ஐதராபாத்தில் தங்கலான் முன்னோட்டம் வெளியீட்டு நிகழ்ச்சி

விக்ரம்,பொன்னியின் செல்வன் படத்தின் வெற்றிக்குப் பிறகு பா ரஞ்சித் இயக்கும் தங்கலான் படத்தில் நடித்துள்ளார். இவருடன் இணைந்து மாளவிகா மோகனன், பார்வதி, பசுபதி, ஹாலிவுட் நடிகர் டேனியல் கால்டஜிரோனோ மற்றும் பலர் நடிக்கின்றனர். ஸ்டூடியோ கிரீன் நிறுவனம் மற்றும் நீலம் ப்ரொடக்ஷன்ஸ் நிறுவனம் இணைந்து இந்த படத்தை தயாரிக்கிறது. ஜிவி பிரகாஷ் இதற்கு இசையமைக்கிறார்.

இப்படம் கோலார் சுரங்கத்தில் தமிழர்கள் அனுபவிக்கும் கொடுமைகளை மையமாகக் கொண்டு உருவாக்கப்படுகிறது. இந்தப் படத்தின் படப்பிடிப்பின் போது விக்ரமிற்கு ஏற்பட்ட விபத்தினால் படப்பிடிப்புகள் நிறுத்தி வைக்கப்பட்டன. அதன்பின் சில வாரங்கள் கழித்து சென்னையில் தொடங்கப்பட்ட படப்பிடிப்புகள் விறுவிறுப்பாக நடைபெற்று முடிந்தது. கிறிஸ்துமஸ் தினத்தை முன்னிட்டு வெளிவரும் என எதிர்பார்க்கப்பட்ட தங்கலான் திரைப்படம் அடுத்த ஆண்டு பொங்கல் தினத்திற்கு வெளியாகும் என்று படக்குழு அறிவித்துள்ளது. படத்தின் முன்னோட்டம் வரும் நவம்பர் 1-ம் தேதி வெளியாகும் என்றும் படக்குழு அறிவித்திருந்தது.

இந்நிலையில், நாளை மறுநாள் ஐதராபாத்தில் முன்னோட்டம் வெளியிடும் நிகழ்ச்சி நடைபெறும் என்று படக்குழு அறிவித்துள்ளது. ஐதராபாத்தில் உள்ள திரையரங்கம் ஒன்றில் இந்நிகழ்ச்சி நடைபெற உள்ளது.