சென்னை கொரட்டூரில் கடந்த 2017-ஆம் ஆண்டு ஸ்வாமிதாஸ் என்பவர் கொலை செய்யப்பட்டு, அவரது உடல் கிணற்றில் வீசப்பட்ட வழக்கில், நீண்டகாலமாகத் தலைமறைவாக இருந்த முகமது இப்ராஹிமை கொரட்டூர் தனிப்படை போலீசார் பஞ்சாப் மாநிலத்தில் கைது செய்துள்ளனர்.
கைது செய்யப்பட்டு சிறையில் அடைக்கப்பட்ட பின்னர் வெளியே வந்து, வழக்கு விசாரணைக்கு ஆஜராகாமல் தலைமறைவாக இருந்த அவரை, சுமார் 9 ஆண்டுகளுக்குப் பிறகு போலீசார் பிடித்துள்ளனர்.
கிணற்றில் அழுகிய நிலையில் மீட்கப்பட்ட சடலம்!
சென்னை கொரட்டூர், சிவலிங்கபுரம், வீரராகவன் நகரில் வசித்து வந்த ஸ்வாமிதாஸ் (52), தனது மகன்களுடன் வசித்து வந்தார். கடந்த 2017-ஆம் ஆண்டு பிப்ரவரி 28-ஆம் தேதி வீட்டிலிருந்து வெளியே சென்ற அவர் மீண்டும் வீடு திரும்பவில்லை.
இதனால் அதிர்ச்சியடைந்த அவரது மகன் திலீபன், பல்வேறு இடங்களில் தேடியும் தந்தை கிடைக்காததால் கொரட்டூர் காவல் நிலையத்தில் புகார் அளித்தார்.
இதற்கிடையே, வீட்டிற்கு எதிரே இருந்த கிணற்றிலிருந்து துர்நாற்றம் வீசியதால் போலீசாருக்குத் தகவல் தெரிவிக்கப்பட்டது. இதையடுத்து, கிணற்றிலிருந்த தண்ணீரை வெளியேற்றி சோதனை செய்தபோது, அழுகிய நிலையில் ஸ்வாமிதாஸின் சடலம் மீட்கப்பட்டது.
அவரது இரு கைகளும் துணியால் கட்டப்பட்டிருந்தன. இடுப்பில் பெரிய கல் கட்டப்பட்டிருந்ததுடன், முகம் மற்றும் தலை சேலையால் மூடப்பட்டிருந்தன. மேலும், அவரது தலையில் பலத்த காயங்களும் காணப்பட்டன.
இதுகுறித்து கொரட்டூர் காவல் நிலைய போலீசார் வழக்குப் பதிவு செய்து விசாரணை நடத்தினர். விசாரணையில், ஸ்வாமிதாஸ் கொலை செய்யப்பட்டு, தடயங்களை மறைக்கும் நோக்கில் அவரது உடல் கிணற்றில் வீசப்பட்டது தெரியவந்ததாகக் கூறப்படுகிறது.
திருமணத்தைத் தாண்டிய உறவால் ஏற்பட்ட தகராறு!
போலீசார் நடத்திய விசாரணையில், லட்சுமி என்பவருடன் ஸ்வாமிதாஸும் முகமது இப்ராஹிமும் திருமணத்தைத் தாண்டிய உறவில் இருந்ததாகவும், இதன் காரணமாக ஏற்பட்ட தகராறே கொலைக்குப் பின்னணியாக இருந்ததாகவும் தெரியவந்ததாகக் கூறப்படுகிறது.
சம்பவத்தன்று ஏற்பட்ட தகராறைத் தொடர்ந்து, ஸ்வாமிதாஸ் முகமது இப்ராஹிமின் வீட்டிற்குச் சென்றதாகக் கூறப்படுகிறது.
அப்போது லட்சுமியும் முகமது இப்ராஹிமும் சேர்ந்து ஸ்வாமிதாஸை மரக்கட்டையால் தலை மற்றும் முகத்தில் தாக்கியதாகவும், பின்னர் அவரது கைகளைக் கட்டி, இடுப்பில் கல்லைக் கட்டி, வீட்டிற்கு எதிரே இருந்த கிணற்றில் சடலத்தை வீசியதாகவும் போலீஸ் விசாரணையில் தெரியவந்ததாகத் தெரிவிக்கப்பட்டுள்ளது.
இந்தக் கொலை தொடர்பாக முகமது இப்ராஹிம் கைது செய்யப்பட்டு சிறையில் அடைக்கப்பட்டார். பின்னர் சிறையிலிருந்து வெளியே வந்த அவர், வழக்கு விசாரணைக்கு ஆஜராகாமல் தலைமறைவானதாகக் கூறப்படுகிறது.
பஞ்சாபில் சுற்றிவளைத்த கொரட்டூர் தனிப்படை போலீசார்
நீண்டகாலமாகத் தலைமறைவாக இருந்த முகமது இப்ராஹிமைப் பிடிக்க, ஆவடி காவல் ஆணையரகத்தின் செங்குன்றம் மாவட்ட காவல் துணை ஆணையாளர் அறிவுறுத்தலின்படி, கொரட்டூர் காவல் ஆய்வாளர் ஜார்ஜ் மில்லர் பொன்ராஜ் தலைமையில் தனிப்படை அமைக்கப்பட்டது.
உதவி ஆய்வாளர் பசிலுதீன் உள்ளிட்ட போலீசார் அவரைத் தேடும் பணியில் தீவிரமாக ஈடுபட்டனர்.
இதில், முகமது இப்ராஹிம் பஞ்சாப் மாநிலத்தில் பதுங்கியிருப்பது கண்டறியப்பட்டது. இதையடுத்து, அங்கு விரைந்த தனிப்படை போலீசார் அவரைக் கைது செய்து சென்னைக்கு அழைத்து வந்தனர்.
பின்னர் நீதிமன்றத்தில் ஆஜர்படுத்தப்பட்ட முகமது இப்ராஹிம், நீதிமன்ற உத்தரவின்படி சிறையில் அடைக்கப்பட்டார்.
கடந்த 2017-ஆம் ஆண்டு நடைபெற்ற ஸ்வாமிதாஸ் கொலை வழக்கில், சிறையிலிருந்து வெளியே வந்த பின்னர் நீண்டகாலமாகத் தலைமறைவாக இருந்த நபரைப் பஞ்சாப் மாநிலம் வரை சென்று கொரட்டூர் தனிப்படை போலீசார் கைது செய்திருப்பது குறிப்பிடத்தக்கது.
முடிச்சூரில் போலி பணப்பரிவர்த்தனை ஸ்கிரீன்ஷாட் மூலம் ரூ.5,200 மோசடி? சிசிடிவி காட்சிகள் வெளியீடு!