ஜனநாயகன் படத்தின் இறுதி கட்ட படப்பிடிப்பு குறித்த அப்டேட் வெளியாகியுள்ளது.
தளபதி என்று ரசிகர்களால் கொண்டாடப்படும் நடிகர் விஜயின் 69 ஆவது படமாக ஜனநாயகன் எனும் திரைப்படம் உருவாகி வருகிறது. இந்த படத்தை தீரன் அதிகாரம் ஒன்று, துணிவு ஆகிய படங்களை இயக்கி ரசிகர்கள் மத்தியில் பிரபலமான ஹெச். வினோத் இயக்குகிறார். கே வி என் ப்ரொடக்ஷன்ஸ் நிறுவனம் இந்த படத்தை தயாரிக்க அனிருத் இதற்கு இசையமைக்கிறார். சத்யன் சூரியன் இதன் ஒளிப்பதிவு பணிகளை கவனிக்கிறார். 
அரசியல்வாதியாக மாறி உள்ள விஜயின் கடைசி படம் என்பதால் இந்த படத்தின் மீதான எதிர்பார்ப்பு மிகப்பெரிய அளவில் இருந்து வருகிறது. அதன்படி இந்த படம் அரசியல் சம்பந்தமான கதைக்களத்தில் தயாராகி வருகிறது. இதில் நடிகர் விஜய், தளபதி வெற்றி கொண்டான் என்ற கதாபாத்திரத்தில் நடிப்பதாக சமீபத்திய தகவல்கள் தெரிவிக்கின்றன. இவருடன் இணைந்து பூஜா ஹெக்டே, மமிதா பைஜூ, பிரகாஷ்ராஜ், கௌதம் மேனன், பிரியாமணி மற்றும் பலர் நடிக்கின்றனர். ஏற்கனவே இந்த படத்தின் படப்பிடிப்புகள் தொடங்கப்பட்டு சென்னை, கொடைக்கானல் போன்ற பகுதிகளில் விறுவிறுப்பாக நடைபெற்று வந்தது.
இந்நிலையில் இன்று (மே 7) இந்த படத்தின் இறுதி கட்ட படப்பிடிப்பு தொடங்கும் என லேட்டஸ்ட் அப்டேட் வெளிவந்துள்ளது. இதன் மூலம் இன்னும் சில நாட்களில் இந்த படத்தின் ஒட்டுமொத்த படப்பிடிப்பும் நிறைவடைந்து விடும் என நம்பப்படுகிறது. எனவே அடுத்தடுத்த அப்டேட்டுகளை கொண்டாட ரசிகர்களும் தயாராகி வருகிறார்கள். இதற்கிடையில் இந்த படம் 2026 ஜனவரி மாதம் பொங்கல் தினத்தை முன்னிட்டு ரிலீஸாக இருக்கிறது என்பது குறிப்பிடத்தக்கது.