தமிழ்நாட்டில் புதிய அரசு பொறுப்பேற்று 100 நாட்கள் நிறைவடைந்துள்ள நிலையில், “100 நாட்களில் 1 லட்சம் கோடி ரூபாய்க்கும் அதிகமான முதலீடுகளை ஈர்த்துள்ளதாக” அரசு சார்பில் பெருமிதத்துடன் அறிவிக்கப்பட்டுள்ளது. இது தொடர்பான விளம்பரங்கள் சமூக வலைதளங்களில் வைரலாகி வரும் நிலையில், அரசின் இந்தக் கூற்று “அப்பட்டமான உண்மைக்குப் புறம்பானது” என அரசியல் விமர்சகர்களும் எதிர்க்கட்சியினரும் கடுமையாகக் குற்றம் சாட்டி வருகின்றனர்.
முதலீட்டுப் புள்ளிவிவரங்களின் பின்னணி
அரசு வெளியிட்ட தகவலின்படி, மொத்தம் ஈர்க்கப்பட்ட 1.02 லட்சம் கோடி ரூபாய் முதலீடானது இரண்டு பிரிவுகளாகப் பிரிக்கப்பட்டுள்ளது:
- மாநாட்டுக்கு முந்தைய முதலீடு: 7 நிறுவனங்களுடனான புரிந்துணர்வு ஒப்பந்தங்கள் (மதிப்பு: ₹35,000 கோடி).
- மாநாட்டில் கையெழுத்தான முதலீடு: 97 நிறுவனங்களுடனான புரிந்துணர்வு ஒப்பந்தங்கள் (மதிப்பு: ₹67,000 கோடி).
புதிய முதலீடுகளா அல்லது பழைய திட்டங்களின் நீட்சியா?
அரசு காட்டும் இந்த முதலீடுகள் அனைத்தும் உண்மையில் புதியவைதானா என்ற கேள்வி தற்போது வலுத்துள்ளது.
- பழைய ஒப்பந்தங்களின் சேர்க்கை: எல் அண்ட் டி (L&T) நிறுவனத்தின் ₹18,600 கோடி முதலீட்டில், காஞ்சிபுரத்தில் அமைக்கப்படும் தரவு மையம் (Data Center) 2021-லேயே தொடங்கப்பட்டது. அதேபோல், கப்பல் கட்டும் தளத்திற்கான ஒப்பந்தம் கடந்த ஆண்டே மேற்கொள்ளப்பட்டது. இவை அனைத்தும் முந்தைய ஆட்சிக் காலத்திலேயே திட்டமிடப்பட்டவை என்பது சுட்டிக்காட்டப்படுகிறது.
- தொழிற்சாலை விரிவாக்கங்கள் (Expansion): ஏற்கனவே மாநிலத்தில் இயங்கி வரும் எல் அண்ட் டி, ஹிட்டாச்சி எனர்ஜி, விக்ரம் சோலார் உள்ளிட்ட நிறுவனங்களின் விரிவாக்கப் பணிகளையே, அரசு தனது புதிய முதலீட்டுச் சாதனையாகக் கணக்கு காட்டியுள்ளது.
- சிறு நிறுவனங்களின் பெயரில் கணக்கு: ஏற்கனவே இயங்கி வரும் சிறிய நிறுவனங்கள் மற்றும் பன்னாட்டு நிறுவனங்களின் விரிவாக்கங்களை இப்பட்டியலில் சேர்த்து, வெறும் எண்ணிக்கையை உயர்த்திக் காட்டவே அரசு முயன்றுள்ளதாக விமர்சிக்கப்படுகிறது.
- முதலீட்டில் -75% சரிவு: பிசினஸ் ஸ்டாண்டர்ட் அறிக்கை
முதலீடுகள் கணிசமாக அதிகரித்துள்ளதாக அரசு கூறிவரும் வேளையில், ‘பிசினஸ் ஸ்டாண்டர்ட்’ நாளிதழ் வெளியிட்ட புள்ளிவிவரம் தொழில் வட்டாரத்தில் அதிர்ச்சியை ஏற்படுத்தியுள்ளது.
கடந்த ஆண்டின் இதே காலகட்டத்துடன் ஒப்பிடுகையில், தமிழ்நாட்டின் முதலீட்டு ஈர்ப்பு விகிதம் -75% சரிவைச் சந்தித்துள்ளது. அதாவது, கடந்த ஆண்டில் 44,036 கோடி ரூபாயாக இருந்த முதலீடு, இந்த ஆண்டில் வெறும் 11,236 கோடி ரூபாயாகக் குறைந்துள்ளது என அந்த அறிக்கையில் குறிப்பிடப்பட்டுள்ளது.
ஊடகங்களுக்கு அனுமதி மறுப்பு: வெளிப்படைத்தன்மை எங்கே?
முதலீட்டாளர்கள் மாநாடு குறித்த முன் தகவல்கள் எதுவுமே ஊடகங்களுக்கு முறையாகத் தெரிவிக்கப்படுவதில்லை என்றும், கடைசி நேரத்தில் அவசர அவசரமாக அறிவிப்புகள் வெளியிடுவது திட்டமிட்ட விளம்பர தந்திரம் என்றும் கூறப்படுகிறது. எதிர்க்கட்சிகளின் விமர்சனங்களைத் தவிர்க்கவே அரசு இத்தகைய ரகசியப் போக்கைக் கடைப்பிடிப்பதாகக் குற்றச்சாட்டு எழுந்துள்ளது.
வெள்ளை அறிக்கை வெளியிடக் கோரிக்கை
ஒரு மாநிலத்தின் தொழில் வளர்ச்சியை வெறும் சமூக வலைதள விளம்பரங்கள் மற்றும் ரீல்ஸ்கள் மூலம் நிலைநாட்ட முடியாது எனச் சுட்டிக்காட்டும் தொழில் வல்லுநர்கள், அரசு அறிவித்துள்ள 1 லட்சம் கோடி முதலீட்டில் எத்தனை சதவீதம் உண்மையான புதிய முதலீடுகள் என்பது குறித்து அரசு உடனடியாக வெள்ளை அறிக்கை வெளியிட வேண்டும் என வலியுறுத்தியுள்ளனர்.