நடிகர் பார்த்திபன், அஜித் குறித்து பதிவு ஒன்றை வெளியிட்டுள்ளார்.
தமிழ் சினிமாவின் முன்னணி நட்சத்திரமான அஜித் குமார் நடிப்பில் உருவாகி வரும் பிரம்மாண்டத்
திரைப்படம் ‘டேர் டெவில்’. மாபெரும் வெற்றி பெற்ற ‘குட் பேட் அக்லி’ திரைப்படத்திற்குப் பிறகு, இயக்குநர் ஆதிக் ரவிச்சந்திரன் மற்றும் அஜித் குமார் கூட்டணி மீண்டும் இப்படத்தில் இணைந்திருப்பதால், ஆரம்பத்தில் இருந்தே இந்த படத்தின் மீதான எதிர்பார்ப்பு ரசிகர்களிடையே உச்சத்தில் உள்ளது. இப்படத்தில் அஜித் குமாருடன் இணைந்து பார்த்திபன், பிரபு, ஸ்ரீலீலா, உன்னி முகுந்தன் ஆகியோர் மிக முக்கியக் கதாபாத்திரத்தில் நடித்து வருகிறார்கள். ஷாலினி அஜித்குமார் தயாரிக்கும் இந்த படத்திற்கு அனிருத் இசை அமைக்கிறார். நவம்பர் மாதம் முதல் வாரத்தில் இந்த படத்தின் பூஜை மிகச் சிறப்பாக நடந்து முடிந்த நிலையில், சமீபத்தில் ஹைதராபாத்தில் இப்படத்தின் படப்பிடிப்பு தொடங்கி மிகவும் விறுவிறுப்பாக நடைபெற்று வருகிறது.
இந்நிலையில், படப்பிடிப்புத் தளத்தில் அஜித் குமார் தன்னிடம் பகிர்ந்துகொண்ட நெகிழ்ச்சியான வார்த்தைகளை நடிகர் பார்த்திபன் தனது எக்ஸ் தள பக்கத்தில் பகிர்ந்துள்ளார். தனது பிறந்தநாளை முன்னிட்டு ரசிகர்களின் வாழ்த்துகளுக்கு நன்றி தெரிவித்து பதிவிட்டுள்ள பார்த்திபன், “பிறக்கும் ஒவ்வொரு நாளும் பிரபஞ்சத்தின் பிறந்தநாள் பரிசே! ‘பிடித்த வேலையைப் பிடித்த வேளையில் செய்யும் ஆடம்பரம் (Luxury) நம் போன்ற கலைஞர்களுக்குத்தான் கிடைத்திருக்கிறது. அதனால் நாம் ஆசீர்வதிக்கப்பட்டவர்கள் (We’re gifted)’ என நண்பர் அஜித் குமார், விடியவிடிய நடந்த இரவுப் படப்பிடிப்பில் விடியலாக இந்தச் செய்தியைச் சொன்னார். உண்மையில் அவ்வார்த்தைகள் சத்தியமே!” என்று நெகிழ்ச்சியுடன் குறிப்பிட்டுள்ளார்.
பிறக்கும் ஒவ்வொரு நாளும்,
பிரபஞ்சத்தின் பிறந்த நாள் பரிசே!“பிடித்த வேலையை
பிடித்த வேளையில்
செய்யும் luxury -நம்
போன்ற கலைஞர்களுக்கு தான்
கிடைத்திருக்கிறது so
We’re gifted “ என
நண்பர் அஜித் குமார்
வடிந்து முடியப் போகும் இரவு படபிடிப்பில்
விடியலாகக் மேற்படி மெசேஜை சொன்னார்.
உண்மையில் அவ்வார்த்தைகள் சத்தியமே!மகிழ்வில்லாமல் இருக்கத்தான் நமக்கு ஏதோ ஒரு நமத்துக் போன காரணம் தேவைப்படுகிறது.
‘என் வாழ்வில் நீ வந்தது விதியென்றால்
நீ எந்தன் உயிரன்றோ?- கவியரசு.அப்படி சினிமாவிற்குள் நான் வந்ததும்
என் வாழ்வில் ரசிகர்களின் வாழ்த்தும்
உயர்வன்றோ?- உயிரன்றோ?
Thanks friends!— Radhakrishnan Parthiban (@rparthiepan) November 15, 2026
மேலும், “மகிழ்வில்லாமல் இருக்கத்தான் நமக்கு ஏதோ ஒரு நமத்துப் போன காரணம் தேவைப்படுகிறது. ‘என் வாழ்வில் நீ வந்தது விதியென்றால், நீ எந்தன் உயிரன்றோ?’ என்ற கவியரசு கண்ணதாசனின் வரிகளைப் போல, சினிமாவிற்குள் நான் வந்ததும், என் வாழ்வில் ரசிகர்களின் வாழ்த்தும் உயர்வன்றோ? உயிரன்றோ? நண்பர்களுக்கு நன்றி!” என்று தனது மகிழ்ச்சியை வெளிப்படுத்தியுள்ளார். படப்பிடிப்புத் தளத்தில் அஜித் குமார் பேசிய இந்த ஊக்கமளிக்கும் வார்த்தைகள் தற்போது இணையத்தில் வைரலாகி வருகின்றன.