மதுரை மாவட்டம் வாடிப்பட்டி மற்றும் சுற்றுவட்டாரப் பகுதிகளில் முதன்முறையாகத் தென்னை மரங்களுக்கு இடையே ஊடுபயிராகக் குத்துச்செடி மிளகு சாகுபடி செய்யும் புதிய முயற்சி தொடங்கப்பட்டுள்ளது. மலைப்பகுதிகளில் மட்டுமே அதிகம் சாகுபடி செய்யப்பட்டு வந்த மிளகை, சமவெளிப் பகுதிகளிலும் பயிரிட முடியும் என்பதை விவசாயிகளுக்கு எடுத்துரைக்கும் வகையில் இந்த விழிப்புணர்வு நிகழ்ச்சி நடத்தப்பட்டது.
தென்னந்தோப்புகளில் மிளகு சாகுபடி!
வாடிப்பட்டி, போடிநாயக்கன்பட்டி மற்றும் சோழவந்தான் பகுதிகளில் உள்ள விவசாய நிலங்களில் இந்த மிளகு செடிகள் நடவு செய்யப்பட்டன. குறிப்பாக வாடிப்பட்டி பகுதியில் உள்ள ‘குமரன் ஃபார்ம்’ உள்ளிட்ட இடங்களில் நடைபெற்ற நடவுப் பணியில், மதுரை அரசு வேளாண்மைக் கல்லூரி மாணவிகள் மற்றும் பாலமேடு அரசு மாதிரி மேல்நிலைப்பள்ளி மாணவ-மாணவிகள் கலந்து கொண்டனர்.
பொதுவாக மிளகு பயிர் மலைப்பிரதேசங்களில் பெரிய மரங்களை ஆதாரமாகக் கொண்டு கொடிகளாகப் படர்ந்து வளரக்கூடியது. ஆனால், தற்போது புதிய முயற்சியாகச் சமவெளிப் பகுதிகளில் தென்னை மரங்களுக்கு இடையே குத்துச்செடி வடிவில் மிளகு சாகுபடி மேற்கொள்ளப்படுகிறது.
மாணவர்களுக்கு நேரடி களப்பயிற்சி!
இந்த நிகழ்ச்சியில் பங்கேற்ற உழவர் உற்பத்தியாளர் குழு செயலாளரும் விவசாயியுமான டாக்டர் அசோக் குமார், இயற்கை முறையில் உரங்களைப் பயன்படுத்தி மிளகு செடிகளை எவ்வாறு நடவு செய்து பராமரிப்பது என்பது குறித்து மாணவ-மாணவிகளுக்கு நேரடி ஆலோசனைகளை வழங்கினார்.
மாணவர்கள் விவசாய நிலங்களுக்குச் சென்று மிளகு செடிகளைத் தாங்களே நடவு செய்து, அதன் சாகுபடி முறைகள் குறித்து நேரடியாகப் பயிற்சி பெற்றனர்.
ஒரு ஏக்கருக்கு 200 மிளகு செடிகள் வரை நடவு செய்யலாம்!
இந்தச் சாகுபடி முறையில் ஒரு ஏக்கருக்கு சுமார் 150 முதல் 200 செடிகள் வரை நடவு செய்ய முடியும் எனத் தெரிவிக்கப்பட்டுள்ளது.
மேலும், ஒரு செடியில் இருந்து 1 முதல் 1.5 கிலோ வரை மிளகு மகசூல் பெற முடியும் என்றும் கூறப்படுகிறது. தற்போது சந்தையில் ஒரு கிலோ மிளகு ரூ.800 முதல் ரூ.1,200 வரை விற்பனை செய்யப்படுவது விவசாயிகளிடையே கூடுதல் ஆர்வத்தை ஏற்படுத்தியுள்ளது.
விவசாயிகளிடையே புதிய எதிர்பார்ப்பு!
மலைப்பகுதிகளில் மட்டுமே சாகுபடி செய்யப்பட்டு வந்த மிளகை, சமவெளிப் பகுதிகளிலும் தென்னைக்கு இடையே ஊடுபயிராகச் சாகுபடி செய்யும் இந்தப் புதிய முயற்சி விவசாயிகளின் கவனத்தை ஈர்த்துள்ளது.
மாணவ-மாணவிகள் நேரடியாக விவசாய நிலங்களுக்குச் சென்று பெற்ற இந்தக் களப்பயிற்சி, அப்பகுதி விவசாயிகள் மற்றும் மாணவர்களிடையே நல்ல வரவேற்பைப் பெற்றுள்ளது.