குளத்து குத்தகை தகராறில் கொடூரம் நெல்லை மாவட்டக் காவல் கண்காணிப்பாளர் விசாரணை தீவிரப்படுத்தல் திருநெல்வேலி மாவட்டம் கூடங்குளம் அருகே பிரபல ரவுடி வெட்டிப் படுகொலை செய்யப்பட்ட சம்பவத்தில், உடன் இருந்து மது அருந்திய நண்பனே சதித்திட்டம் தீட்டி கொலை செய்த அதிர்ச்சித் தகவல் வெளியாகியுள்ளது. இக்கொலைச் சம்பவத்திற்கு உடந்தையாக இருந்த நண்பன் மற்றும் அவரது மனைவியை தனிப்படை போலீசார் கைது செய்துள்ளனர்.
சம்பவம் பின்னணி:
நெல்லை மாவட்டம் கூடங்குளம் அடுத்த கண்ணங்குளம் பகுதியைச் சேர்ந்தவர் செல்வமுருகன் (எ) தூத்துக்குடி செல்வம் (35). இவர் கடந்த 28-ஆம் தேதி இரவு தனது மனைவி கல்பனாவிடம் தோட்டத்திற்குச் சென்று வருவதாகக் கூறிவிட்டுச் சென்றவர், மீண்டும் வீடு திரும்பவில்லை. மறுநாள் அதிகாலை கல்பனா தோட்டத்தில் சென்று பார்த்தபோது, செல்வமுருகன் உடல் முழுவதும் வெட்டுக் காயங்களுடன் சடலமாகக் கிடந்துள்ளார்.
தகவலறிந்த நெல்லை மாவட்டக் காவல் கண்காணிப்பாளர் பாலசுப்பிரமணிய சாஸ்திரி நேரில் சென்று விசாரணை நடத்தினார். கூடங்குளம் காவல்துறையினர் வழக்குப்பதிவு செய்து, குற்றவாளிகளைப் பிடிக்க 3 தனிப்படைகளை அமைத்து தீவிரத் தேடுதல் வேட்டையில் ஈடுபட்டனர்.
கன்னியாகுமரியில் பதுங்கிய ஜோடி கைது:
தனிப்படை போலீசாரின் தீவிர விசாரணையில், கன்னியாகுமரி மாவட்டம் கொட்டாரம் பகுதியைச் சேர்ந்த சந்துரு (28) மற்றும் அவரது மனைவி கௌரி (27) ஆகிய இருவரையும் போலீசார் கைது செய்து காவல் நிலையம் அழைத்து வந்து விசாரணை நடத்தினர்.
விசாரணையில் வெளியான அதிர்ச்சித் தகவல்கள்:
20-க்கும் மேற்பட்ட வழக்குகள்: கொலையான செல்வமுருகன் மற்றும் கைதான சந்துரு இருவருமே நெருங்கிய நண்பர்கள். சந்துரு மீது நெல்லை, கன்னியாகுமரி, தூத்துக்குடி ஆகிய மாவட்ட காவல் நிலையங்களில் கொலை, கொள்ளை உள்ளிட்ட 20-க்கும் மேற்பட்ட வழக்குகள் நிலுவையில் உள்ளன.
குளத்து குத்தகை மோதல்: கன்னியாகுமரி மாவட்டம் கொட்டாரத்தில் உள்ள ஒரு குளத்தை இருவரும் இணைந்து குத்தகைக்கு எடுக்கத் திட்டமிட்டனர். ஆனால், பேச்சுவார்த்தையின் போது அந்த குளத்தை தனியாகத் தான் மட்டுமே குத்தகைக்கு எடுப்பதாகச் செல்வமுருகன் பிடிவாதம் பிடித்துள்ளார். இதற்குச் சந்துருவும் அவரது மனைவியும் எதிர்ப்பு தெரிவித்துத் தங்களுக்கே வேண்டும் எனத் தொடர்ந்து வலியுறுத்தி வந்துள்ளனர்.
மது விருந்து கொடுத்துக் கொடூரம்: சம்பவத்தன்று நள்ளிரவு செல்வமுருகனுக்குச் சொந்தமான தோட்டத்தில் இருவரும் ஒன்றாகச் அமர்ந்து மது அருந்தியுள்ளனர். பின்னர் சந்துரு நான் தூங்கச் செல்கிறேன் எனக் கூறி வெளியேறி, தோட்டத்தின் மறைவான பகுதியில் அட்டை போலப் பதுங்கியிருந்துள்ளார். நள்ளிரவில் செல்வமுருகன் ஆழ்ந்த உறக்கத்தில் இருந்தபோது, மறைத்து வைத்திருந்த அரிவாளால் அவரைச் சரமாரியாக வெட்டிக் படுகொலை செய்துவிட்டுத் தப்பியோடியுள்ளார்.
கொலைக்குத் திட்டம் தீட்டித் தூண்டியதாகவும், கொலையாளி சந்துருவை வீட்டில் மறைத்து வைத்திருந்ததாகவும் அவரது மனைவி கௌரி மீதும் வழக்குப் பதிவு செய்யப்பட்டுள்ளது. தற்போது கைது செய்யப்பட்டுள்ள சந்துரு மற்றும் கௌரி ஆகிய இருவரிடமும் கூடங்குளம் காவல்துறையினர் தொடர்ந்து தீவிர விசாரணை மேற்கொண்டு வருகின்றனர்.