திரைத்துறையில் தனது 67 ஆண்டுகால கலைப்பயணத்தை நிறைவு செய்துள்ளதையொட்டி, வாழ்த்து தெரிவித்த ரசிகர்களுக்கும் திரை உலகினருக்கும் உலகநாயகன் கமல்ஹாசன் மனமார்ந்த நன்றியைத் தெரிவித்துள்ளார். 
இது குறித்து அவர் வெளியிட்டுள்ள அறிக்கையில், சினிமா மற்றும் தனது கற்றல் அனுபவம் குறித்துப் பல்வேறு சுவாரஸ்யமான கருத்துக்களைப் பகிர்ந்துள்ளார்.“20 ஆண்டுகள் மட்டுமே உண்மையான கற்றல்” தனது நீண்டகால திரைப்பயணம் குறித்துப் பேசிய கமல், “எனது 67 ஆண்டுகால திரைப்பயணத்தை முன்னிட்டு எனக்கு வாழ்த்து தெரிவித்த அனைவருக்கும் நன்றி. அந்த 67 ஆண்டுகளில், உண்மையான கற்றலுக்காக நான் சுமார் 20 ஆண்டுகளை மட்டுமே எடுத்துக்கொள்ள முடியும் என்று நினைக்கிறேன். மீதமுள்ள ஆண்டுகள் அனைத்தும், கழிவுநீர் செல்லும் பாதையில் அதன் போக்கிலேயே செல்வதைப் போல அமைந்துவிட்டன. ஆனால் நம்பிக்கையூட்டும் விஷயம் என்னவென்றால், அந்த நீர்ப்பாதை எவ்வளவு இருண்டதாக மாறினாலும், ‘சினிமா’ என்ற மிகப்பெரிய கூட்டு வடிவத்துடன் இணையும் சங்கமத்திற்காக காத்திருப்பதே நம்பிக்கையைத் தருகிறது.
அது எந்த ஒரு கால்வாயாலும் கட்டுப்படுத்தப்படாத ஒரு பெருங்கடல். கலைஞர்கள், பார்வையாளர்கள் என நாம் அனைவரும் அந்தக் கடலை நோக்கியே பயணித்துக் கொண்டிருக்கிறோம். எனவே, நான் அனுபவமாகச் சேகரித்தவற்றை, இந்தத் துறையில் எனது ஆண்டுகளை மக்கள் எண்ணுவதை நிறுத்திவிட்டு, வேறு இடங்களில் சிறந்த எண்ணிக்கைகளைத் தேடத் தொடங்குவதற்கு முன்பாக, இன்னும் சிறப்பாக மேம்படுத்திக் கொள்ள முடியும் என்று நினைக்கிறேன்” எனக் குறிப்பிட்டுள்ளார்.
சினிமா வரலாற்றில் பாதி காலம்! திரைப்படத் துறையின் வரலாற்றோடு தனது பயணத்தை ஒப்பிட்டுப் பேசிய அவர், “1895 டிசம்பரில் லூமியர் சகோதரர்கள் முதன்முதலில் பொதுமக்களுக்காக திரைப்படத்தைத் திரையிட்டதிலிருந்து, திரைப்படத் துறை சுமார் 130 ஆண்டுகள் மற்றும் 8 மாதங்களாக இயங்கி வருகிறது. அந்த மொத்த வரலாற்றில் 67 ஆண்டுகளாக நான் திரைத்துறையில் இருந்து வருகிறேன் என்று எனது குழுவினர் எனக்கு நினைவூட்டினர்.
அதாவது, திரைப்படத் துறையின் முழு வரலாற்றில் பாதிக்கும் மேலான காலத்தை நான் கடந்து வந்திருக்கிறேன்! இதை நினைத்துப் பார்ப்பதே மிகவும் அசாதாரணமான உணர்வாக இருக்கிறது” என்று வியப்பு தெரிவித்தார். “சினிமாவின் மூத்த Gen Z” தனது அறிக்கையின் நிறைவாகத் தனது கற்றுக்கொள்ளும் ஆர்வத்தைக் குறிப்பிட்ட அவர், “ஆனால், எனது கணக்கில் பார்த்தால், உண்மையான கற்றலாக நான் சொல்லிக்கொள்ளக்கூடியது சுமார் 20 ஆண்டுகள் மட்டுமே. சினிமாவில் இருக்கும் Gen Z தலைமுறையினரில் நான்தான் அநேகமாக மிகவும் வயதானவர் (oldest of the Gen Z)” என்று நகைச்சுவையுடனும் எதார்த்தத்துடனும் தனக்கே உரிய பாணியில் பதிவிட்டுள்ளார்.