மோகன்லால் – மம்மூட்டி நடிக்கும் புதிய படத்தின் டீசர் வெளியாகி உள்ளது.
மலையாள சினிமாவின் மிகப்பெரிய ஸ்டார் நடிகர்களான மோகன்லால் மற்றும் மம்மூட்டி ஆகிய இருவரும் இணைந்து ஏற்கனவே ஹரிகிருஷ்ணன்ஸ், அதிராத்ரம், படையோட்டம், ஊதிகாச்சியா பொண்ணு போன்ற பல படங்களில் நடித்துள்ளனர். மீண்டும் இவர்கள் இருவரும் இணைந்து புதிய படம் ஒன்றில் நடித்து வருகின்றனர். இந்தப் படத்தை ‘மாலிக்’ படத்தின் இயக்குனர் மகேஷ் நாராயணன் இயக்குகிறார். இதில் மம்மூட்டி – மோகன்லால் ஆகியோருடன் இணைந்து பகத் பாசில், நயன்தாரா, குஞ்சாகோ போபன் ஆகியோர் முக்கிய கதாபாத்திரங்களில் நடிக்கின்றனர். இப்படத்தை ஆண்டோ ஜோசப், கே.ஜி. அனில் குமார், சி.ஆர். சலீம், சுபாஷ் ஜார்ஜ் மேனுவல் ஆகியோர் இணைந்து தயாரிக்கின்றனர். சுசின் ஷியாம் இந்த படத்தின் இசையமைப்பாளராகவும், மனுஷ் நந்தன் இதன் ஒளிப்பதிவாளராகவும் பணியாற்றுகின்றனர். மெகா பட்ஜெட் பான் – இந்தியா படமாக உருவாகும் இந்த படத்தின் படப்பிடிப்புகளும் ஏற்கனவே தொடங்கப்பட்டு விறுவிறுப்பாக நடைபெற்று வருகிறது.
இந்நிலையில் இப்படத்தின் டீசரை படக்குழு வெளியிட்டுள்ளது. ஏற்கனவே வெளியான தகவலின்படி இப்படத்திற்கு பேட்ரியாட் என்று தலைப்பு வைக்கப்பட்டுள்ளது. டீசரில் இடம் பெற்றுள்ள சண்டைக்காட்சிகள் ஹைப் ஏற்றுகிறது. மேலும் இந்த டீசரை பார்க்கும்போது இந்த படம் ஒரு சோசியோ – பொலிடிக்கல் திரில்லர் படம் போல் தெரிகிறது. மோகன்லால், மம்மூட்டி தவிர பகத் பாஸில், குஞ்சாகோ போபன், நயன்தாரா, ரேவதி ஆகியோரின் கதாபாத்திரங்களும் இதில் காட்டப்படுகின்றன. எனவே ஒரே திரையில் பெரிய நடிகர்களை காண ஆவலுடன் காத்துக் கொண்டிருக்கும் ரசிகர்கள் மத்தியில் இந்த டீசர் நல்ல வரவேற்பை பெற்று இணையத்தில் வைரலாகி வருகிறது.