உலகின் நம்பர் 1 நாடாக இந்தியா உருவாக வேண்டும் என்பதன் நோக்கம், மற்ற நாடுகளுக்கு நிபந்தனைகளை விதிப்பது அல்ல; இந்தியாவின் மீது எந்த நாடும் தேவையற்ற நிபந்தனைகளைத் திணிக்கக் கூடாது என்பதே என்று குடியரசுத் துணைத் தலைவர் சி.பி. ராதாகிருஷ்ணன் தெரிவித்துள்ளார்.

ஒடிசா மாநிலம் கட்டாக்கில் உள்ள ஸ்ரீ ஸ்ரீ பல்கலைக்கழக வளாகத்தில் புதிதாகக் கட்டப்பட்டுள்ள ‘ஐகானிக் டவர்’ கல்விக் கட்டிடத்தைத் திறந்து வைத்து அவர் உரையாற்றினார்.
அப்போது பேசிய அவர், உலகின் நம்பர் 1 நாடாக இந்தியா உருவாக வேண்டும் என்று நாம் ஏன் விரும்புகிறோம் என்ற கேள்வி பலருக்கும் இருப்பதாகக் குறிப்பிட்டார். மற்ற நாடுகளுக்கு நிபந்தனைகளை விதிக்க வேண்டும் என்பது இந்தியாவின் நோக்கம் அல்ல என்றும், அதே நேரத்தில் இந்தியாவின் மீது யாரும் தேவையற்ற நிபந்தனைகளை விதிக்கக் கூடாது என்பதே இதன் அடிப்படை நோக்கம் என்றும் விளக்கினார்.
2047-ல் வளர்ச்சியடைந்த இந்தியா
இந்தியா சுதந்திரம் அடைந்து 100 ஆண்டுகள் நிறைவடையும் 2047-ம் ஆண்டில், தன்னம்பிக்கை, திறன் மற்றும் உலகளாவிய தலைமைத்துவத்துடன் வளர்ச்சியடைந்த நாடாக உருவெடுக்க வேண்டும் என்று அவர் தெரிவித்தார்.
மற்றவர்களுக்கு உதவுவதும், அனைவரையும் ஒன்றிணைத்துச் செல்வதும் இந்தியக் கலாசாரத்தின் முக்கியமான பண்புகள் என்றும் அவர் கூறினார்.
உயர்கல்வித் துறையில் வளர்ச்சி
பிரதமர் நரேந்திர மோடியின் முயற்சிகளால் கடந்த 12 ஆண்டுகளில் உயர்கல்வித் துறையில் குறிப்பிடத்தக்க வளர்ச்சி ஏற்பட்டுள்ளதாக சி.பி. ராதாகிருஷ்ணன் தெரிவித்தார்.
2014-ம் ஆண்டில் 760 ஆக இருந்த பல்கலைக்கழகங்களின் எண்ணிக்கை தற்போது 1,400 ஆக உயர்ந்துள்ளதாகவும், ஐஐடி நிறுவனங்களின் எண்ணிக்கை 16-ல் இருந்து 23 ஆகவும், ஐஐஎம் நிறுவனங்களின் எண்ணிக்கை 13-ல் இருந்து 22 ஆகவும், எய்ம்ஸ் மருத்துவமனைகளின் எண்ணிக்கை 7-ல் இருந்து 13 ஆகவும் அதிகரித்துள்ளதாகவும் அவர் குறிப்பிட்டார்.
மேலும், உயர்கல்வி பயிலும் மாணவர்களின் எண்ணிக்கை 3.42 கோடியில் இருந்து 4.5 கோடியாக உயர்ந்துள்ளதாகவும் தெரிவித்தார்.
பெண்கள் கல்விக்கு முக்கியத்துவம்
கல்வி நிறுவனங்களில் மாணவிகள் சிறப்பாகச் செயல்பட்டு, அதிக பதக்கங்களைப் பெற்று வருவது நாட்டில் பெண்களின் வளர்ந்து வரும் ஆற்றலை வெளிப்படுத்துவதாக அவர் கூறினார்.
பெண்களுக்கு முறையான கல்வி வழங்கினால், அவர்கள் தங்களது திறமையால் முன்னேறி சமூகத்தையும் மேம்படுத்துவார்கள் என்றும் தெரிவித்தார்.
இந்த நிகழ்ச்சியில் ஒடிசா ஆளுநர் பிரஜா பூஷண் ஹரிசந்தன், முதலமைச்சர் மோகன் சரண் மாஜி, ஸ்ரீ ஸ்ரீ பல்கலைக்கழகத்தின் நிறுவனர் ஸ்ரீ ஸ்ரீ ரவிசங்கர் உள்ளிட்டோர் கலந்து கொண்டனர்.
இந்தியாவின் முயற்சிகளால் உலகம் முழுவதும் பிரபலமான யோகா! – பிரதமர் மோடி பெருமிதம்
