கேரளாவில் 60 ஆண்டுகளுக்கும் மேலாக லாட்டரி சீட்டுகளை வாங்கி வரும் 80 வயது முதிய விவசாயி, இதுவரை சுமார் ரூ.2 கோடி வரை லாட்டரி சீட்டுகளுக்காக செலவு செய்துள்ளதாக கூறப்படும் சம்பவம் கவனம் பெற்றுள்ளது.
கேரள மாநிலம் கண்ணூர் மாவட்டம் கரிவெல்லூர் அருகே உள்ள பாலக்குண்ணு பகுதியைச் சேர்ந்தவர் பி.பி. ராகவன். விவசாயம் செய்து வரும் இவர், கடந்த 1967-ம் ஆண்டு முதல் லாட்டரி சீட்டுகளை வாங்கி வருவதாக தெரிவிக்கப்பட்டுள்ளது.
பம்பர் பரிசு கிடைக்கும் என்ற நம்பிக்கை
ஒருநாள் நிச்சயம் பெரிய அளவில் பம்பர் பரிசு கிடைக்கும் என்றும், அதன் மூலம் தனது வாழ்க்கை மாறிவிடும் என்றும் நம்பி ராகவன் தொடர்ந்து லாட்டரி சீட்டுகளை வாங்கி வந்துள்ளார்.
இந்த லாட்டரி பழக்கத்திற்காக தனது விவசாய நிலம் மற்றும் மனைவியின் நகைகள் உள்ளிட்டவற்றையும் இழந்ததாக அவர் கூறியுள்ளார். பல ஆண்டுகளாக லாட்டரி சீட்டுகளை வாங்கிய போதிலும் எதிர்பார்த்த அளவுக்கு பெரிய பரிசுத்தொகை எதுவும் கிடைக்கவில்லை.
ரூ.2 கோடி செலவு.. கிடைத்தது ஆயிரங்களில் மட்டுமே!
சுமார் 60 ஆண்டுகளாக லாட்டரி சீட்டுகளை வாங்கி வரும் ராகவன், இதுவரை ரூ.2 கோடி வரை செலவு செய்துள்ளதாக கூறப்படுகிறது. அவருக்கு சில முறை லாட்டரி பரிசுகள் கிடைத்துள்ளன. ஆனால், அந்த பரிசுகள் ஆயிரக்கணக்கான ரூபாய் அளவில் மட்டுமே இருந்ததாக தெரிவிக்கப்பட்டுள்ளது.
இதனால் அவர் கடன் சுமைக்கும் ஆளாகியுள்ளார். இருந்தபோதிலும், ஒரு நாள் மிகப்பெரிய பரிசு கிடைக்கும் என்ற நம்பிக்கையை அவர் கைவிடாமல் தொடர்ந்து லாட்டரி சீட்டுகளை வாங்கி வருவதாக கூறப்படுகிறது.
5 மூட்டைகளில் பழைய லாட்டரி சீட்டுகள்
ராகவன் பல ஆண்டுகளாக வாங்கிய லாட்டரி சீட்டுகளில் பெரும்பாலானவற்றை தூக்கி எறியாமல் வீட்டிலேயே சேமித்து வைத்துள்ளார். அவரது வீட்டில் பழைய லாட்டரி சீட்டுகள் சுமார் 5 மூட்டைகள் அளவுக்கு இருப்பதாக தெரிவிக்கப்பட்டுள்ளது.
60 ஆண்டுகளை நெருங்கியும் லாட்டரி வாங்குவதை நிறுத்தாமல் தொடர்ந்து வரும் ராகவனின் இந்த பழக்கம், லாட்டரி மீது அவருக்கு ஏற்பட்டுள்ள நீண்டகால நம்பிக்கையை வெளிப்படுத்துவதாக அமைந்துள்ளது.