Homeசெய்திகள்இந்தியாநாடாளுமன்ற குளிர்கால கூட்டத்தொடர் எப்போது தொடங்கும்? – டிசம்பர் முதல் வாரத்தில் நடத்த திட்டம்!

நாடாளுமன்ற குளிர்கால கூட்டத்தொடர் எப்போது தொடங்கும்? – டிசம்பர் முதல் வாரத்தில் நடத்த திட்டம்!

-

- Advertisement -

நாடாளுமன்றத்தின் குளிர்கால கூட்டத்தொடர் டிசம்பர் மாதம் முதல் வாரத்தில் தொடங்க வாய்ப்புள்ளதாக தகவல்கள் வெளியாகியுள்ளன. இதற்கான அதிகாரப்பூர்வ தேதிகள் இன்னும் அறிவிக்கப்படாத நிலையில், கூட்டத்தொடரை நடத்துவதற்கான ஆலோசனைகள் நடைபெற்று வருவதாக கூறப்படுகிறது.

நாடாளுமன்றத்தின் மழைக்கால கூட்டத்தொடர் கடந்த ஆகஸ்ட் 13-ஆம் தேதி தேதி குறிப்பிடாமல் ஒத்திவைக்கப்பட்டது. இருப்பினும், அந்தக் கூட்டத்தொடர் இதுவரை முறைப்படி நிறைவு செய்யப்படவில்லை. இதனால் அடுத்த கூட்டத்தொடர் எப்போது தொடங்கும் என்ற எதிர்பார்ப்பு நிலவி வருகிறது.

டிசம்பர் முதல் வாரத்தில் தொடங்க வாய்ப்பு

மத்திய அரசு நாடாளுமன்ற குளிர்கால கூட்டத்தொடரை டிசம்பர் முதல் வாரத்தில் தொடங்குவது குறித்து ஆலோசித்து வருவதாக அரசு வட்டாரங்களை மேற்கோள் காட்டி தகவல்கள் வெளியாகியுள்ளன. அதே நேரத்தில், எதிர்க்கட்சிகளுக்கு கூட்டத்தொடர் தொடர்பான அதிகாரப்பூர்வ அறிவிப்பு இதுவரை வழங்கப்படவில்லை என எதிர்க்கட்சித் தலைவர்கள் தெரிவித்துள்ளனர்.

கடந்த ஆண்டில் டிசம்பர் 1-ஆம் தேதி தொடங்கிய குளிர்கால கூட்டத்தொடர், டிசம்பர் 19-ஆம் தேதி நிறைவடைந்தது. இந்த ஆண்டு கூட்டத்தொடருக்கான தேதிகள் மற்றும் கால அளவு இன்னும் உறுதி செய்யப்படவில்லை.

தொகுதி மறுவரையறை மசோதா முக்கியத்துவம் பெறுமா?

வரவிருக்கும் கூட்டத்தொடரில் தொகுதி மறுவரையறை தொடர்பான அரசியலமைப்புத் திருத்த மசோதாவை முன்னெடுக்க மத்திய அரசு திட்டமிட்டுள்ளதாக கூறப்படுகிறது. இதனுடன் நாடாளுமன்றம் மற்றும் மாநில சட்டமன்றங்களில் பெண்களுக்கு 33 சதவீத இடஒதுக்கீடு வழங்குவது தொடர்பான விவகாரமும் முக்கியத்துவம் பெறும் என எதிர்பார்க்கப்படுகிறது.

தொகுதி மறுவரையறை மூலம் மக்களவையின் உறுப்பினர்களின் எண்ணிக்கையை தற்போதைய 543-ல் இருந்து அதிகபட்சமாக 850 வரை உயர்த்தும் வகையிலான முன்மொழிவும் விவாதத்தில் உள்ளது.

இந்த அரசியலமைப்புத் திருத்த மசோதாவை நிறைவேற்ற மக்களவையில் மூன்றில் இரண்டு பங்கு ஆதரவு தேவைப்படும். எனவே, ஆளும் தேசிய ஜனநாயகக் கூட்டணிக்கு எதிர்க்கட்சிகளின் ஆதரவும் அவசியமாகலாம்.

எதிர்க்கட்சிகளின் எதிர்ப்பு – எஸ்.ஐ.ஆர். விவகாரம்

வாக்காளர் பட்டியல் சிறப்பு தீவிர திருத்தம் (SIR) தொடர்பாக எதிர்க்கட்சிகள் தொடர்ந்து எதிர்ப்புத் தெரிவித்து வருகின்றன. இந்த விவகாரம் நாடாளுமன்றக் கூட்டத்தொடரிலும் எதிரொலிக்க வாய்ப்புள்ளதாக அரசியல் வட்டாரங்கள் தெரிவிக்கின்றன.

இதனால் தொகுதி மறுவரையறை, மகளிர் இடஒதுக்கீடு மற்றும் வாக்காளர் பட்டியல் திருத்தம் உள்ளிட்ட விவகாரங்கள் குளிர்கால கூட்டத்தொடரில் முக்கிய விவாதப் பொருள்களாக அமையும் என எதிர்பார்க்கப்படுகிறது.

எனினும், நாடாளுமன்ற குளிர்கால கூட்டத்தொடர் தொடங்கும் தேதி மற்றும் நிறைவடையும் நாள் குறித்த அதிகாரப்பூர்வ அறிவிப்பு வெளியாகும் வரை இறுதி அட்டவணை உறுதி செய்யப்படவில்லை.

நவம்பர் 23-ல் கூடுகிறது நாடாளுமன்ற சிறப்புக் கூட்டத்தொடர்: தொகுதி மறுவரையறை மசோதாவை மீண்டும் தாக்கல் செய்ய மத்திய அரசு திட்டம்!

MUST READ