சாலைகளில் ஏற்படும் பள்ளங்களால் பொதுமக்கள் சந்திக்கும் பிரச்சினைகளுக்கு தொழில்நுட்பம் மூலம் தீர்வு காணும் முயற்சியில் 16 வயது டெல்லி மாணவர் ஒருவர் சர்வதேச கவனத்தை ஈர்த்துள்ளார்.
டெல்லியைச் சேர்ந்த பார்த்த் ஆனந்த் உருவாக்கியுள்ள “Project Sadak” என்ற AI அடிப்படையிலான தளம், சாலையில் உள்ள பள்ளங்களை பொதுமக்கள் புகைப்படம் எடுத்து புகார் அளிக்கவும், அந்தப் பள்ளத்தை எந்த அரசு அமைப்பு சரிசெய்ய வேண்டும் என்பதை கண்டறிந்து புகார் அனுப்பவும் உதவுகிறது.
பெற்றோருக்கு ஏற்பட்ட விபத்து – உருவான புதிய முயற்சி!
கடந்த 2025-ம் ஆண்டு அக்டோபரில் பார்த்த் ஆனந்தின் பெற்றோர் இருசக்கர வாகனத்தில் சென்றபோது சாலையில் இருந்த பள்ளத்தில் வாகனம் சிக்கி விபத்துக்குள்ளானது. இதில் இருவருக்கும் எலும்பு முறிவு உள்ளிட்ட காயங்கள் ஏற்பட்டன.
இந்த சம்பவத்துக்குப் பிறகு சாலையில் உள்ள பள்ளங்கள் குறித்து அவர் ஆய்வு செய்யத் தொடங்கினார். ஏற்கனவே இருந்த புகார் அமைப்புகளில் புகார் அளித்தாலும், அவை எப்போது சரிசெய்யப்படும் என்பதை பொதுமக்கள் தெரிந்துகொள்ள முடியாத நிலை இருப்பதை அவர் கவனித்தார்.
இதையடுத்து, பள்ளங்களைப் பதிவு செய்வது மட்டுமின்றி, அவற்றின் நிலையை தொடர்ந்து கண்காணிக்கும் வகையில் Project Sadak தளத்தை உருவாக்கத் தொடங்கினார்.
AI எப்படி செயல்படுகிறது?
Project Sadak தளத்தில் ஒருவர் சாலையில் உள்ள பள்ளத்தின் புகைப்படம் மற்றும் அதன் இருப்பிடத்தை பதிவேற்ற வேண்டும்.
அதன்பிறகு AI தொழில்நுட்பம் அந்தப் புகைப்படத்தை ஆய்வு செய்து, அது உண்மையில் சாலைப் பள்ளமா என்பதை கண்டறிகிறது. ஏற்கனவே அதே பள்ளம் குறித்து புகார் அளிக்கப்பட்டுள்ளதா என்பதையும் சரிபார்க்கிறது.
பின்னர் அந்தச் சாலை எந்த அரசு அல்லது உள்ளாட்சி அமைப்பின் கட்டுப்பாட்டில் உள்ளது என்பதை AI கண்டறிந்து, சம்பந்தப்பட்ட அதிகாரியிடம் புகாரை அனுப்புகிறது.
இதன் மூலம் ஒரே பள்ளம் குறித்து பலமுறை புகார்கள் செல்வதைத் தவிர்த்து, அதிகாரிகளுக்கு முன்னுரிமைப்படுத்தப்பட்ட புகார் பட்டியலை வழங்க முடிகிறது.
பள்ளம் சரிசெய்யப்பட்டதா என்பதையும் கண்காணிக்கும்!
Project Sadak-ன் சிறப்பம்சம் புகார் அளிப்பதுடன் முடிவதில்லை.
பொதுமக்கள் புகார் அளித்த பள்ளங்கள் ஒரு பொது வரைபடத்தில் காட்டப்படுகின்றன. இதன் மூலம் அந்தப் பள்ளம் எவ்வளவு காலமாக சரிசெய்யப்படாமல் உள்ளது என்பதையும் கண்காணிக்க முடியும்.
மேலும், சாலை சரிசெய்யப்பட்டதாக அதிகாரப்பூர்வமாக தெரிவிக்கப்பட்ட பிறகு, முன்பு எடுக்கப்பட்ட புகைப்படத்தையும், சரிசெய்த பிறகு எடுக்கப்பட்ட புகைப்படத்தையும் ஒப்பிட்டு உண்மையில் பள்ளம் சரிசெய்யப்பட்டுள்ளதா என்பதையும் இந்த அமைப்பு சரிபார்க்கிறது.
1,900-க்கும் மேற்பட்ட பள்ளங்கள் பதிவு!
சமீபத்திய தகவல்களின்படி, Project Sadak தளத்தில் இதுவரை 1,900-க்கும் மேற்பட்ட சாலைப் பள்ளங்கள் குறித்த புகார்கள் பதிவாகியுள்ளன.
அவற்றில் 30 பள்ளங்கள் சரிசெய்யப்பட்டதாக உறுதி செய்யப்பட்டுள்ளது. டெல்லி மட்டுமின்றி பெங்களூரு உள்ளிட்ட இந்தியாவின் பல பகுதிகளிலும் இந்த தளம் பயன்படுத்தப்பட்டு வருகிறது.
இந்தியாவைத் தாண்டி சர்வதேச கவனம்!
பார்த்த் ஆனந்தின் முயற்சி தற்போது இந்தியாவைத் தாண்டியும் கவனம் பெற்றுள்ளது.
டெல்லி மாநகராட்சி (MCD) உடன் இணைந்து செயல்படுவதற்கான பேச்சுவார்த்தைகள் நடைபெற்று வருவதாகவும், பிஜி நாட்டின் Fiji Roads Authority உடன் 90 நாள் முன்னோடி திட்டத்தை செயல்படுத்தும் வகையில் முன்மொழிவு அளிக்கப்பட்டுள்ளதாகவும் தெரிவிக்கப்பட்டுள்ளது.
லைபீரியாவின் National Road Fund உடனும் ஆரம்பகட்ட பேச்சுவார்த்தைகள் நடைபெற்று வருகின்றன. இதன் மூலம் ஒரு பள்ளத்தை புகாரளிக்கும் சாதாரண செயலியைத் தாண்டி, உலக அளவில் சாலைப் பராமரிப்பில் வெளிப்படைத்தன்மையை உருவாக்கும் முயற்சியாக Project Sadak மாறி வருகிறது.
தொழில்நுட்பத்தைத் தாண்டி மனித முயற்சியும் அவசியம்!
AI மூலம் பள்ளத்தை கண்டறிந்து, சரியான அதிகாரியிடம் புகார் அனுப்ப முடிந்தாலும், இறுதியில் அந்தப் பள்ளத்தை சரிசெய்ய அதிகாரிகள் நடவடிக்கை எடுக்க வேண்டும்.
சில இடங்களில் புகார் அளித்த சில நாட்களிலேயே பள்ளங்கள் சரிசெய்யப்பட்டதாகவும், சில பகுதிகளில் தொடர்ந்து அதிகாரிகளைத் தொடர்புகொள்ள வேண்டிய நிலை இருப்பதாகவும் பார்த்த் ஆனந்த் தெரிவித்துள்ளார்.
ஒரு மாணவரின் தனிப்பட்ட அனுபவத்தில் தொடங்கிய இந்த முயற்சி, தற்போது AI, குடிமக்கள் பங்கேற்பு மற்றும் அரசு பொறுப்புணர்வு ஆகியவற்றை இணைக்கும் தொழில்நுட்ப முயற்சியாக சர்வதேச கவனத்தைப் பெற்றுள்ளது.