நடிகர் விஷ்ணு விஷால், கார்த்திக் சுப்பராஜுடன் கூட்டணி அமைக்க உள்ளதாக தகவல் வெளியாகி இருக்கிறது.
நடிகர் விஷ்ணு விஷால் தற்போது இரண்டு வானம், கட்டா குஸ்தி 2 ஆகிய படங்களை கைவசம் வைத்திருக்கிறார். இது தவிர அருண்ராஜா காமராஜ் இயக்கத்தில் புதிய படம் ஒன்றிலும், சதீஷ் செல்வகுமார் இயக்கத்தில் புதிய படம் ஒன்றிலும் நடிப்பதற்கு ஒப்பந்தமாகியுள்ளார். இதற்கிடையில் இவரது நடிப்பில் உருவாகி இருக்கும் ‘ஆர்யன்’ திரைப்படம் வருகின்ற அக்டோபர் 31ஆம் தேதி உலகம் முழுவதும் திரைக்கு வர தயாராகி வருகிறது. இந்நிலையில் விஷ்ணு விஷால், கார்த்திக் சுப்பராஜுடன் கூட்டணி அமைக்க உள்ளதாக தகவல் கசிந்துள்ளது. 
அதாவது தமிழ் சினிமாவில் பீட்சா, ஜிகர்தண்டா, பேட்ட, ஜிகர்தண்டா டபுள் எக்ஸ் ஆகிய வெற்றி படங்களை கொடுத்து ரசிகர்கள் மனதில் இடம் பிடித்தவர் கார்த்திக் சுப்பராஜ். இவருடைய இயக்கத்தில் கடைசியாக ரெட்ரோ திரைப்படம் வெளியாகி கலவையான விமர்சனங்களை பெற்றது. அடுத்தது இவர் புதுமுக நடிகர்களை வைத்து படம் இயக்கப் போவதாகவும் பேச்சு அடிபடுகிறது. இதற்கிடையில் இவர் தனது ஸ்டோன் பெஞ்ச் நிறுவனத்தின் சார்பில் அடுத்தடுத்த படங்களை தயாரித்து வருகிறார்.
அந்த வகையில் விஷ்ணு விஷால் நடிக்க உள்ள புதிய படத்தை தயாரிக்க இருக்கிறாராம் கார்த்திக் சுப்பராஜ். இந்த புதிய படத்தை தியேட்டரிலும், ஓடிடியிலும் வெளியாகி ஹிட் அடித்த ‘லெவன்’ படத்தின் இயக்குனர் லோகேஷ் அஜல்ஸ் இயக்க உள்ளதாக சொல்லப்படுகிறது. மேலும் இந்த படமானது விஷ்ணு விஷாலின் 25வது படமாக உருவாக இருக்கிறது என்பது குறிப்பிடத்தக்கது. இனிவரும் நாட்களில் மற்ற தகவல்கள் வெளியாகும் என்று நம்பப்படுகிறது.