குஜராத் மாநிலம் சூரத் மாவட்டத்தில் நடைபெற்ற தடுப்பூசி முகாமில், குழந்தைகளுக்கு பாராசிட்டமாலுக்கு பதிலாக நீரிழிவு நோய்க்கு பயன்படுத்தப்படும் மருந்து தவறுதலாக வழங்கப்பட்ட சம்பவம் அதிர்ச்சியை ஏற்படுத்தியுள்ளது. இந்தச் சம்பவத்தில் பாதிக்கப்பட்ட 5 குழந்தைகள் மருத்துவமனையில் தீவிர சிகிச்சைப் பிரிவில் அனுமதிக்கப்பட்டனர். தற்போது அவர்களின் உடல்நிலை சீராக இருப்பதாக அதிகாரிகள் தெரிவித்துள்ளனர்.
தடுப்பூசி முகாமில் நடந்த தவறு
சூரத் மாவட்டம் பல்சானா தாலுகாவில் உள்ள கனவ் ஆரம்ப சுகாதார மையத்தின் கீழ் செயல்படும் பல்சானா-01 துணை சுகாதார மையத்தில் கடந்த செப்டம்பர் 23-ம் தேதி ‘மம்தா திவாஸ்’ தடுப்பூசி முகாம் நடைபெற்றது.
இந்த முகாமில் மொத்தம் 7 குழந்தைகளுக்கு தடுப்பூசி செலுத்தப்பட்டது. தடுப்பூசி செலுத்திய பிறகு வழக்கமாக காய்ச்சல் மற்றும் வலி ஏற்படாமல் இருக்க குழந்தைகளுக்கு பாராசிட்டமால் மாத்திரைகள் வழங்கப்படுவது வழக்கம். ஆனால், 5 குழந்தைகளுக்கு அதற்கு பதிலாக நீரிழிவு நோய்க்கு பயன்படுத்தப்படும் கிளிமெபிரைடு 2 மி.கி மருந்து தவறுதலாக வழங்கப்பட்டுள்ளது.
உடல்நிலை பாதிப்பு – ஐசியுவில் அனுமதி
தவறாக வழங்கப்பட்ட மருந்தை உட்கொண்ட பிறகு குழந்தைகளின் உடல்நிலையில் பாதிப்பு ஏற்பட்டதாக தெரிவிக்கப்பட்டுள்ளது. இதையடுத்து 5 குழந்தைகளும் செப்டம்பர் 24-ம் தேதி மருத்துவமனைகளில் உள்ள ஐசியு பிரிவுகளில் அனுமதிக்கப்பட்டனர்.
பாதிக்கப்பட்ட குழந்தைகளில் மூன்றரை மாத குழந்தையும், ஒரு வயது குழந்தையும் அடங்குவதாக குஜராத் சுகாதார அமைச்சர் பிரபுல் பஞ்சஷேரியா தெரிவித்துள்ளார். குழந்தைகளுக்கு உடனடியாக மருத்துவ சிகிச்சை அளிக்கப்பட்ட நிலையில், தற்போது அவர்களின் உடல்நிலை சீராக இருப்பதாகவும் அவர் கூறியுள்ளார்.
சுகாதாரப் பணியாளர் இடைநீக்கம்
சம்பவம் தொடர்பாக பெண் சுகாதாரப் பணியாளர் இந்துபென் ரத்திலால் சௌத்ரி உடனடியாக இடைநீக்கம் செய்யப்பட்டுள்ளார். அவர் மீது துறை ரீதியான விசாரணையும் தொடங்கப்பட்டுள்ளது.
விசாரணை அறிக்கை கிடைத்த பிறகு அடுத்தகட்ட நடவடிக்கை எடுக்கப்படும் என்று குஜராத் சுகாதார அமைச்சர் தெரிவித்துள்ளார். அரசு விதிகளின்படி இறுதி முடிவு எடுக்கப்படும் என சுகாதாரத் துறை அதிகாரிகளும் தெரிவித்துள்ளனர்.
அதிகாரிகள் விசாரணை
ஒரே தடுப்பூசி முகாமில் குழந்தைகளுக்கு வழங்க வேண்டிய மருந்துக்கு பதிலாக வேறு மருந்து வழங்கப்பட்டது குறித்து சுகாதாரத் துறை அதிகாரிகள் விசாரணை மேற்கொண்டு வருகின்றனர்.
மருந்துகள் எவ்வாறு வழங்கப்பட்டன, தவறு எவ்வாறு ஏற்பட்டது உள்ளிட்ட விவரங்கள் குறித்து விசாரணை நடைபெற்று வரும் நிலையில், விசாரணை அறிக்கையின் அடிப்படையில் அடுத்தகட்ட நடவடிக்கை எடுக்கப்படும் என தெரிவிக்கப்பட்டுள்ளது.