பெங்களூரூ அணிக்கு எதிரான போட்டியில் ராஜஸ்தான் அணி இரண்டாவது பேட்டிங்கில் 19 ஓவர்கள் முடிவில் 6 விக்கெட்டுகள் இழந்து 174 ரன்கள் எடுத்து 4 விக்கெட்டுகள் வித்தியாசத்தில் அபார வெற்றி பெற்றது.
17வது ஐபிஎல் கிரிக்கெட் சீசன் இறுதிக்கட்டத்தை எட்டியுள்ளது. 10 அணிகள் பங்கேற்ற இந்த கிரிக்கெட் திருவிழாவில் முதலாவது தகுதி சுற்று நேற்று முன் தினம் நடைபெற்றது. இப்போட்டியில் கொல்கத்தா மற்றும் ஐதராபாத் அணிகள் பலப்பரீட்சை நடத்தின. போட்டியில் கொல்கத்தா அணி வெற்றி பெற்று 4வது முறையாக இறுதிப்போட்டிக்கு முன்னேறியது. இந்த நிலையில் நேற்று எலிமினேட்டர் போட்டி நடைபெற்றது. இப்போட்டியில் பெங்களூருvsராஜஸ்தான் அணிகள் பலப்பரீட்சை நடத்தின. போட்டியானது அகமதாபாத்திலுள்ள நரேந்திர மோடி மைதானத்தில் நேற்றிரவு 7.30 மணிக்கு நடைபெற்றது.
இப்போட்டியில் டாஸ் வென்ற ராஜஸ்தான் அணியின் கேப்டன் சஞ்சு சாம்சன் முதலில் பந்துவீச்சை தேர்வு செய்தார். இதனைத்தொடர்ந்து பெங்களூரு அணி முதலாவது பேட்டிங் விளையாடியது. தொடக்க ஆட்டக்காரர்களாக களமிறங்கிய விராட் கோலி 33 ரன்களிலும் பாப் டூ பிளசிஸ் 17 ரன்களிலும் ஆட்டமிழந்தனர். அடுத்து களமிறங்கிய கேமரூன் கிரீன் 27 ரன்களிலும் ரஜத் படிதார் 34 ரன்களிலும் ஆட்டமிழந்தனர். இறுதியில் அணியானது 20 ஓவர்கள் முடிவில் 8 விக்கெட்டுகள் இழந்து 172 ரன்கள் எடுத்தது.
பின்னர் 173 ரன்கள் எடுத்தால் வெற்றி என்ற இலக்குடன் ராஜஸ்தான் அணி இரண்டாவது பேட்டிங் விளையாடியது. தொடக்க ஆட்டக்காரர்களாக களமிறங்கிய யாஷ்வி ஜெய்ஸ்வால் 45 ரன்களிலும் டாம் கோலர் காட்மோர் 20 ரன்களிலும் ஆட்டமிழந்தனர். அடுத்து களமிறங்கிய சஞ்சு சாம்சன் 17 ரன்களிலும் ரியான் பராக் 36 ரன்களிலும் ஆட்டமிழந்தனர். கடைசியில் அதிரடி காட்டிய சிம்ரோன் ஹெட்மயர் 14 பந்துகளில் 26 ரன்கள் எடுத்து ஆட்டமிழந்தார். இறுதியில் அணியானது 19 ஓவர்கள் முடிவில் 6 விக்கெட்டுகள் இழந்து 174 ரன்கள் எடுத்து 4 விக்கெட்டுகள் வித்தியாசத்தில் அபார வெற்றி பெற்றது. ராஜஸ்தான் அணியின் ஆட்டநாயகனாக ரவிச்சந்திரன் அஸ்வின் தேர்வு செய்யப்பட்டார். இந்த வெற்றியை தொடர்ந்து ராஜஸ்தான் அணி குவாலிபையர் 2வில் ஐதராபாத் அணியை நாளை சென்னை சிதம்பரம் மைதானத்தில் சந்திக்க இருக்கிறது.