லோகேஷ் கனகராஜ் இயக்கத்தில் நடிக்க போட்டி போடும் தனுஷ் – சிவகார்த்திகேயன்!

லோகேஷ் கனகராஜ் இயக்கத்தில் நடிப்பதற்காக தனுஷ்- சிவகார்த்திகேயன் ஆகிய இருவரும் போட்டி போடுவதாக தகவல் வெளியாகியுள்ளது.

இயக்குனர் லோகேஷ் கனகராஜ் தமிழ் சினிமாவில் ட்ரெண்டிங் இயக்குனராக வலம் வருபவர். இவர் மாநகரம் என்ற படத்தின் மூலம் அறிமுகமாகி கார்த்தியின் கைதி படத்தை இயக்கி பெயரையும் புகழையும் பெற்றார். அதைத் தொடர்ந்து இவர் மாஸ்டர், விக்ரம், லியோ ஆகிய அடுத்தடுத்த வெற்றி படங்களை கொடுத்திருக்கும் நிலையில் தற்போது சூப்பர் ஸ்டார் ரஜினிகாந்த் நடிப்பில் கூலி திரைப்படத்தை இயக்கி வருகிறார் லோகேஷ். இந்த படத்தின் படப்பிடிப்புகள் விறுவிறுப்பாக நடைபெற்று வருகிறது. மேலும் இப்படம் இந்த ஆண்டு தீபாவளி தினத்தை முன்னிட்டு திரைக்கு வரும் என சொல்லப்படுகிறது. இதற்கிடையில் லோகேஷ் தயாரிப்பாளராகவும் உருவெடுத்து அடுத்தடுத்த படங்களை தயாரித்து வருகிறார். இந்நிலையில் லோகேஷ் கனகராஜ் கூலி திரைப்படத்திற்கு பிறகு கார்த்தி நடிப்பில் கைதி 2 திரைப்படத்தை இயக்குவார் எனவும் இப்படத்தின் படப்பிடிப்புகள் இந்த ஆண்டின் இறுதிக்குள் தொடங்கப்படும் எனவும் ஏற்கனவே பல தகவல்கள் சமூக வலைதளங்களில் வெளிவந்தது. அதேசமயம் இயக்குனர் லோகேஷ் கனகராஜ், கைதி 2 படத்திற்குப் பிறகு என்ன படம் இயக்கப் போகிறார் என்று எதிர்பார்ப்பும் இருந்து வருகிறது. இது குறித்து தற்போது கிடைத்த லேட்டஸ்ட் தகவல் என்னவென்றால் கைதி 2 படத்திற்கு பிறகு லோகேஷ், பிரபாஸ் நடிப்பில் புதிய படத்தை இயக்குவார் என்று சொல்லப்படுகிறது. நடிகர் பிரபாஸ் ஏற்கனவே அடுத்தடுத்த கமிட்மெண்டுகளை கைவசம் வைத்திருக்கும் நிலையில் லோகேஷ் – பிரபாஸ் திட்டம் நடைபெறவில்லை என்றால் தனுஷை இயக்குவார் என்றும் ஒரு தகவல்கள் பரவி வருகிறது. அதன்படி தனுஷ் – லோகேஷ் கூட்டணியில் உருவாக உள்ள புதிய படத்தை தயாரிப்பாளர் லலித் தயாரிக்க உள்ளார் என்று தற்போதைய தகவல்கள் தெரிவிக்கின்றன. இது ஒரு பக்கம் இருக்க, மற்றொரு பக்கம் கைதி 2 படத்திற்கு பிறகு சிவகார்த்திகேயன், லோகேஷ் கூட்டணியில் புதிய படத்தை உருவாக்க பேஷன் ஸ்டுடியோஸ் நிறுவனத்தின் தரப்பில் திட்டமிடப்பட்டு வருவதாகவும் சினிமா வட்டாரங்கள் தெரிவிக்கின்றன. இருப்பினும் கூலி, கைதி 2 ஆகிய படங்களை முடித்த பிறகு லோகேஷ் யாருடைய படத்தை இயக்கப் போகிறார்? என்பதை பொறுத்திருந்துதான் பார்க்க வேண்டும்.