தேசிய அளவில் பெரும் அதிர்வலைகளை ஏற்படுத்தியுள்ள நீட் (NEET) தேர்வு முறைகேடுகள் மற்றும் வினாத்தாள் கசிவு விவகாரம் தொடர்பாக, தலைநகர் டெல்லியில் மாணவர்களின் போராட்டம் நாளுக்கு நாள் தீவிரமடைந்து வருகிறது. இப்போராட்டத்திற்கு ஆதரவு தெரிவித்துள்ள பிரபல நடிகை ஜோதிகா, மத்திய கல்வி அமைச்சர் தர்மேந்திர பிரதான் உடனடியாகப் பதவி விலக வேண்டும் என வலியுறுத்தியுள்ளார்.
தலைநகரில் வெடிக்கும் மாணவர் போராட்டம்
நீட் உள்ளிட்ட முக்கிய தேசிய நுழைவுத் தேர்வுகள் மற்றும் போட்டித் தேர்வுகளில் தொடர்ச்சியாக நடைபெற்ற வினாத்தாள் கசிவுகளால் லட்சக்கணக்கான மாணவர்கள் கடுமையான மன உளைச்சலுக்கு ஆளாகியுள்ளனர். இதற்கு மத்திய அரசே முழுப் பொறுப்பேற்க வேண்டும் எனக் கோரி, டெல்லி ஜந்தர் மந்தர் பகுதியில் சமூக ஆர்வலர் சோனம் வாங்சுக் மற்றும் ‘காக்ரோச் ஜனதா கட்சி’ (CJP) அமைப்பின் தலைமையில் மாணவர்கள் தீவிர உண்ணாவிரதம் மற்றும் தொடர் போராட்டங்களை முன்னெடுத்து வருகின்றனர்.
போராட்டக்காரர்களின் முதன்மை கோரிக்கைகள்
அமைச்சரின் ராஜினாமா: கல்வித்துறையில் தொடரும் சீர்கேடுகளுக்கும் நிர்வாகத் தோல்விகளுக்கும் பொறுப்பேற்று, மத்திய கல்வி அமைச்சர் தர்மேந்திர பிரதான் உடனடியாகத் தனது பதவியை ராஜினாமா செய்ய வேண்டும். வெளிப்படைத்தன்மையுடன் கூடிய புதிய தேர்வு முறையைச் நடைமுறைப்படுத்த வேண்டும்.
நடிகை ஜோதிகாவின் கண்டனம் மற்றும் ஆதரவு
மாணவர்களின் நியாயமான போராட்டத்திற்குத் திரைத்துறை பிரபலங்கள் ஆதரவு தெரிவித்து வரும் நிலையில், நடிகை ஜோதிகா தனது சமூக வலைதளப் பக்கத்தில் வெளியிட்டுள்ள பதிவு பெரும் பரபரப்பை ஏற்படுத்தியுள்ளது. “மத்திய கல்வி அமைச்சர் தர்மேந்திர பிரதான் உடனடியாகப் பதவி விலக வேண்டும். நான் மாணவர்களுடனும், நமது நாட்டின் எதிர்காலத்துடனும் உறுதியாக நிற்கிறேன். பொறுப்புக்கூறலுடனும், ஜனநாயக இந்தியாவை ஆதரித்தும், சீர்திருத்தப்பட்ட கல்வி முறையை வலியுறுத்தியும் துணிச்சலாகப் போராடும் மாணவர்களுக்கும் சோனம் வாங்சுக் போன்றோருக்கும் எனது மனமார்ந்த பாராட்டுகளும் நன்றியும்!” என நடிகை ஜோதிகா தெரிவித்துள்ளாா். ஜோதிகாவின் இந்த அதிரடி கருத்து சமூக வலைதளங்களில் வைரலாகி வருவதுடன், கல்வித் துறை விவகாரத்தில் மத்திய அரசுக்கு எதிரான எதிர்ப்புக் குரல்களை மேலும் வலுப்படுத்தியுள்ளது.