தமிழகத்தில் தவெக (தமிழக வெற்றிக் கழகம்) தலைமையிலான புதிய அரசு பொறுப்பேற்றுள்ள நிலையில், ஆளும் தவெக கூட்டணியில் உள்ள மதிமுக மற்றும் விசிக இடையே வெடித்துள்ள நேரடி மோதல் அரசியல் வட்டாரத்தில் பெரும் பரபரப்பை ஏற்படுத்தியுள்ளது. விசிகவை மறைமுகமாகக் குறிப்பிட்டு மதிமுக பொதுச்செயலாளர் வைகோ எழுப்பிய விமர்சனத்திற்கு, விசிக துணைப் பொதுச்செயலாளரும், தற்போதைய தவெக அரசின் அமைச்சருமான வன்னியரசு காரசாரமாகப் பதிலடி கொடுத்துள்ளார்.
வைகோவின் அதிரடி குற்றச்சாட்டும் சவாலும்
முன்னதாக செய்தியாளர்கள் சந்திப்பில் பேசிய மதிமுக பொதுச்செயலாளர் வைகோ, ஆளும் கூட்டணியில் இருந்து கொண்டே தினந்தோறும் தவெக அரசை விமர்சிப்பவர்களைக் கடுமையாகச் சாடினார்.
அப்போது பேசிய அவர், “கடந்த 15-20 நாட்களாக முதலமைச்சர் விஜய் தலைமையிலான அரசு மீது, எதிரிகள் மட்டுமின்றி கூட்டணியில் உள்ள சில கட்சிகளும் தினந்தோறும் விமர்சனக் கணைகளைத் தொடுத்து வருகின்றன. திமுக ஆட்சியில் இருந்த போது இவர்களுடைய இந்த விமர்சனப் பாணங்கள் எங்கே போயின? ஏன் அப்போது வாய் திறக்கவில்லை?
இந்தியன் யூனியன் முஸ்லிம் லீக் (IUML) போன்ற கட்சிகள் கூட்டணி தர்மத்தை மதித்து ஒரு வார்த்தை கூட அரசை விமர்சிப்பதில்லை. அரசிடம் ஏதேனும் குறைகள் இருந்தால் முதலமைச்சரையோ அல்லது அமைச்சர்களையோ நேரில் சந்தித்துக் கூறலாமே? அதை விடுத்து தினமும் ஏன் செய்தியாளர்களைச் சந்தித்து அறிக்கை விடுகிறீர்கள்? ‘எங்கள் தயவால்தான் ஆட்சி நடக்கிறது, எந்த நேரத்திலும் ஆட்சியைக் கவிழ்ப்போம்; இன்னும் 6 மாதத்தில் தேர்தல் வரும்’ என சிலர் மிரட்டுகிறார்கள். இதன் பின்னணியில் என்ன ரகசியத் திட்டமும், பாஜக உடனான மறைமுகத் தொடர்பும் இருக்கிறது? சும்மா மிரட்டிப் பார்க்காதீர்கள். நான் சவால் விடுகிறேன், ஆட்சியைக் கவிழ்த்துப் பாருங்கள்; மீண்டும் தேர்தல் வந்தால் முதலமைச்சர் விஜய் தலைமையிலான கூட்டணி 180 இடங்களில் அமோக வெற்றி பெற்று மீண்டும் ஆட்சி அமைக்கும்.”இவ்வாறு வைகோ ஆவேசமாகச் சவால் விடுத்திருந்தார்.
”வைகோ தனது மதிப்பைத் தக்க வைத்துக் கொள்ள வேண்டும்” – அமைச்சர் வன்னியரசு பதிலடி
வைகோவின் இந்த மறைமுகத் தாக்குதலுக்கு விசிக துணைப் பொதுச்செயலாளரும் அமைச்சருமான வன்னியரசு செய்தியாளர்கள் சந்திப்பில் விரிவான பதிலடி தந்துள்ளார்.
அமைச்சர் வன்னியரசு பேசியதாவது, “அண்ணன் வைகோ அவர்கள் விடுதலைச் சிறுத்தைகள் கட்சியைத்தான் மறைமுகமாகக் குறிப்பிடுகிறார். இதை எங்களால் ஏற்றுக்கொள்ள முடியாது. வைகோ அவர்கள் மீது எங்களுக்கு எப்போதுமே மிகுந்த மதிப்பும் மரியாதையும் உண்டு. அந்த மரியாதையையும் மதிப்பையும் அவர் தொடர்ந்து காப்பாற்றிக் கொள்ள வேண்டும். ஒரு நல்ல நிர்வாகத்தை நடத்த வேண்டிய பொறுப்பு இந்த அரசுக்கு உள்ளது. மக்கள் நலனுக்காகப் போராடும் தலைவர்கள் அரசின் குறைகளைச் சுட்டிக்காட்டுவதும், அதைச் சரி செய்ய வழிகாட்டுவதும் தவறில்லை. ஒரு அமைச்சராக மக்களின் ஆக்கப்பூர்வமான விமர்சனங்களை ஏற்கும் பக்குவம் எனக்கு உள்ளது. அதைச் சொல்லக் கூடாது என யாரும் தடுக்க முடியாது.
’திமுக கூட்டணியில் இருந்த போது ஏன் இப்படிப் பேசவில்லை?’ என வைகோ கேட்கிறார். கடந்த கால திமுக ஆட்சியில் நாங்கள் கூட்டணியில் இருந்த போதே, அந்த அரசுக்கு எதிராக விசிக பல்வேறு மக்கள் போராட்டங்களை முன்னெடுத்துள்ளது என்பதை அண்ணன் வைகோ அறிவாரா என்று தெரியவில்லை. எனவே, எங்களைக் குறைத்து மதிப்பிட்டுப் பேசுவது முறையல்ல.” கூட்டணிக்குள்ளேயே தவெக அரசை விசிக விமர்சிப்பது குறித்தும், அதற்கு மதிமுக வைகோ சவால் விடுத்துப் பேசியுள்ளதும் தவெக கூட்டணியில் புயலைக் கிளப்பியுள்ளது. இந்த மோதல் தற்போதைய முதலமைச்சர் விஜய் தலைமையிலான தவெக அரசின் அரசியல் ஸ்திரத்தன்மையில் பெரும் விவாதப் பொருளாக மாறியுள்ளது.