காங்கிரஸ் மூத்த தலைவர் சோனியா காந்தியின் நினைவுக் குறிப்புகள் நூல் வெளியீட்டு விழாவில், தனது பல்கலைக்கழகக் கால நினைவுகளையும், கேம்பிரிட்ஜில் நடைபெற்ற சுவாரஸ்யமான சம்பவம் ஒன்றையும் மக்களவை எதிர்க்கட்சித் தலைவர் ராகுல் காந்தி பகிர்ந்துகொண்டார்.

சோனியா காந்தி எழுதியுள்ள *‘Belonging: A Journey of Love’* என்ற நூல் வெளியீட்டு நிகழ்ச்சி திங்கள்கிழமை (நவம்பர் 16) புதுடெல்லியில் நடைபெற்றது.
இதில் பங்கேற்றுப் பேசிய ராகுல் காந்தி, தனது பெற்றோரான முன்னாள் பிரதமர் ராஜீவ் காந்தியும் சோனியா காந்தியும் முதன்முதலில் சந்தித்துக்கொண்ட கேம்பிரிட்ஜ் நகரில் உள்ள ‘வார்சிட்டி’ உணவகம் குறித்த நினைவுகளைப் பகிர்ந்தார்.
பெற்றோர் சந்தித்த உணவகத்துக்குச் சென்ற ராகுல்:
தனது பெற்றோர் கேம்பிரிட்ஜில் உள்ள வார்சிட்டி உணவகத்தில்தான் முதன்முதலில் சந்தித்துக்கொண்டதாகப் பல கதைகள் உலவுவதாகக் குறிப்பிட்ட ராகுல் காந்தி, பல ஆண்டுகளுக்குப் பிறகு தான் கேம்பிரிட்ஜ் சென்றபோது, அப்போது தன்னுடன் இருந்த காதலியிடம் அந்த உணவகத்துக்குச் செல்லலாம் எனக் கூறியதாகத் தெரிவித்தார்.
அந்த உணவகத்துக்குச் சென்றதும், அங்கிருந்த ஊழியரிடம் தனது பெற்றோர் இங்குதான் சந்தித்துக்கொண்டார்கள் என்று கூறியுள்ளார். உடனே அந்த ஊழியர், அவர்களைத் தனக்குத் தெரியும் எனப் பதிலளித்ததாக ராகுல் காந்தி சுவாரஸ்யமாக விவரித்தார்.
பின்னர் உணவகத்தில் என்ன உணவு சாப்பிடலாம் எனக் கேட்டபோது, ‘சிக்கன் சாசர்’ உணவைப் பரிந்துரைத்ததாகவும் அவர் கூறினார்.
இதையடுத்து, “காதலில் விழ வேண்டும் என்றால் வார்சிட்டி உணவகத்துக்குச் செல்லுங்கள்; ஆனால் சிக்கன் சாசரை மட்டும் சாப்பிடாதீர்கள்” என்று நகைச்சுவையாகக் குறிப்பிட்டார். இதனால் அரங்கில் சிரிப்பலை எழுந்தது.
“அவர் இப்போது என் தோழி”
இந்தச் சம்பவத்தில் தன்னுடன் சென்ற பெண் யார் என்று பின்னர் கேட்கப்பட்டபோது, “அவர் இப்போது என் தோழி” என்று ராகுல் காந்தி சிரித்தபடி பதிலளித்தார்.
நகைச்சுவையான இந்த நினைவுகளைப் பகிர்ந்துகொண்ட அவர், தனது பெற்றோருக்கு இடையே இருந்த ஆழமான அன்பு மற்றும் பாசம் குறித்தும் பேசினார்.
ராஜீவ் காந்தி – சோனியா காந்தி தம்பதியினரின் உறவு தனது குழந்தைப் பருவத்திலும் குடும்ப வாழ்க்கையிலும் ஏற்படுத்திய தாக்கத்தை நினைவுகூர்ந்தார்.
சோனியா காந்தியின் வாழ்க்கைப் பயணம், குடும்ப உறவுகள், இழப்புகள் மற்றும் இந்தியாவில் அவர் உருவாக்கிக்கொண்ட பிணைப்பு ஆகியவற்றை விவரிக்கும் இந்த நூல் வெளியீட்டு விழாவில் ராகுல் காந்தி பகிர்ந்துகொண்ட கேம்பிரிட்ஜ் நினைவு, நிகழ்ச்சியின் கலகலப்பான தருணங்களில் ஒன்றாக அமைந்தது.
“இந்தியாவில் 2014-ம் ஆண்டே ஜனநாயகம் அழிக்கப்பட்டு விட்டது” – ராகுல் காந்தி குற்றச்சாட்டு
