இந்திய சினிமாவின் கிளாசிக் திரைப்படமான ‘சோலே’ (Sholay) படத்தின் உலகளாவிய மவுசு குறையவில்லை என்பதற்குச் சான்றாக, இத்தாலியில் நள்ளிரவு தாண்டி விடிய விடிய மக்கள் இப்படத்தைக் கண்டுகளித்த சுவாரஸ்ய நிகழ்வை நடிகர் அமிதாப் பச்சன் பகிர்ந்துள்ளார்.
கேபிசி நிகழ்ச்சியில் நெகிழ்ச்சி: பிரபலமான ‘கௌன் பனேகா குரோபதி’ (KBC) நிகழ்ச்சியின் 18-வது பருவத்தின் புதிய அத்தியாயத்தில், போட்டியாளர் டாக்டர் கணேஷ் பரையாவுடன் உரையாடும்போது, ‘சோலே’ படத்தின் உலகளாவிய வரவேற்பு குறித்து மெகாஸ்டார் அமிதாப் பச்சன் விவரித்தார். 1975-ம் ஆண்டு வெளியான இப்படம் இன்றளவும் உலகெங்கிலும் உள்ள ரசிகர்களை எவ்வாறு ஈர்த்து வருகிறது என்பதை அவர் பெருமிதத்துடன் குறிப்பிட்டார்.
இத்தாலியில் திறந்தவெளித் திரையிடல்: திரைப்பட பாரம்பரிய அறக்கட்டளையின் (Film Heritage Foundation) இயக்குநர் சிவேந்திர சிங் துங்கர்பூர் முயற்சியால், ‘சோலே’ படம் அதிநவீன முறையில் மீட்டுருவாக்கம் (Restoration) செய்யப்பட்டு புதிய பிரின்ட்களுடன் உருவாக்கப்பட்டுள்ளது. இந்த மறுபதிப்பு செய்யப்பட்ட படம் இத்தாலி நாட்டுக்குக் கொண்டு செல்லப்பட்டது.
இதுகுறித்து அமிதாப் பச்சன் கூறுகையில், “இத்தாலியின் போலோக்னா (Bologna) நகரின் மையப்பகுதியில் அமைந்துள்ள பிரம்மாண்டமான திறந்தவெளி மைதானத்தில் (Square) இப்படத்தின் திரையிடல் ஏற்பாடு செய்யப்பட்டிருந்தது. நள்ளிரவுச் சூழலிலும் சுமார் 2,000 இத்தாலிய மக்கள் அங்கு திரண்டனர். இரவு 11 மணிக்குத் தொடங்கிய திரையிடல், மறுநாள் காலை 3 மணி வரை நீடித்தது. விடியும் வரை மக்கள் அங்கேயே அமர்ந்து ‘சோலே’ படைக் கண்டுகளித்தனர்” என்றார்.
தொடரும் மவுசு: ரமேஷ் சிப்பி இயக்கத்தில், சலீம்-ஜாவேத் கூட்டணியின் எழுத்தில், தர்மேந்திரா, அமிதாப் பச்சன், ஹேமா மாலினி, ஜெய பச்சன், சஞ்சீவ் குமார் மற்றும் அம்ஜத் கான் உள்ளிட்ட பலரது நடிப்பில் வெளியான இப்படம் இந்தியத் திரையுலகின் வரலாற்றுச் சின்னமாகக் கருதப்படுகிறது. பல தசாப்தங்களைக் கடந்தும் சர்வதேச அளவில் இப்படம் பெற்றுவரும் வரவேற்பு பாலிவுட் வட்டாரத்தில் பெரும் வியப்பை ஏற்படுத்தியுள்ளது.