இறுதிக்கட்டத்தில் கங்குவா படப்பிடிப்பு!

சூர்யா நடிக்கும் கங்குவா படத்தின் படப்பிடிப்பு இறுதிக்கட்டத்தை எட்டி விறுவிறுப்பாக நடைபெற்று வருகிறது.

சூர்யா நடித்து வரும் திரைப்படம் கங்குவா. சிறுத்தை சிவா இப்படத்தை இயக்கி வருகிறார். ஸ்டூடியோ கிரீன் நிறுவனம் படத்தை தயாரிக்கிறது. தேவி ஸ்ரீ பிரசாத் இசையிலும் இப்படம் உருவாகி வருகிறது. அதிக பொருட்செலவில் மிகவும் பிரம்மாண்டமாக தயாராகி வரும் இந்த படம் 3D அனிமேஷனில் ஒரு வரலாற்று சரித்திர திரைப்படமாக தயாராகி வருகிறது. சமீபத்தில் இந்த படத்தின் கிளிம்ஸ் வீடியோ வெளியாகி படத்தின் மீதான எதிர்பார்ப்பை அதிகரித்தது.

படத்தில் திஷா பதானி, பாபி தியோல், யோகி பாபு, ரெடின் கிங்ஸ்லி உட்பட பலர் நடிக்கின்றனர். வெற்றி பழனிச்சாமி ஒளிப்பதிவு செய்கிறார். இந்த படத்தின் படப்பிடிப்பு கொடைக்கானல் மற்றும் ராஜமுந்திரில் அடர்ந்த காட்டுப்பகுதிகளில் விறுவிறுப்பாக நடைபெற்று வந்தது. அதை தொடர்ந்து தாய்லாந்து காட்டுப் பகுதியில் நடைபெற்றது. இதையடுத்து, சென்னையை அடுத்த ஈவிபி பிலிம் சிட்டியில் படப்பிடிப்பு நடைபெற்று முடிந்தது. அப்போது சூர்யாவுக்கு விபத்தும் ஏற்பட்டது.

இதையடுத்து, ஐதராபாத்தில் இப்படத்தின் படப்பிடிப்பு தொடங்கி விறுவிறுப்பாக நடைபெற்று முடிந்தது. தற்போது இறுதிக்கட்ட படப்பிடிப்பும் ஹைதராபாத்தில் நடைபெற்று வருகிறது. இன்னும் சில நாள்களில் முழுமையாக கங்குவா படப்பிடிப்பு நிறைவு செய்யப்படலாம் என எதிர்பார்க்கப்படுகிறது. அடுத்த ஆண்டு கங்குவா திரைப்படம் திரையரங்குகளில் வெளியாக உள்ளது.