டெல்லி மற்றும் தேசிய தலைநகர் பிராந்தியத்தில் (Delhi-NCR) குளிர்காலத்தில் அதிகரிக்கும் காற்று மாசுபாட்டைக் கட்டுப்படுத்தும் வகையில், நவம்பர் 1 முதல் பல்வேறு புதிய கட்டுப்பாடுகள் அமலுக்கு வந்துள்ளன. பழைய வாகனங்களுக்குத் தடை, அரசு மற்றும் தனியார் அலுவலகங்களில் 50 சதவீத ஊழியர்கள் வீட்டிலிருந்து வேலை செய்யும் நடைமுறை, கட்டுமானப் பணிகளுக்குக் கட்டுப்பாடு உள்ளிட்ட நடவடிக்கைகள் அறிவிக்கப்பட்டுள்ளன.
குளிர்காலத்தில் டெல்லியில் காற்றின் தரம் மோசமடைவதைத் தடுக்கும் நோக்கில் இந்த நடவடிக்கைகள் எடுக்கப்பட்டுள்ளன. முக்கியக் கட்டுப்பாடுகள் 2027 ஜனவரி 31-ம் தேதி வரை அமலில் இருக்கும் என அறிவிக்கப்பட்டுள்ளது.
1. பழைய வாகனங்களுக்கு டெல்லிக்குள் நுழையத் தடை!
டெல்லிக்கு வெளியே பதிவு செய்யப்பட்டு, பிஎஸ்-6 (BS-VI) மாசு உமிழ்வு தரநிலையைப் பூர்த்தி செய்யாத வாகனங்கள் டெல்லிக்குள் நுழையத் தடை விதிக்கப்பட்டுள்ளது.
இந்தக் கட்டுப்பாடு நவம்பர் 1 முதல் ஜனவரி 31, 2027 வரை அமலில் இருக்கும். இதனால் நொய்டா, குருகிராம், பரிதாபாத், காசியாபாத் உள்ளிட்ட பகுதிகளில் இருந்து டெல்லிக்கு வரும் பழைய பெட்ரோல் மற்றும் டீசல் வாகனங்கள் பாதிக்கப்படலாம்.
எனினும், மின்சார வாகனங்கள், சிஎன்ஜி வாகனங்கள் மற்றும் ஆம்புலன்ஸ், தீயணைப்பு வாகனங்கள் போன்ற அவசரகால சேவை வாகனங்களுக்கு விலக்கு அளிக்கப்பட்டுள்ளது.
2. அரசு, தனியார் அலுவலகங்களில் 50 சதவீதம் WFH!
காற்று மாசுபாட்டைக் குறைப்பதற்காக அரசு மற்றும் தனியார் அலுவலகங்களில் ஒரே நேரத்தில் 50 சதவீத ஊழியர்கள் மட்டுமே நேரடியாகப் பணிக்கு வர வேண்டும் என அறிவுறுத்தப்பட்டுள்ளது. மீதமுள்ள 50 சதவீத ஊழியர்கள் வீட்டிலிருந்து பணியாற்ற வேண்டும்.
அத்தியாவசிய சேவைகளான மருத்துவமனைகள், தீயணைப்புத் துறை, மின்சாரம், குடிநீர், பொதுப் போக்குவரத்து மற்றும் சுகாதாரப் பணிகள் உள்ளிட்ட துறைகளுக்கு இந்தக் கட்டுப்பாட்டிலிருந்து விலக்கு அளிக்கப்பட்டுள்ளது.
3. கட்டுமானம் மற்றும் இடிப்புப் பணிகளுக்குத் தடை!
காற்றில் தூசி பரவுவதைத் தடுக்கும் வகையில், நவம்பர் 1 முதல் ஜனவரி 31 வரை தூசியை உருவாக்கும் கட்டிட இடிப்பு மற்றும் வெளிப்புறக் கட்டுமானப் பணிகளுக்குத் தடை விதிக்கப்பட்டுள்ளது.
அத்தியாவசிய பொதுக் கட்டமைப்புத் திட்டங்களுக்கு குறிப்பிட்ட நிபந்தனைகளுடன் விலக்கு அளிக்கப்படலாம். கட்டிடங்களுக்குள் நடைபெறும் மின் இணைப்பு, பிளம்பிங் மற்றும் இறுதிக்கட்டப் பணிகள் தூசி கட்டுப்பாட்டு விதிகளைப் பின்பற்றி மேற்கொள்ள அனுமதிக்கப்படும்.
4. அரசு அலுவலகங்களின் வேலை நேரம் மாற்றம்!
போக்குவரத்து நெரிசலைக் குறைக்கும் நோக்கில் டெல்லியில் அரசு அலுவலகங்களின் வேலை நேரமும் மாற்றப்பட்டுள்ளது.
– டெல்லி மாநகராட்சி அலுவலகங்கள்: காலை 8.30 மணி முதல் மாலை 5 மணி வரை.
– டெல்லி அரசு அலுவலகங்கள்: காலை 10 மணி முதல் மாலை 6.30 மணி வரை.
வெவ்வேறு நேரங்களில் அலுவலகங்கள் செயல்படுவதன் மூலம் ஒரே நேரத்தில் ஏற்படும் போக்குவரத்து நெரிசலைக் குறைக்கத் திட்டமிடப்பட்டுள்ளது.
5. பார்க்கிங் கட்டணம் உயர்வு!
தனியார் வாகனப் பயன்பாட்டைக் குறைத்து, பொதுப் போக்குவரத்தைப் பயன்படுத்துவதை ஊக்குவிக்கும் வகையில் பல்வேறு பொது வாகன நிறுத்துமிடங்களில் பார்க்கிங் கட்டணம் இரட்டிப்பாக்கப்பட்டுள்ளது.
டெல்லி மெட்ரோ ரயில் நிர்வாகத்தின் (DMRC) கட்டுப்பாட்டில் உள்ள பார்க்கிங் இடங்களுக்கு இந்தக் கட்டண உயர்விலிருந்து விலக்கு அளிக்கப்பட்டுள்ளது.
6. PUC சான்றிதழ் இல்லையெனில் எரிபொருள் கிடையாது!
டெல்லியில் ‘No PUC, No Fuel’ என்ற புதிய நடைமுறையும் அமல்படுத்தப்பட்டுள்ளது. அதன்படி, செல்லுபடியாகும் மாசுக் கட்டுப்பாட்டுச் சான்றிதழ் (PUC) இல்லாத வாகனங்களுக்கு பெட்ரோல், டீசல் மற்றும் சிஎன்ஜி வழங்கப்படாது.
இதைக் கண்காணிக்க சுமார் 500 பெட்ரோல் நிலையங்களில் தானியங்கி வாகனப் பதிவு எண் கண்டறியும் (ANPR) கேமராக்கள் பொருத்தப்பட்டுள்ளன. இதன் மூலம் வாகனங்களின் பதிவு எண் மற்றும் PUC சான்றிதழ் விவரங்கள் சரிபார்க்கப்படும்.
கண்காணிப்பு தீவிரம் – விதிகளை மீறினால் அபராதம்!
புதிய கட்டுப்பாடுகளை அமல்படுத்த சிறப்புக் கண்காணிப்புக் குழுக்கள் அமைக்கப்பட்டுள்ளன. ANPR கேமராக்கள் மற்றும் செயற்கை நுண்ணறிவு தொழில்நுட்பத்துடன் கூடிய ஒருங்கிணைந்த கட்டுப்பாட்டு மையம் மூலமாக விதிமீறல்கள் கண்காணிக்கப்படும். விதிகளை மீறும் வாகனங்களுக்கு மின்னணு அபராதம் (E-Challan) விதிக்கப்படும் என அறிவிக்கப்பட்டுள்ளது.
டெல்லியில் குளிர்காலக் காற்று மாசுபாட்டைக் கட்டுப்படுத்த அறிவிக்கப்பட்டுள்ள இந்த நடவடிக்கைகள் வாகன ஓட்டிகள், அலுவலக ஊழியர்கள் மற்றும் கட்டுமானத் துறையினரிடம் பல்வேறு மாற்றங்களை ஏற்படுத்தும் என எதிர்பார்க்கப்படுகிறது.
மம்தா பானர்ஜியை நேரில் சந்தித்த அபிஜித் தீப்கே: இந்தியா கூட்டணி பேரணிக்கு ஆதரவு!