கிடப்பில் போடப்பட்டுள்ள நயன்தாராவின் ‘மண்ணாங்கட்டி’ …. என்ன காரணம்?

தமிழ் சினிமாவில் முன்னணி நடிகைகளில் ஒருவராக வலம் வருபவர் நடிகை நயன்தாரா. இவர் தமிழ் மட்டுமல்லாமல் மலையாளம், தெலுங்கு, இந்தி, கன்னடம் ஆகிய மொழிப்படங்களில் கவனம் செலுத்தி வருகிறார். அந்த வகையில் இவர் தற்போது சுந்தர்.சி இயக்கத்தில் மூக்குத்தி அம்மன் 2 படத்தில் நடித்து வருகிறார். மேலும் டாக்ஸிக், டியர் ஸ்டுடென்ட்ஸ், ராக்காயி போன்ற பல படங்களை கைவசம் வைத்துள்ளார். இது தவிர துரை செந்தில்குமார் இயக்கத்தில் புதிய படம் ஒன்றில் நடிப்பதற்கும் ஒப்பந்தமாகியுள்ளார் நயன்தாரா. இதற்கிடையில் இவர், மண்ணாங்கட்டி எனும் திரைப்படத்தில் நடித்திருக்கிறார். இந்த படத்தில் நயன்தாராவுடன் இணைந்து யோகி பாபு முக்கிய கதாபாத்திரத்தில் நடித்துள்ளார். கோலமாவு கோகிலா படத்திற்கு பிறகு இந்த கூட்டணி மீண்டும் இணைந்துள்ளது. மண்ணாங்கட்டி படத்தினை பிரின்ஸ் பிக்சர்ஸ் நிறுவனம் தயாரிக்க ட்யூட் விக்கி இந்த படத்தை இயக்கியிருக்கிறார். ஷான் ரோல்டன் இதற்கு இசை அமைக்க ஆர்.டி. ராஜசேகர் இந்த படத்திற்கு ஒளிப்பதிவு செய்துள்ளார். இப்படத்தின் படப்பிடிப்புகள் ஏற்கனவே தொடங்கி விறுவிறுப்பாக நடைபெற்று முடிந்துள்ளது. அதாவது கடந்த ஆண்டு மே மாதமே இந்த படத்தின் ஒட்டுமொத்த படப்பிடிப்பும் நிறைவடைந்ததாக படக்குழு அறிவித்து இருந்தது. ஆனால் இப்படம் தற்போது வரையிலும் ரிலீஸ் செய்யப்படாமல் கிடப்பில் போடப்பட்டுள்ளது. ஏனென்றால் இந்த படத்தின் டிஜிட்டல் உரிமை இன்னும் விற்கப்படாததால் படத்தை வெளியிட முடியாமல் படக்குழு திணறி வருவதாக சொல்லப்படுகிறது.