பென்ஸ் படம் குறித்த புதிய தகவல் வெளியாகியுள்ளது.
ராகவா லாரன்ஸ் நடிப்பில் தற்போது உருவாகி வரும் திரைப்படம் தான் ‘பென்ஸ்’. இந்த படத்தை பாக்யராஜ் கண்ணன் இயக்க லோகேஷ் கனகராஜ் இதன் கதை மற்றும் தயாரிப்பு பணிகளை கவனிக்கிறார். மேலும் நிவின் பாலி இந்த படத்தில் வில்லனாகவும் சம்யுக்தா இதில் கதாநாயகியாகவும் நடித்து வருகிறார்கள். 
இது தவிர ரவி மோகனும் இந்த படத்தில் முக்கிய கதாபாத்திரத்தில் இணைய வாய்ப்புள்ளதாக சொல்லப்படுகிறது. ஆனால் அதிகாரப்பூர்வ அறிவிப்பு இதுவரை வெளியாகவில்லை. இதற்கிடையில் இதன் படப்பிடிப்புகள் விறுவிறுப்பாக நடைபெற்று வருகின்றன. இந்நிலையில் இந்த படம் குறித்த சில தகவல்கள் வெளியாகி ரசிகர்களின் எதிர்பார்ப்பை அதிகப்படுத்தி உள்ளது.
அதாவது ஏற்கனவே ‘பென்ஸ்’ திரைப்படமானது லோகேஷ் கனகராஜின் எல்.சி.யு-வில் இணைந்திருப்பதாக அதிகாரப்பூர்வமாக அறிவிக்கப்பட்டிருக்கிறது. அதன்படி லோகேஷ் கனகராஜின் கைதி, விக்ரம், லியோ ஆகிய படங்களில் நடித்தவர்கள் ‘பென்ஸ்’ படத்திலும் நடிப்பார்கள் என்றும் எல்.சி.யு படங்களின் ரெஃபரன்ஸ் இந்த படத்தில் இருக்கும் என்றும் எதிர்பார்க்கப்படுகிறது. அதுமட்டுமில்லாமல் ‘பென்ஸ்’ திரைப்படமானது ‘லியோ’ படத்தின் பிரீக்குவலாக உருவாகி வருகிறதா? என்பது போன்ற கேள்வியும் சமூக வலைதளங்களில் உலா வருகிறது. 
ஏனென்றால் ‘பென்ஸ்’ படத்தின் படப்பிடிப்பு தற்போது ‘லியோ’ படத்தில் இடம் பெற்ற தாஸ் & கோ புகையிலை ஃபேக்டரியில் நடைபெற்று வருவதாக சினிமா வட்டாரங்கள் தெரிவிக்கின்றன. இதன் மூலம் இந்த படத்திற்கும் ‘லியோ’ படத்திற்கும் கனெக்ஷன் இருக்கும் என பலரும் சமூக வலைதளங்களில் தங்களின் கருத்துக்களை தெரிவித்து வருகின்றனர். இது தவிர லோகேஷ் கனகராஜின் கைதி, விக்ரம் ஆகிய படங்களில் நடித்திருந்த நடிகர் நரேன் இப்படத்தில் இணைந்திருப்பதாக தகவல் கிடைத்துள்ளது. எனவே இனிவரும் நாட்களில் மற்ற தகவல்களும் வெளியாகி ரசிகர்களுக்கு இன்ப அதிர்ச்சியை தரும் என்று எதிர்பார்க்கப்படுகிறது.