டெல்லி ஜந்தர் மந்தரில் போராட்டத்தில் ஈடுபட்டு வரும் மாணவர்கள் மீது நடத்தப்பட்ட அடக்குமுறையைக் கண்டித்தும், அவர்களின் நியாயமான கோரிக்கைகளுக்கு ஆதரவாகவும் பிரபல நடிகை அபிராமி தனது குரலை உயர்த்தியுள்ளார்.
ஜந்தர் மந்தர் போராட்டம்: நடிகை அபிராமி ஆதங்கம்
டெல்லியில் உள்ள ஜந்தர் மந்தர் பகுதியில் மாணவர்கள் மற்றும் இளைஞர்கள் நடத்தி வரும் தொடர் போராட்டங்கள் குறித்துத் தனது சமூக வலைத்தளப் பக்கத்தில் பதிவிட்டுள்ள நடிகை அபிராமி, மாணவர்களின் நிலைகுறித்து மிகுந்த கவலையும் உருக்கமும் தெரிவித்துள்ளார். பல வருடங்கள் இரவும் பகலும் பாடுபட்டுப் படித்து, இறுதியில் ஏமாற்றங்களை மட்டுமே சந்தித்துள்ள இளைஞர்கள் தங்கள் உரிமைக்காகக் குரல் கொடுக்கும் போது, அவர்களுக்குத் தடியடியே பதிலாகக் கிடைப்பது மிகுந்த வேதனையளிப்பதாக அவர் குறிப்பிட்டுள்ளார்.
“என் குழந்தையாக இருந்தால் என்ன செய்வேன்?”
போராடும் மாணவர்களின் கஷ்டங்களைக் கண்டு ஒரு தாயின் உணர்வோடு கேள்வி எழுப்பியுள்ள அபிராமி, “டெல்லி ஜந்தர் மந்தரில் நடப்பதைப் பற்றி என்னால் யோசிக்காமல் இருக்க முடியவில்லை. பல வருடங்கள் கஷ்டப்பட்டுப் படித்து ஏமாற்றப்பட்ட இளைஞர்களின் குரலுக்குத் தடியடியே பதிலாகக் கிடைத்துள்ளது. ‘ஒருவேளை அங்கே அடிவாங்கும் அந்த இளைஞர் என் குழந்தையாக இருந்தால் நான் என்ன செய்வேன்?’ என்ற எண்ணம் என்னை நிலைகுலைய வைக்கிறது.” என நடிகை அபிராமி தெரிவித்துள்ளாா்.
பொதுமக்களுக்கு அழைப்பு
மாணவர்களின் போராட்டத்திற்கு நாடு முழுவதும் ஆதரவு பெருக வேண்டும் என்று வலியுறுத்தியுள்ள அவர், “இளைஞர்களின் இந்த நியாயமான போராட்டத்திற்கு அனைவரும் ஆதரவளிக்க வேண்டும். உங்கள் பகுதிகளில் நடைபெறும் உள்ளூர் போராட்டங்களில் நேரில் கலந்துகொள்ளுங்கள். இளைஞர்களின் எதிர்காலத்தைக் காக்க அனைவரும் தங்களது கண்டனக் குரலை ஒலிக்கச் செய்ய வேண்டும்” எனக் கேட்டுக்கொண்டுள்ளார். நடிகை அபிராமியின் இந்த உருக்கமான பதிவு தற்போது இணையதளங்களில் வேகமாகப் பரவி வருவதோடு, பலரது கவனத்தையும் ஈர்த்துள்ளது.
தளபதி விஜய்யின் கடைசி படம்! “ஜனநாயகன்” முன்பதிவில் புதிய சாதனை: கொண்டாட்டத்தில் ரசிகர்கள்!