ராம்சரண், தெலுங்கு திரை உலகில் முன்னணி நடிகராக வலம் வருபவர். இவர் ஆர் ஆர் ஆர் படத்தின் மாபெரும் வெற்றிக்குப் பிறகு இயக்குனர் சங்கர் இயக்கத்தில் கேம் சேஞ்சர் திரைப்படத்தில் நடித்து வருகிறார். இப்படத்தின் கதாநாயகியாக கியாரா அத்வானி நடிக்கிறார். எஸ் ஜே சூர்யா இப்படத்தில் வில்லனாக நடிக்கிறார் என்று கூறப்படுகிறது. தமிழ் மற்றும் தெலுங்கில் உருவாகி வரும் இத்திரைப்படம் பான் இந்திய அளவில் வெளியாக இருக்கிறது.
இந்நிலையில் ராம் சரண் புச்சிபாபு இயக்கத்தில் தனது அடுத்த படத்தை நடிக்க உள்ளார். இந்த படத்தில் இவருக்கு ஜோடியாக சீதாராமன் படத்தின் மூலம் பிரபலமான மிர்ணாள் தாகூர் நடிக்க இருக்கிறார். மைத்திரி மூவிஸ் நிறுவனம் தயாரிக்க உள்ள இந்த படத்திற்கு ஏ ஆர் ரகுமான் இசை அமைக்க உள்ளார். இந்த படத்தின் படப்பிடிப்பு வருகின்ற செப்டம்பர் மாதம் தொடங்க இருப்பதாக சமீபத்திய தகவல்கள் தெரிவிக்கின்றன. மேலும் இந்த படம் விளையாட்டை அடிப்படையாக வைத்து உருவாக்கப்பட இருப்பதாகவும் ராம்சரண் இதில் விளையாட்டு வீரராக நடிக்க இருப்பதாகவும் கூறப்படுகிறது.
இந்தப் படத்தின் கூடுதல் தகவலாக, விஜய் சேதுபதி இந்த படத்தில் ராம் சரணுக்கு வில்லனாக நடிக்கிறார் என்று தற்போது புதிய தகவல்கள் வெளிவந்துள்ளன.
விஜய் சேதுபதி ஏற்கனவே புச்சிபாபு இயக்கிய ‘உப்பென்னா’ திரைப்படத்தில் வில்லனாக நடித்திருந்தார் என்பது குறிப்பிடத்தக்கது.
மேலும் விஜய் சேதுபதி ஹீரோவாக நடிப்பதை விட வில்லனாக நடிக்கும் படங்கள் தான் வசூல் வேட்டை நடத்துகின்றன என்பதும் குறிப்பிடத்தக்க தகவலாகும். இதனால் ரசிகர்கள் மத்தியில் இந்த படத்தின் மீதான எதிர்பார்ப்பு அதிகமாகியுள்ளது.
மேலும் இது குறித்த அப்டேட்டுகள் விரைவில் வெளியாகும் என்று எதிர்பார்க்கப்படுகிறது.