விஜய்குமார் நடிப்பில் உருவாகி இருக்கும் எலக்சன் திரைப்படத்திலிருந்து தீரா எனத் தொடங்கும் பாடல் வெளியானது.
வழக்கமான காதல் மற்றும் கமர்ஷியல் படங்களாக இல்லாமல் அரசியல் மற்றும் சமூக கருத்துகள் பேசும் திரைப்படத்தில் விஜய்குமார் நடித்து வருகிறார். அவரது முதல் படமாக உறியடி படத்தின் மூலம் ரசிகர்களின் கவனத்தை ஈர்த்தார் விஜய்குமார். 2016-ம் ஆண்டு வெளியான உறியடி படத்தின் வெற்றியைத் தொடர்ந்து உறியடி 2-ம் பாகம் வெளியானது. நடிகர் சூர்யா இப்படத்தை தயாரித்து இருந்தார்.
உறியடி படத்தின் இரண்டு பாகங்களும் ரசிகர்கள் மத்தியில் நல்ல வரவேற்பை பெற்றது. இதைத் தொடர்ந்து விஜய் குமார் நடித்த திரைப்படம் ஃபைட் கிளப். இப்படத்தை பிரபல இயக்குநர் லோகேஷ் கனகராஜ் தயாரித்து இருந்தார். இது தான் அவர் தயாரித்த முதல் படமாகும். ஆனால், கலவையான விமர்சனங்களை பெற்றது. இதையடுத்து, விஜய் குமார் நடிப்பில் தற்போது உருவாகி இருக்கும் திரைப்படம் தான் எலக்சன். இப்படத்தை தமிழ் இயக்குகிறார். இவர் பிரபல இயக்குநர் மற்றும் தயாரிப்பாளரான பா ரஞ்சித் தயாரித்த சேத்துமான் படத்தை இயக்கியவர் ஆவார். இது அவர் இயக்கும் இரண்டாவது திரைப்டமாகும். கோவிந்த் வசந்தா இப்படத்திற்கு இசை அமைக்கிறார்.
இத்திரைப்படத்திலிருந்து ஏற்கனவே இரண்டு பாடல்கள் வெளியாகி வரவேற்பை பெற்ற நிலையில், தற்போது தீரா எனத் தொடங்கும் புதிய பாடல் வௌியாகி உள்ளது. இது இணையத்தில் டிரெண்டாகி வருகிறது. வரும் 17-ம் தேதி இத்திரைப்படம் திரையரங்குகளில் வெளியாகிறது.
