந்து அதிகமாக இருந்து வரும் நிலையில் படப்பிடிப்புகள் இன்னும் சில நாட்களில் தொடங்கும் என எதிர்பார்க்கப்படுகிறது. இந்நிலையில் இந்த படத்தை கமல்ஹாசனுடன் இணைந்து லைக்கா நிறுவனமும் தயாரிக்கிறது எனவும், இந்த தகவல் கிட்டத்தட்ட இறுதி செய்யப்பட்டு இருப்பதாகவும் நம்பத் தகுந்த வட்டாரங்கள் தெரிவிக்கின்றன. ஆகையினால் விரைவில் அதிகாரப்பூர்வ அறிவிப்பு வெளியாகும் என நம்பப்படுகிறது.