கேரள முன்னாள் முதலமைச்சர் பினராயி விஜயனுக்கு, கொச்சின் மினரல்ஸ் அண்ட் ரூட்டைல் லிமிடெட் (CMRL) மற்றும் எக்ஸாலாஜிக் (Exalogic) நிறுவனம் தொடர்பான பணப்பரிமாற்ற வழக்கில் விசாரணைக்கு ஆஜராகுமாறு அமலாக்கத்துறை (ED) சம்மன் அனுப்பியுள்ளது. இதன்படி, வரும் அக்டோபர் 23-ம் தேதி கொச்சியில் உள்ள அமலாக்கத்துறையின் மண்டல அலுவலகத்தில் அவர் ஆஜராக வேண்டும் எனத் தெரிவிக்கப்பட்டுள்ளது.
வழக்கின் பின்னணி என்ன?
பினராயி விஜயனின் மகள் வீணா டி. நடத்தி வந்த எக்ஸாலாஜிக் நிறுவனத்திற்கும், CMRL நிறுவனத்திற்கும் இடையிலான நிதிப் பரிவர்த்தனைகள் தொடர்பாக இந்த விசாரணை நடைபெற்று வருகிறது. எவ்விதமான சேவைகளும் வழங்கப்படாத நிலையில், ஆலோசனைக் கட்டணங்கள் என்ற பெயரில் பணம் வழங்கப்பட்டதாக விசாரணை அமைப்புகள் குற்றம்சாட்டியுள்ளன. இந்தப் பணப்பரிவர்த்தனைகளில் முறைகேடுகள் நடைபெற்றதாக எழுந்த புகார்களின் அடிப்படையில் விசாரணை தீவிரமடைந்துள்ளது.
இந்த விவகாரம் தொடர்பாக கேரள லஞ்ச ஒழிப்பு மற்றும் ஊழல் தடுப்புப் பிரிவு (VACB), பினராயி விஜயன், அவரது மகள் வீணா மற்றும் அவரது மருமகனும் முன்னாள் அமைச்சருமான பி.ஏ. முகமது ரியாஸ் உள்ளிட்டோருக்கு எதிராக வழக்குகளைப் பதிவு செய்துள்ளது. CMRL நிறுவனம் எக்ஸாலாஜிக் நிறுவனத்திற்கு வழங்கியதாகக் கூறப்படும் தொகை தொடர்பாகவும், வெளிநாடுகளுக்குப் பணம் மாற்றப்பட்டதாகக் கூறப்படும் புகார் தொடர்பாகவும் விசாரணை நடைபெறுகிறது.
நீதிமன்றத்தில் தொடரும் சட்டப் போராட்டம்
இந்த வழக்கில் முதல் தகவல் அறிக்கை (FIR) பதிவு செய்ய கேரள உயர் நீதிமன்றம் உத்தரவிட்டிருந்தது. இந்த உத்தரவை எதிர்த்து பினராயி விஜயன் தரப்பில் உச்ச நீதிமன்றத்தை அணுகிய நிலையில், அவசர விசாரணை நடத்துவதற்கான கோரிக்கையை உச்ச நீதிமன்றம் உடனடியாக ஏற்கவில்லை. வழக்கை தசரா விடுமுறைக் காலத்தில் விசாரிப்பது அல்லது நீதிமன்றம் மீண்டும் திறக்கப்பட்ட பின்னர் எடுத்துக்கொள்வது குறித்து பரிசீலிக்கப்படும் எனத் தெரிவிக்கப்பட்டது.
இதற்கிடையே, பணமோசடி தடுப்புச் சட்டத்தின் கீழ் விசாரணை நடத்தி வரும் அமலாக்கத்துறை, அக்டோபர் 23-ம் தேதி ஆஜராகுமாறு பினராயி விஜயனுக்கு சம்மன் அனுப்பியுள்ளது. இந்தக் குற்றச்சாட்டுகளை பினராயி விஜயன் தரப்பு மறுத்து வரும் நிலையில், வழக்கின் அடுத்தகட்ட நடவடிக்கைகள் மற்றும் அவர் விசாரணைக்கு ஆஜராவாரா என்பது அரசியல் மற்றும் சட்ட வட்டாரங்களில் கவனத்தைப் பெற்றுள்ளது.
டிசம்பர் 11, 12-ல் கனடா செல்கிறார் பிரதமர் மோடி! – இந்தியா, கனடா உறவை வலுப்படுத்த முக்கியப் பயணம்