திபெத் – நேபாள எல்லையில் கொடூர வெள்ளப்பெருக்கு: 200-க்கும் மேற்பட்டோர் பரிதாபப் பலி; 1,000 பேர் மாயம்!
இந்தியாவின் அண்டை நாடான நேபாளத்தில், திபெத் எல்லைப் பகுதியை ஒட்டியுள்ள மலைப் பிரதேசங்களில் நேற்று திடீரெனப் பிரம்மாண்டமான சேற்றாற்று வெள்ளப்பெருக்கு ஏற்பட்டது. எதிர்பாராத இந்த இயற்கைச் சீற்றத்தால் ஆற்றுப் படுகைகளில் இருந்த பல அடுக்குக் கட்டிடங்கள், பாலங்கள் மற்றும் வாகனங்கள் அடித்துச் செல்லப்பட்டு அப்பகுதியே உருக்குலைந்துள்ளது.
200 பேரைக் பலி கொண்ட பேரழிவு
திடீரெனப் பொங்கி எழுந்த இந்த வெள்ளப் பெருக்கில் சிக்கி இதுவரை 200-க்கும் மேற்பட்டோர் பரிதாபமாக உயிரிழந்துள்ளதாக முதற்கட்டத் தகவல்கள் தெரிவிக்கின்றன. மேலும் 1,000-க்கும் மேற்பட்ட பேரைக் காணவில்லை என்பதால் உயிரிழப்பு எண்ணிக்கை மேலும் பல மடங்கு அதிகரிக்கக்கூடும் என அஞ்சப்படுகிறது. காணாமல் போனவர்களை மீட்பதற்காக அந்நாட்டு மீட்புப் படையினர் தீவிரத் தேடுதல் பணியில் ஈடுபட்டு வருகின்றனர். இச்சம்பவம் உலக அளவில் பெரும் சோகத்தையும் அதிர்ச்சியையும் ஏற்படுத்தியுள்ளது.
தமிழர்கள் உட்பட 100-க்கும் மேற்பட்ட இந்தியர்கள் தவிப்பு
நேபாளத்திற்குச் சுற்றுலா மற்றும் ஆன்மீக யாத்திரை சென்ற 100-க்கும் மேற்பட்ட இந்தியர்கள் இந்த வெள்ள பாதிப்பில் சிக்கித் தவித்து வருகின்றனர். குறிப்பாக, தமிழகத்திலிருந்து யாத்திரையாகச் சென்ற 80-க்கும் மேற்பட்டோரின் தற்போதைய நிலை என்னவென்று தெரியாததால் அவர்களின் குடும்பத்தினர் மிகுந்த அச்சத்திலும் சோகத்திலும் ஆழ்ந்துள்ளனர்.
ஜக்கி வாசுதேவ் வேதனை
’இந்த நிலையில், ஈஷா யோகா மையம் சார்பில் யாத்திரை சென்ற 80 பேருடனான அனைத்துத் தொடர்புகளும் துண்டிக்கப்பட்டுள்ளதாக அதன் நிறுவனர் ஜக்கி வாசுதேவ் வேதனையுடன் தெரிவித்துள்ளார். திபெத்தின் சாகா பகுதியில் இருந்து இது குறித்து அவர் கூறியிருப்பதாவது, “திபெத் – நேபாள எல்லைப் பகுதியில் மிகக் கொடூரமான திடீர் வெள்ளப்பெருக்கு ஏற்பட்டுள்ளது. இந்தியச் செய்தி அறிக்கைகளின்படி நேபாளப் பகுதியில் சுமார் 484 பேர் காணாமல் போயுள்ளதாகத் தெரிகிறது. ஆனால், நாங்கள் இருக்கும் இந்தப் பகுதியில் அதுகுறித்த எந்தவொரு அதிகாரப்பூர்வமான தகவலும் இன்னும் கிடைக்கவில்லை.
ஈஷா மையம் சார்பில் சென்ற 80 பேரையும் தற்போது வரை தொடர்புகொள்ள முடியவில்லை. அனைத்துத் தொலைபேசிகளும் சுவிட்ச்-ஆஃப் செய்யப்பட்டுள்ளன. அப்பகுதியில் தொலைத்தொடர்பு வசதிகள் முற்றிலுமாக முடங்கியுள்ளன; சாலைகளும் துண்டிக்கப்பட்டுள்ளதால் எங்களால் நேரடியாக அங்கு செல்ல முடியாத சூழல் நிலவுகிறது.”
பல்வேறு நாடுகளைச் சேர்ந்த 80 யாத்திரிகர்கள்
காணாமல் போன 80 பேர் கொண்ட இந்தக் குழுவில் பல வெளிநாடுகளைச் சேர்ந்த ஆன்மீக அன்பர்களும் இடம்பெற்றுள்ளது தெரியவந்துள்ளது:
- அமெரிக்கா: 22 பேர்
- கனடா: 12 பேர்
- ஆஸ்திரேலியா: 11 பேர்
- லண்டன் (இங்கிலாந்து): 9 பேர்
- ஜெர்மனி: 4 பேர்
- பிரான்ஸ் & நேபாளம்: தலா 3 பேர்
- நெதர்லாந்து, நியூசிலாந்து, சிங்கப்பூர், ஸ்பெயின்: தலா 2 பேர்
- பின்லாந்து, ஹங்கேரி, இஸ்ரேல், லிதுவேனியா, பிலிப்பைன்ஸ், போர்ச்சுகல், ரஷ்யா & தென்னாப்பிரிக்கா: தலா ஒருவர்
மீட்புப் பணிக்கு அனுமதி கோரிக்கை
அதிகாரப்பூர்வத் தகவல்கள் எதுவும் உடனடியாகக் கிடைக்காத நிலையில், தங்களால் முடிந்த அனைத்து முயற்சிகளையும் செய்து வருவதாகத் தெரிவித்த ஜக்கி வாசுதேவ், “இந்தியாவில் உள்ள இந்தியத் தூதரகம் மற்றும் சீனத் தூதரகம் மூலம் பாதிக்கப்பட்ட பகுதிக்குச் செல்ல அனுமதி கோரி வருகிறோம். காணாமல் போன அன்புக்குரியவர்களைத் தேடும் பணியில் ஈடுபட நானும், தன்னார்வலர்கள் அடங்கிய சிறிய குழுவும் ‘கியிரோங்’ பகுதிக்குச் செல்ல உடனடியாக அனுமதி அளிக்க வேண்டும்” எனத் தூதரகங்களுக்கு வேண்டுகோள் விடுத்துள்ளார்.