இத்தாலிக்கு செல்லும் ‘விடாமுயற்சி’ படக்குழு!

அஜித் நடிப்பில் உருவாகி வரும் திரைப்படம் தான் விடாமுயற்சி. அஜித்தின் 62 ஆவது படமாக உருவாகி வரும் இந்த படத்தினை மகிழ் திருமேனி இயக்கி வருகிறார். லைக்கா நிறுவனம் இந்த படத்தை தயாரிக்க அனிருத் இதற்கு இசை அமைக்கிறார். ஓம் பிரகாஷ் இதன் ஒளிப்பதிவு பணிகளை மேற்கொள்கிறார். படத்தில் அஜித் தவிர திரிஷா, அர்ஜுன், ஆரவ், ரெஜினா உள்ளிட்ட பலரும் முக்கிய கதாபாத்திரங்களில் நடித்து வருகின்றனர். ஏற்கனவே இந்த படத்தின் படப்பிடிப்பு அஜர்பைஜானில் நடத்தப்பட்டு வந்தது. பின்னர் இறுதி கட்ட படப்பிடிப்பு ஐதராபாத் பகுதியில் நடைபெற்று முடிந்துள்ளது. அதாவது இன்னும் பாடல் காட்சி ஒன்று மட்டும் படமாக்கப்பட உள்ளது. இதற்காக படக்குழு ஸ்பெயின் நாட்டிற்கு செல்ல இருப்பதாக ஏற்கனவே தகவல் கசிந்திருந்தன. ஆனால் தற்போது கிடைத்த தகவல் என்னவென்றால் விடாமுயற்சி படக்குழு பாடல் காட்சி ஒன்றிற்காக இத்தாலிக்கு செல்ல இருக்கிறதாம். ஏற்கனவே வெளியான தகவலின் படி அந்தப் பாடலுடன் ஒட்டுமொத்த படப்பிடிப்பும் நிறைவடைந்து விடும் என்று சொல்லப்படுகிறது. அடுத்தது இந்த படம் 2024 டிசம்பர் மாதத்தில் வெளியாகும் என தற்போதைய தகவல்கள் தெரிவிக்கின்றன. இருப்பினும் இது தொடர்பான அதிகாரப்பூர்வ அறிவிப்பு படக்குழுவினர் சார்பில் விரைவில் வெளியிடப்படும் என்று நம்பப்படுகிறது.